Jérémie 26:1-24
26 Kete na peko ti so Jéhoïakim+ molenge ti Josias, gbia ti Juda, akomanse ti komande, Jéhovah asara tënë so na mbi:
2 “Bâ tënë so Jéhovah atene la: ‘Mo gue mo luti na yâ ti lacour ti Jéhovah na mo sara tënë so abâ* azo kue ti agbata ti Juda so ayeke ga ti voro* Jéhovah na yâ ti da ti lo. Mo tene na ala atënë kue so mbi mû yanga na mo ti tene. Mo zi mbeni tënë oko na yâ ni pëpe.
3 Peut-être ala yeke mä tënë ni na zo oko oko kue ayeke zia lege ti sioni sarango ye ti lo, tongaso mbi yeke changé bango ndo ti mbi na ndö ti* ye ti vundu so mbi ye ti ga na ni na ndö ti ala ndali ti asioni sarango ye ti ala so.+
4 Mo tene na ala: “Bâ tënë so Jéhovah atene la: ‘Tongana ala mä mbi pëpe na lege so ala ke ti sara ye alingbi na andia* ti mbi so mbi zia na devant ti ala,
5 tongana ala mä mbi pëpe na lege so ala ke ti mä awakua ti mbi aprophète, atâa so mbi tokua ala na mbage ti ala fani mingi* si ala mä ala pëpe,+
6 mbi yeke sara si da so aga tongana Shilo,+ na mbi yeke sara si gbata so aga mbeni ye so a deba ni awe na lê ti amara kue ti sese.’”’”+
7 Aprêtre, aprophète nga na azo ni kue amä Jérémie so angbâ ti tene atënë ni so na yâ ti da ti Jéhovah.+
8 Na ngoi so Jérémie ahunzi ti sara atënë kue so Jéhovah ahunda na lo ti tene na azo ni so kue awe, aprêtre, aprophète nga na azo ni kue agbu lo, ala tene: “Mo lingbi na kuâ!
9 Ngbanga ti nyen la mo tene prophétie na iri ti Jéhovah, mo tene: ‘Da so ayeke ga ande tongana Shilo nga a yeke futi gbata so na zo oko ayeke ngbâ na yâ ni pëpe so’?” Azo ni kue aga abungbi na terê ti Jérémie na yâ ti da ti Jéhovah.
10 Tongana amokonzi ti Juda amä atënë so, ala londo na da* ti gbia ti Juda ala monté na da ti Jéhovah na ala duti na fini yanga ti gbagba ti da ti Jéhovah.+
11 Aprêtre nga na aprophète atene na amokonzi ni nga na azo ni kue, atene: “Koli so alingbi biani na kuâ,+ ngbanga ti so lo tene aprophétie ti aye ti vundu na ndö ti gbata so, tongana ti so ala wani ala mä na mê ti ala so.”+
12 Tongaso, Jérémie atene na amokonzi ni kue nga na azo ni kue, lo tene: “Jéhovah la atokua mbi ti tene prophétie na ndö ti da so nga na ndö ti gbata so, lo tokua mbi ti tene atënë kue so ala mä so.+
13 Ni la, ala changé asarango ye ti terê ti ala nga na aye so ala yeke sara so, na ala mä yanga ti Jéhovah Nzapa ti ala, na Jéhovah ayeke changé bango ndo ti lo na ndö ti* ye ti vundu so lo tene lo yeke ga na ni na ndö ti ala.+
14 Me ti mbi, mbi la na yâ ti maboko ti ala so. Ala sara na mbi ye so ala bâ ayeke nzoni si ayeke na lege ni na lê ti ala ti sara.
15 Ye oko, zia ala hinga so tongana ala fâ mbi, ala yeke sara si mênë ti zo so tënë ayeke na li ti lo pëpe aga na ndö ti ala wani, na ndö ti gbata so nga na ndö ti azo ti gbata ni, ndali ti so, ti tâ tënë ni, Jéhovah la atokua mbi na ala ti tene atënë so kue na mê ti ala.”
16 Na pekoni, amokonzi na azo ni kue atene na aprêtre nga na aprophète ni, atene: “Koli so alingbi na kuâ pëpe, ngbanga ti so lo sara tënë na e na iri ti Jéhovah Nzapa ti e.”
17 Tongaso, ambeni ancien ti azo ti kodro ni alondo na ala komanse ti sara tënë na bungbi ti azo ni kue, ala tene:
18 “Na ngoi ti Ézéchias+ gbia ti Juda, Michée+ ti kodro ti Morésheth ayeke tene lani aprophétie, na lo tene na azo ti Juda kue, lo tene: ‘Bâ tënë so Jéhovah ti aturugu atene la:
“A yeke dë ande Sion tongana ti so azo ayeke dë yaka,Jérusalem ayeke ga ndo so gï gbâ ti afango brique ti da la ayeke dä,+hoto ti Da* ni ayeke ga tongana ahoto na yâ ti gbako.”’*+
19 “Eskê Ézéchias, gbia ti Juda, nga na azo ti Juda kue afâ lani Michée ni? Ézéchias asara mbeto ti Jéhovah na lo voro terê ti lo na Jéhovah ti sara nzoni bê na lo, ni la Jéhovah achangé lani bango ndo ti lo na ndö ti ye ti vundu so lo tene lani lo tene lo yeke ga na ni na ndö ti ala.+ A yeke tongaso ape? Bâ, e yeke gi ti ga na kota ye ti vundu na ndö ti e wani* la.
20 “Mbeni koli ni nde nga ayeke tene lani aprophétie na iri ti Jéhovah, iri ti lo ayeke Urie, molenge ti Shémaïah ti kodro ti Kiriath-Jéarim,+ lo tene prophétie na ndö ti gbata so nga na ndö ti kodro so, lo tene lani gï mara ti atënë so Jérémie ayeke tene so.
21 Gbia Jéhoïakim,+ angangu zo ti bira ti lo kue nga na amokonzi ni kue amä atënë so Urie atene so, na Gbia Jéhoïakim agi lege lani ti fâ lo.+ Gï so Urie amä tënë ni, mbeto asara lo si lo kpe lo gue na Égypte.
22 Na pekoni, Gbia Jéhoïakim amû Elnathan,+ molenge ti Akbor, lo na ambeni zo na terê ti lo, lo tokua ala na Égypte.
23 Ala gue na Égypte, ala gbu Urie ala ga na lo na Gbia Jéhoïakim, si Gbia Jéhoïakim afâ lo na épée+ na a bi kuâ ti lo na yâ ti cimetière so a yeke lu azo kue dä.”
24 Me Ahicam,+ molenge ti Shaphan,+ la agbu koko ti Jérémie, tongaso a zia lo pëpe na maboko ti azo ni ti tene ala fâ lo.+
Akete tënë na terê ni
^ Wala “na.”
^ Wala “kuku na gbe ti.”
^ Na Hébreu: “mbi yeke regretté.”
^ Wala “afango ye.”
^ Na Hébreu: “lango oko oko mbi londo hio na ndapre, mbi yeke tokua ala.”
^ Wala “yangbo.”
^ Wala: “ayeke regretté.”
^ Wala “hoto ti temple.”
^ Wala “tongana mbeni hoto so akeke asigi na ndö ni.”
^ Wala “âme ti e.”
