Jérémie 44:1-30
44 Nzapa asara tënë so na Jérémie na ndö ti aJuif so ayeke sara kodro na sese ti Égypte,+ ala so ayeke sara kodro na Migdol,+ na Tahpanès,+ na Noph*+ nga na sese ti Pathros,+ lo tene:
2 “Bâ tënë so Jéhovah ti aturugu, Nzapa ti Israël, atene la: ‘Ala bâ aye ti vundu kue so mbi ga na ni lani na ndö ti Jérusalem+ nga na ndö ti agbata ti Juda kue, na laso akodro so abuba kue awe nga azo ayeke sara kodro na yâ ni pëpe.+
3 A yeke ndali ti so azo ti kodro ni asara lani aye ti sioni so azia ngonzo na bê ti mbi na lege so ala gue ala mû asandaga na ambeni nzapa nde+ nga ala voro anzapa ni so, anzapa so atâa ala wala akotara ti ala ahinga ni ândö pëpe.+
4 Mbi ngbâ lakue ti tokua awakua ti mbi aprophète na ala, mbi tokua ala fani mingi,* mbi tene: “Ala sara pëpe ye ti sioni so bê ti mbi ake ni.”+
5 Me ala mä ndo pëpe nga ala dengi mê ti ala pëpe ti mä mbi si ala ke ye ti sioni so ala yeke sara, ti zia ti mû asandaga na ambeni nzapa nde.+
6 Ni la mbi tuku kota ngonzo ti mbi na ndö ti ala, na a yeke gbi na yâ ti agbata ti Juda nga na ndö ti alege ti yâ ti Jérusalem, si agbata ni aga ando so abuba kue awe nga mbeni benyama tongana ti laso so.’+
7 “Fadeso, bâ tënë so Jéhovah ti aturugu, Nzapa ti Israël, atene la: ‘Ngbanga ti nyen la ala wani* ayeke sara ti tene kota ye ti vundu aga na ndö ti ala? Ti tene akoli, awali, akete molenge nga na abébé akui kue na Juda, na tanga ti ala angbâa pëpe so?
8 Ngbanga ti nyen la si ala yeke son bê ti mbi na akusala ti maboko ti ala, na lege so ala yeke sara asandaga na ambeni nzapa nde na kodro ti Égypte, ndo so ala yeke sara kodro dä so? Ala yeke kui ande nga ala yeke ga mbeni ye so a deba ni awe, mbeni ye ti kamene na popo ti azo ti amara kue ti sese.+
9 Eskê aye ti sioni so akotara ti ala asara lani, na so agbia ti Juda+ nga na awali ti ala+ asara so, ala girisa ni awe? Eskê aye ti sioni so ala wani ala sara nga awali ti ala+ asara na yâ ti gbata ti Juda nga na ndö ti alege ti Jérusalem so, ala girisa ni awe?
10 Juska laso ade ala sara terê ti ala kete pëpe,* ala fa pëpe so mbeto asara ala+ na ala yeke sara ye alingbi na andia ti mbi pëpe nga na ambela ti mbi so mbi zia na gbele ala na akotara ti ala.’+
11 “Ni la, Jéhovah ti aturugu, Nzapa ti Israël, atene: ‘Bâ, mbi leke na bê ti mbi awe ti ga na ye ti vundu na ndö ti ala, ti futi azo ti Juda kue.
