Jérémie 41:1-18
41 Na nze mbasambala ni, Ismaël,+ mbeni hale ti gbia* nga mbeni kota zo ti kua ti gbia so ayeke molenge ti Néthaniah molenge ti Élishama, amû ambeni koli bale-oko na terê ti lo. Ala gue na ndo ti Guédaliah molenge ti Ahicam, na gbata ti Mizpah.+ Na ngoi so ala kue ayeke te kobe na Mizpah,
2 Ismaël molenge ti Néthaniah na akoli bale-oko so ayeke na terê ti lo alondo ala fâ Guédaliah molenge ti Ahicam, âta ti Shaphan, na épée. Tongaso ala fâ zo so gbia ti Babylone azia lo ti bâ ndo na ndö ti kodro ni so.
3 Ismaël afâ nga aJuif kue so ayeke na terê ti Guédaliah na Mizpah, lo fâ nga aturugu ti Chaldée so ayeke kâ.
4 Nduru na lango use na peko ti so a fâ Guédaliah, na ngoi so zo oko ade ti hinga tënë ni pëpe,
5 ambeni koli 80 alondo na Sichem,+ na Shilo+ nga na Samarie ala ga.+ Ala kio kuä ti yanga ti ala, ala suru abongo na terê ti ala, ala fâ terê ti ala na kä,+ ala mû asandaga ti lê ti kobe nga na vuru dukane+ ti ga na ni na da ti Jéhovah.
6 Tongaso Ismaël molenge ti Néthaniah alondo na Mizpah ti gue ti tingbi na ala. Na toto na yanga ti lo, lo yeke tambela ti gue na devant ti ala. Na ngoi so lo tingbi na ala, lo tene na ala: “Ala ga e gue na ndo ti Guédaliah molenge ti Ahicam.”
7 Me tongana ala lï na yâ ti gbata ni, Ismaël molenge ti Néthaniah na azo ti lo afâ ala na ala bi kuâ ti ala na yâ ti dû so a bata ngu dä.
8 Me akoli bale-oko na popo ti azo ni so atene na Ismaël: “Mo fâ e pëpe, ndali ti so e yeke na ambeni kobe so e honde ni na yaka: blé, orge, mafuta nga na mafuta ti otoro.” Tongaso, lo zia ti fâ ala legeoko na aita ti ala.
9 Ismaël abi kuâ ti ala kue so lo fâ ala so na yâ ti mbeni kota dû so a bata ngu dä, dû so Gbia Asa azi ni lani na ndembe so Baasha, gbia ti Israël, aga ti sara bira na lo.+ A yeke dû ni so la si Ismaël molenge ti Néthaniah abi kuâ ti akoli so lo fâ ala so na yâ ni asi.
10 Ismaël amû tanga ti azo ti Mizpah,+ so na popo ti ala a yeke wara amolenge-wali ti gbia ni nga na azo ti Mizpah kue, ala so Nébuzaradan mokonzi ti agarde azia ala na maboko ti Guédaliah+ molenge ti Ahicam. Ismaël molenge ti Néthaniah agbu ala na ngbâa, lo mû lege ti gue na kodro ti azo ti Ammon.+
11 Tongana Johanan+ molenge ti Caréah nga na amokonzi kue ti aturugu so ayeke na terê ti lo amä tënë ti aye ti sioni kue so Ismaël molenge ti Néthaniah asara,
12 ala mû akoli ni kue na terê ti ala na ala gue ti sara bira na Ismaël molenge ti Néthaniah. Ala wara lo na terê ti kota ngu so ayeke na Gabaon.
13 Na ngoi so azo ni kue so Ismaël agbu ala na ngbâa abâ Johanan molenge ti Caréah nga na amokonzi kue ti aturugu so ayeke na terê ti lo, terê ti ala anzere.
14 Tongaso, azo ni kue so Ismaël agbu ala na ngbâa na gbata ti Mizpah+ atourné ala mû peko ti Johanan molenge ti Caréah.
15 Me Ismaël molenge ti Néthaniah na ambeni zo ti lo miombe akpe na maboko ti Johanan na ala gue na mbage ti azo ti mara ti Ammon.
16 Johanan molenge ti Caréah nga na amokonzi kue ti aturugu ni so ayeke na terê ti lo amû tanga ti azo ti gbata ti Mizpah, ala so lo zi ala na maboko ti Ismaël na peko ti so Ismaël afâ Guédaliah+ molenge ti Ahicam so. Ala mû akoli ni, aturugu ni, awali ni, amolenge nga na akota zo ti yangbo ti gbia ni na Gabaon, ala kiri na ala.
17 Tongaso, ala gue ala duti na ndo ti lango so ayeke na Kimham nduru na Bethléhem,+ na ala ye ti gue na Égypte+
18 ngbanga ti azo ti Chaldée, ndali ti so mbeto ti azo ti Chaldée ni asara ala, na peko ti so Ismaël molenge ti Néthaniah afâ Guédaliah molenge ti Ahicam, lo so gbia ti Babylone azia lo ti bâ ndo na ndö ti kodro ni.+
Akete tënë na terê ni
^ Na Hébreu: “ngongoa ti royaume.”
