Jérémie 34:1-22
34 Na ngoi so Nébucadnezzar,* gbia ti Babylone, nga na aturugu ti lo kue, aroyaume kue so ayeke na ndö ti sese si ayeke na gbe ti komandema ti lo na amara kue ayeke sara bira na Jérusalem nga na agbata ni kue, Jéhovah asara tënë na Jérémie, atene:+
2 “Bâ tënë so Jéhovah, Nzapa ti Israël, atene la: ‘Gue mo tene na Sédécias+ gbia ti Juda, mo tene: “Jéhovah atene: ‘Bâ, mbi yeke zia gbata so na maboko ti gbia ti Babylone, na lo yeke gbi ni na wâ.+
3 Mo yeke kpe ande na yâ ti maboko ti lo pëpe, biani a yeke gbu mo ti gue na mo na lo.+ Mo yeke bâ ande lo lê na lê* nga lo yeke sara tënë na mo lê na lê na mo yeke gue ande na Babylone.’+
4 Me mo, Sédécias gbia ti Juda, mo mä tënë so Jéhovah atene: ‘Bâ tënë so lo tene na ndö ti mo la: “Mo yeke kui ande kuâ ti épée pëpe.
5 Mo yeke kui senge kuâ,+ na a yeke zö dukane na place ti kuâ ti mo tongana ti so a sara lani na akotara ti mo, agbia so aga lani kozo na mo, na a yeke toto mo, atene: ‘Aï, seigneur-oo!’ ndali ti so ‘mbi sara tënë ni awe,’ tënë ti yanga ti Jéhovah la.”’”’”
6 Tongaso, prophète Jérémie ague na Jérusalem, lo sara atënë so kue na Sédécias gbia ti Juda,
7 na ngoi ni so aturugu ti gbia ti Babylone ayeke sara bira na Jérusalem nga na agbata kue ti Juda so angbâ,+ ala yeke sara bira na Lakish+ nga na Azécah,+ ndali ti so a yeke gï agbata ti Juda so angbâ la, agbata so angangu gbagba ayeke na terê ni.
8 Jéhovah asara tënë so na Jérémie na peko ti so Gbia Sédécias ate mbele na azo ti kodro ti Jérusalem kue, ti tene a to mbela a tene so ayeke ngoi ti liberté la,+
9 zia azo kue azi angbâa ti ala so ayeke aHébreu, akoli ni nga na awali ni, tongaso si mbeni zo angbâ ti bata ita ti lo Juif pëpe tongana ngbâa na gbe ti lo.
10 Tongaso, amokonzi kue nga na azo ti kodro ni kue ayeda na tënë ni. Ala yeda na tënë ti mbele ni so, ti tene ala kue azi angbâa ti ala ti koli na angbâa ti ala ti wali, ti zia ala ngbâ na gbe ti ngbâa encore ape. Ala yeda na tënë ni so na ala zia angbâa ni ague.
11 Me na pekoni, ala mû akoli na awali so ala zi ala lani awe so ala kiri na ala, ala gbu ala na ngangu ti sara kua ti ngbâa.
12 Tongaso, Jéhovah atene na Jérémie:
13 “Bâ tënë so Jéhovah, Nzapa ti Israël, atene la: ‘Mbi te mbele lani na akotara ti ala+ na lango so mbi sigi na ala na kodro ti Égypte, kodro* so ala yeke lani ngbâa dä,+ mbi tene:
14 “Tongana ngu mbasambala ahunzi, a lingbi ala oko oko kue azi na gbe ti ngbâa ita ti ala Hébreu so a kä lo na ala, so lo sara kua na ala ngu omene. A lingbi ala zi lo.”+ Me akotara ti ala amä lani yanga ti mbi pëpe nga ala dengi mê ti ala na tënë ti mbi pëpe.
15 Ade ti ninga pëpe,* ala azo ti Jérusalem, ala changé sarango ye ti ala na ala sara ye so ayeke na lege ni na lê ti mbi na lege so ala mû liberté na amba ti ala so ayeke angbâa, nga ala te mbele na lê ti mbi na yâ ti da so iri ti mbi ayeke na ndö ni so.
16 Me fadeso ala kiri ala changé sarango ye ti ala na ala bi nengo ti iri ti mbi na sese,+ na lege so ala kiri ala mû angbâa ti ala ti koli na angbâa ti ala ti wali so ala zi ala na bê ti ala wani so, ala gbu ala na ngangu ti kiri ti sara kua ti ngbâa.’
17 “Tongaso, bâ tënë so Jéhovah atene la: ‘Ala mä yanga ti mbi lani pëpe ti tene zo oko oko amû liberté na ita ti lo wala na mba ti lo so ayeke ngbâa.’+ Ni la, Jéhovah atene: ‘Bâ liberté so mbi yeke mû na ala la: Ala yeke kui na lege ti épée, na lege ti sioni kobela so amû ndo nga na lege ti kota nzara,+ na mbi yeke sara si ala ga mbeni ye so amû mbeto na aroyaume kue ti sese.+
18 Aye ni so ayeke si ande na azo so abuba yâ ti mbele ti mbi na lege so ala sara ye pëpe alingbi na yanga so ala mû na ngoi so ala te mbele na devant ti mbi, na lege ti kete bagara so ala suru yâ ti lo use na ala hon na popo ti anyama ni;+
19 azo ni so ayeke amokonzi ti Juda, amokonzi ti Jérusalem, akota zo ti yangbo ti gbia, aprêtre nga na azo ti kodro ni kue so ahon na popo ti nyama ti kete bagara ni so ala suru yâ ni use so.
20 Mbi yeke zia ala na maboko ti awato ti ala, na maboko ti azo so ayeke gi lege ti fâ ala,* na kuâ ti ala ayeke ga ande kobe ti andeke ti nduzu nga kobe ti anyama ti ngonda.+
21 Mbi yeke zia ande Sédécias gbia ti Juda, lo na amokonzi ti lo na maboko ti awato ti ala, na maboko ti azo so ayeke gi lege ti fâ ala* nga na maboko ti aturugu ti gbia ti Babylone,+ so ayeke gboto terê ti ala fadeso ti hon yongoro na ala so.’+
22 “Jéhovah atene: ‘Bâ, mbi yeke mû ande yanga na ala, mbi yeke mû ala ti kiri na ala na terê ti gbata so, ala yeke sara bira na ni, ala yeke mû ni nga ala yeke gbi ni na wâ.+ Agbata ti Juda ayeke ga ande mbeni désert, so azo ayeke sara kodro dä pëpe.’”+
Akete tënë na terê ni
^ Na Hébreu: “Nébucadrezzar,” so mbeni lege ti di iri ni so la.
^ Na Hébreu: “Yanga ti lo ayeke sara tënë na yanga ti mo.”
^ Na Hébreu: “da ti ngbâa.”
^ Na Hébreu: “Laso.”
^ Wala “âme ti ala.”
^ Wala “âme ti ala.”