12 Mbi yeke mû tanga ti azo ti Juda so aleke na bê ti ala lani awe ti gue na kodro ti Égypte ti sara kodro kâ so, na ala kue ayeke kui na kodro ti Égypte.+ Ala yeke kui ande na lege ti épée, na lege ti kota nzara. Ti londo na asenge zo ti si na akota zo na popo ti ala, ala yeke kui ande na lege ti épée nga na kota nzara. Ala yeke ga ande mbeni ye so a deba ni awe, mbeni ye so tongana zo abâ ni ande, li ti lo ayeke kpe kue; ala yeke ga mbeni ye ti dengo bä, nga mbeni ye ti kamene.+
13 Mbi yeke punir ala so ague asara kodro na Égypte so legeoko tongana ti so mbi punir Jérusalem lani na épée, na kota nzara nga na sioni kobela so amû ndo.+
14 Tongaso, tanga ti azo ti Juda so angbâ si ala gue ala sara kodro na Égypte so, ala yeke kpe pëpe nga ala yeke sö kuâ pëpe ti kiri na kodro ti Juda. Ala yeke toto ande ti kiri ti sara kodro na Juda, me ala yeke kiri ande pëpe; gï ambeni oko oko so akpe la ayeke kiri.’”
15 Akoli kue so ahinga atene awali ti ala ayeke sara asandaga na ambeni nzapa nde, nga awali ti akoli kue so ayeke luti ge so, so abungbi gbani gbani na ndo so, na azo ni kue so asara kodro na Égypte+ nga na Pathros+ so, atene na Jérémie:
16 “Atënë so mo tene na e na iri ti Jéhovah so, e yeke mä ni pëpe.
17 Me, e yeke sara ye biani alingbi na atënë oko oko kue so asigi na yanga ti e, e yeke yâa sandaga na Gbia-wali ti yayu* nga e yeke tuku asandaga ti sämba na lo,+ gï tongana ti so e na akotara ti e, agbia ti e nga na amokonzi ti e, e sara lani na yâ ti gbata ti Juda, na ndö ti alege ti Jérusalem na ngoi so e yeke te lani kobe yâ ti e asi nga e duti nzoni, na ye ti sioni oko asi na e pëpe so.
18 Ti londo na ngoi so e zia lege ti yango asandaga na Gbia-wali ti yayu* nga e zia lege ti tukungo asandaga ti sämba na lo, ye kue atia e na e kui na lege ti épée nga na lege ti kota nzara.”
19 Awali ni atene: “So lani si e yeke yâa asandaga na Gbia-wali ti yayu,* si e yeke sara agâteau so ayeke ronde ronde na so akpa image ti nzapa-wali ni nga si e yeke tuku asandaga ti sämba na lo so, eskê akoli ti e ayeda na ni ape?”
20 Tongaso, Jérémie atene na azo ni kue, akoli na awali ti ala nga na azo kue so ayeke sara tënë na lo, lo tene:
21 “Asandaga so, ala na akotara ti ala, agbia ti ala, amokonzi ti ala nga na azo ti kodro ni ayeke yâa ni lani na yâ ti agbata ti Juda nga na ndö ti alege ti Jérusalem so,+ Jéhovah adabe ti lo na ni awe, na bê ti lo atï dä.
22 Na ndani, Jéhovah alingbi pëpe ti ngbâ ti kanga bê ti lo ndali ti aye ti sioni so ala sara nga na aye ti sioni so ala sara si zo alingbi ti bâ ni na lê ti lo fani use pëpe so. Ndani la kodro ti ala aga mbeni ndo so abuba kue awe, mbeni ye so amû mbeto na zo, mbeni ye ti dengo bä, mbeni kodro so azo ayeke na yâ ni pëpe tongana ti laso so.+
23 A yeke ndali ti so ala yâa lani asandaga so, nga ndali ti so ala sara siokpari na terê ti Jéhovah na lege so ala mä yanga ti Jéhovah pëpe, ala sara ye alingbi na andia ti lo pëpe nga na ambela ti lo so lo mû nga na awango ti lo, ndani la si ye ti vundu so aga na ndö ti ala tongana ti laso so.”+
24 Jérémie akiri atene na azo ni kue nga na awali ni kue, lo tene: “Ala azo ti Juda kue so ayeke na kodro ti Égypte, ala mä tënë so Jéhovah atene.
