Jérémie 36:1-32
36 A yeke na yâ ti ngu osio ni ti komandema ti Jéhoïakim+ molenge ti Josias, gbia ti Juda, si Jéhovah asara tënë so na Jérémie, atene:
2 “Mo mû mbeni rouleau* na mo sû na yâ ni atënë kue so mbi tene na terê ti azo ti Israël, na terê ti Juda+ nga na terê ti amara kue,+ atënë so mbi tene ni ngbene ye na ngoi ti Josias juska laso.+
3 Hinga ape na mango tënë ti aye ti vundu kue so mbi ye ti ga na ni na ndö ti azo ti Juda so, ala lingbi ti dö lege ti asioni sarango ye ti ala ti zia, tongaso mbi pardonné sioni ti ala nga na asiokpari ti ala.”+
4 Jérémie airi Baruch+ molenge ti Nériah, na Jérémie atene na lo peko ti atënë kue so Jéhovah atene na lo, tongaso Baruch asû atënë ni na yâ ti rouleau* ni.+
5 Na pekoni, Jérémie amû yanga na Baruch, atene: “Bâ, a kanga lege na mbi awe, mbi lingbi ti lï na yâ ti da ti Jéhovah pëpe.
6 Me mo la mo yeke gue na yâ ti da ni kâ ti diko atënë ni so ayeke na yâ ti rouleau so, atënë ni so mbi tene na mo si mo sû ni na yâ ti rouleau ni so. Mo diko ni na mê ti azo ni na yâ ti da ti Jéhovah na lango ti mungo jeûne, tongaso si mo lingbi ti diko ni nga na mê ti azo ti Juda kue so alondo na yâ ti agbata ti ala si aga so.
7 Hinga ape sambela ti ala so ala sara ti hunda na Nzapa ti sara nzoni bê na ala alingbi ti si na Jéhovah na zo oko oko ayeke changé asioni sarango ye ti lo, ndali ti so bê ti Jéhovah ason mingi nga ngonzo ti lo ayeke kota mingi na terê ti azo so.”
8 Tongaso, Baruch molenge ti Nériah asara ye kue so prophète Jérémie amû yanga na lo ti sara. Lo diko na kota go atënë ti Jéhovah so ayeke na yâ ti rouleau* ni na yâ ti da ti Jéhovah.+
9 A yeke na yâ ti ngu oku ni ti komandema ti Jéhoïakim+ molenge ti Josias, gbia ti Juda, na nze gumbaya ni, si azo ti Jérusalem kue nga na azo kue so alondo na agbata ti Juda aga na Jérusalem ato mbela ti tene azo amû jeûne na gbele Jéhovah.+
10 Tongaso, Baruch adiko na kota go na mê ti azo ni kue atënë ti Jérémie so a sû na yâ ti rouleau* ni. Lo diko ni na da ti Jéhovah, na yâ ti kubu* ti Guémariah,+ molenge ti Shaphan,+ so ayeke wasungo peko ti mbeti,* na yâ ti lacour ni so ayeke na mbage ti nduzu, na terê ti fini yanga ti gbagba ti da ti Jéhovah.+
11 Tongana Micaïah, molenge ti Guémariah, âta ti Shaphan, amä atënë ti yâ ti rouleau* so kue,
12 lo descend na da* ti gbia ni, na kubu ti wakuasu ni. Amokonzi ni kue so ayeke kâ ayeke: Élishama+ so ayeke wakuasu, Délaïah molenge ti Shémaïah, Elnathan+ molenge ti Akbor,+ Guémariah molenge ti Shaphan, Sédécias molenge ti Hananiah nga na ambeni mokonzi ni kue.
13 Micaïah atene na ala peko ti atënë kue so lo mä na ngoi so Baruch adiko fade atënë ti yâ ti rouleau* ni na mê ti azo ni kue.
14 Tongaso, amokonzi ni kue atokua Jéhudi molenge ti Néthaniah na Baruch. Néthaniah ayeke molenge ti Shélémiah na Shélémiah ayeke molenge ti Cushi. Jéhudi ague atene na Baruch, atene: “Mo mû rouleau so mo diko ni fade na mê ti azo ni so, mo ga na ni.” Baruch molenge ti Nériah amû rouleau ni, lo gue na ni na ala.
15 Ala tene na lo: “Mo duti, mo diko ni na e na kota go.” Tongaso, Baruch adiko ni na ala.
16 Gï so ala ma atënë ni so kue awe, ala bâ lê ti terê, mbeto ahon ndö ti ala, na ala tene na Baruch: “E doit ti fa peko ti atënë so kue na gbia.”
17 Ala hunda Baruch, ala tene: “Tene na e si, mo sara tongana nyen la si mo sû atënë so kue so? Jérémie la asara atënë ni si mo sû na mbeti so?”
18 Baruch atene na ala: “Lo la lo sara atënë ni so kue na mbi, si mbi mû encre mbi sû na ni na yâ ti rouleau* so.”
19 Amokonzi ni atene na Baruch: “Mo gue, mo honde terê ti mo, mo na Jérémie, zia zo oko ahinga ndo so ala yeke dä pëpe.”+
20 Na pekoni, ala gue ti bâ gbia ni, ala gue na yâ ti gbagba ni, na ala zia rouleau ni na yâ ti kubu ti Élishama, so ayeke wakuasu, na ala fa na gbia ni peko ti atënë kue so ala mä.
21 Tongaso, gbia ni atokua Jéhudi+ ti mû rouleau ni. Lo gue lo mû ni na yâ ti kubu ti wakuasu Élishama lo ga na ni. Jéhudi akomanse ti diko ni na mê ti gbia ni nga na mê ti amokonzi ni kue so aluti na terê ti gbia ni.
22 Gbia ni ayeke duti na yâ ti da so a leke ni ndali ti ngoi ti dê, a yeke na nze gumbaya ni,* na wâ ayeke na yâ ti ganune na devant ti lo.
23 Tongana Jéhudi adiko molongo ti atënë ota wala osio tongaso awe, gbia ni amû zembe ti wakuasu ni, lo suru yâ ti ambage ni so Jéhudi adiko so na lo bi ni na lê ti wâ so ayeke na yâ ti ganune ni, lo sara tongaso juska rouleau ni ahunzi kue na yâ ti wâ ti ganune ni.
24 Atâa gbia ni, wala azo ti kua ti lo kue so amä atënë kue so a diko na mê ti ala so, ala sara mbeto pëpe nga ala suru bongo na terê ti ala pëpe.
25 Atâa so Elnathan,+ Délaïah+ na Guémariah+ avoro yanga na gbia ni ti gbi rouleau ni so pëpe, lo mä ala pëpe.
26 Me gbia ni amû yanga na Jérahméel molenge ti gbia, na Séraïah molenge ti Azriel nga na Shélémiah molenge ti Abdéel ti tene ala gbu Baruch so ayeke wakuasu nga na prophète Jérémie. Ye oko, Jéhovah ahonde ala awe.+
27 Na peko ti so gbia ni agbi rouleau so na yâ ni a yeke wara atënë so Jérémie atene lani na Baruch si Baruch asû ni dä so, Jéhovah akiri asara tënë na Jérémie,+ lo tene:
28 “Mo mû mbeni rouleau ni nde, mo sû na yâ ni atënë kue so ayeke lani na yâ ti kozo rouleau ni so si Jéhoïakim gbia ti Juda agbi ni so.+
29 Mo sara tënë na ndö ti Jéhoïakim gbia ti Juda, mo tene: ‘Bâ tënë so Jéhovah atene la: “Mo gbi rouleau so awe na mo tene: ‘Ngbanga ti nyen la mo sû tënë so na yâ ti rouleau so, mo tene: “Biani, gbia ti Babylone ayeke ga ande ti futi kodro so na lo yeke sara si zo wala nyama angbâ na yâ ni ape”?’+
30 Tongaso, bâ tënë so Jéhovah atene na ndö ti Jéhoïakim gbia ti Juda la: ‘Mbeni hale ti lo ayeke duti ande pëpe na ndö ti trône ti David.+ Kuâ ti lo ayeke lango na gigi na lê ti lâ na kota lâ, nga na yâ ti dê na bï.+
31 Mbi yeke fâ ande ngbanga na ndö ti lo, na ndö ti ahale ti lo nga na ndö ti azo ti kua ti lo ndali ti asioni so ala sara. Mbi yeke ga ande na aye ti vundu so kue na ndö ti azo ti kodro ti Jérusalem nga na ndö ti azo ti Juda, aye ti vundu so mbi sara tënë ni na terê ti ala,+ me ala ke ti mä mbi.’”’”+
32 Tongaso, Jérémie amû mbeni rouleau ni nde lo mû na Baruch, molenge ti Nériah, so ayeke wakuasu.+ Jérémie atene peko ti atënë ni na lo, na lo sû atënë ni kue na yâ ti rouleau ni, atënë ti yâ ti rouleau so Jéhoïakim, gbia ti Juda, agbi ni so.+ Lo sû nga ambeni tënë mingi dä so akpa ati kozo rouleau ni so.
Akete tënë na terê ni
^ Na Hébreu: “rouleau ti buku.”
^ Wala “rouleau ti buku.”
^ Wala “buku.”
^ Wala “buku.”
^ Wala “ndo ti tengo kobe.”
^ Wala “wakuasu.”
^ Wala “buku.”
^ Wala “yangbo.”
^ Wala “buku.”
^ Wala “buku.”
^ A londo na use ndambo ti nze ti novembre ti si na kozo ndambo ti nze ti décembre. Bâ na B15.