25 Bâ tënë so Jéhovah ti aturugu, Nzapa ti Israël, atene la: ‘Tënë so ala na awali ti ala atene na yanga ti ala so, ni la ala sara ni awe so, ndali ti so ala tene lani atene: “E yeke sara ye ande biani alingbi na zendo so e mû ti tene e yâa asandaga na Gbia-wali ti yayu* nga ti tene e tuku na lo asandaga ti sämba.”+ Ala, awali so ala mû zendo awe so, ala yeke sara ande ye ni biani, ala yeke sara ye alingbi na yanga so ala mû so.’
26 “Ni la, ala azo ti Juda kue so asara kodro na Égypte so, ala mä tënë so Jéhovah atene: ‘“Bâ, mbi deba terê ti mbi na iri ti mbi wani,” tënë ti yanga ti Jéhovah la, “na yâ ti kodro ti Égypte kue, mbeni zo ti Juda+ ayeke mû iri ti mbi pëpe ti deba na ni, atene: ‘Ti tâ tënë ni so Jéhovah, Seigneur ti dunia kue, ayeke na fini!’+
27 Ti fadeso mbi yeke bâ ndo na ndö ti ala ti ga na ye ti vundu na ndö ti ala, me ye ti nzoni pëpe.+ Akoli ti kodro ti Juda kue so ayeke na kodro ti Égypte ayeke kui ande na lege ti épée nga na lege ti kota nzara juska ala hunzi kue.+
28 Gï ambeni oko oko la ayeke sö kuâ na lê ti épée na ala yeke londo na Égypte ti kiri na kodro ti Juda.+ Me tanga ti azo ti Juda kue so angbâ si ague asara kodro na Égypte kâ so, ala yeke hinga ande wala tënë ti zo wa la aga tâ tënë; tënë ti mbi wala tënë ti ala.”’”
29 “Jéhovah atene: ‘Bâ ye so ala yeke hinga na ni la, mbi yeke punir ala ande na ndo so, si ala hinga atene zendo so mbi mû ti ga na ye ti vundu na ndö ti ala so ayeke ga ande tâ tënë biani.
30 Jéhovah atene: “Bâ, gï tongana ti so mbi zia lani Sédécias, gbia ti Juda na maboko ti Nébucadnezzar* gbia ti Babylone, so ayeke lani wato ti lo si ayeke gi lege lani ti fâ lo* so, mbi yeke zia nga Pharaon Hophra, gbia ti Égypte, na maboko ti awato ti lo nga na maboko ti azo so ayeke gi lege ti fâ lo.”’”*+
Akete tënë na terê ni
^ Wala “Memphis.”
^ Na Hébreu: “lango oko oko mbi londo hio na ndapre, mbi yeke tokua ala.”
^ Wala “a-âme ti ala.”
^ Wala “vundu ade agbu ala pëpe.”
^ Iri so a mû na mbeni nzapa-wali so azo ti Israël so ake Nzapa awe ayeke voro lo lani. Âmanke mbeni nzapa so azo abâ lo atene lo yeke nzapa so ayeke sara si azo adü gbani.
^ Iri so a mû na mbeni nzapa-wali so azo ti Israël so ake Nzapa awe ayeke voro lo lani. Âmanke mbeni nzapa so azo abâ lo atene lo yeke nzapa so ayeke sara si azo adü gbani.
^ Iri so a mû na mbeni nzapa-wali so azo ti Israël so ake Nzapa awe ayeke voro lo lani. Âmanke mbeni nzapa so azo abâ lo atene lo yeke nzapa so ayeke sara si azo adü gbani.
^ Iri so a mû na mbeni nzapa-wali so azo ti Israël so ake Nzapa awe ayeke voro lo lani. Âmanke mbeni nzapa so azo abâ lo atene lo yeke nzapa so ayeke sara si azo adü gbani.
^ Na Hébreu: “Nébucadrezzar,” so mbeni lege ti di iri ni so la.
^ Wala “so ayeke gi âme ti lo.”
^ Wala “so ayeke gi âme ti lo.”
