Jérémie 48:1-47
-
Prophétie na terê ti Moab (1-47)
48 Ti Moab,+ bâ tënë so Jéhovah ti aturugu, Nzapa ti Israël, atene la:
“Mawa na Nébo,+ ndali ti so a futi lo awe!
A bi kamene na lê ti Kiriathaïm+ na a mû lo awe.
A bi kamene na ndö ti ndo ti batango terê ni, na a kungbi ndo ni na sese awe.+
2 A gonda kodro ti Moab encore ape.
A leke tënë na terê ti Hesbon+ ti sara lo sioni, a tene:
‘Ala ga, zia e futi lo si lo ngbâ mara mbeni pëpe.’
Ala azo ti Madmen nga kue, ala duti kpô,ngbanga ti so épée angbâ ti mû peko ti ala.
3 A mä dekongo ti azo so alondo na Horonaïm,+a yeke futi kodro ni nga a yeke buba aye ti yâ ni kue.
4 A kungbi kodro ti Moab na sese awe.
Akete molenge ti lo adekongo.
5 Na ndö ti lege so amonté na Luhith, ala yeke toto na ngoi so ala yeke monté ti gue.
Na ndö ti lege so adescend na Horonaïm, ala mä dekongo ti vundu ndali ti kodro ni so abuba kue awe.+
6 Ala kpe, ala kpe ti bata fini* ti ala!
Ala yeke ga tongana keke ti genévrier na benyama.
7 Ndali ti so mo zia bê ti mo na ndö ti akua ti mo nga na ndö ti amosoro ti mo,a yeke gbu mo nga.
A yeke gbu Kémosh+ a yeke gue na lo na kodro-wande,a yeke gue na lo legeoko na aprêtre ti lo nga na amokonzi ti lo.
8 Zo so ayeke futi ala ayeke ga ande na ndö ti gbata oko oko kue,mbeni gbata oko ayeke ngbâ senge pëpe.+
A yeke futi popo-hoto* ni ande,A yeke futi kpangbala ndo ni biani biani, gï tongana ti so Jéhovah atene.
9 Ala zia mbeni ye ti fa lege ndali ti Moab,ndali ti so na ngoi so agbata ti lo ayeke buba kue, azo ti lo ayeke kpe,agbata ti lo ayeke ga ande mbeni ye so amû mbeto na zo,zo oko ayeke sara kodro na yâ ni pëpe.+
10 Deba aga na ndö ti zo so Jéhovah atokua lo si lo gue lo sara kua ni na mbana!
Deba aga na li ti zo so ake ti tene épée ti lo atuku mênë.
11 Ngbene ye so azo ti Moab ade kete, a zia ala kpô,tongana vin so a zia ni angbâ na ndö ti saka ni.
Ala yeke tongana vin so a tuku ni na yâ ti mbeni ta nde pëpe,na a gbu ala a gue na ala na mbeni kodro-wande lâ oko pëpe.
Ndani la si nzerengo ti ala angbâ na terê ti ala,na fion ti ala achangé ape so.
12 “Jéhovah atene: ‘Bâ alango ayeke ga, mbi yeke tokua azo ti kuku ala na sese tongana ta so a kuku yanga ni na sese. Azo ni ayeke kuku yanga ti ta ni na sese na ala yeke tuku ye so ayeke na yâ ti ta ni si yâ ti ta ni angbâ senge, nga azo ni ayeke fâ yâ ti akota ta ti ala ti sese kete kete.
13 Kamene ayeke gbu lê ti azo ti Moab ndali ti Kémosh, gï tongana ti so kamene agbu lê ti azo ti Israël ndali ti Béthel, kodro so ala zia bê ti ala lani kue na ndö ni.+
14 Ngbanga ti nyen la si ala sara mvene, ala tene: “E yeke angangu zo ti bira, e yeke nduru ti sara bira so”?+
15 ‘A futi Moab awe,a mû agbata ti lo kue awe,+amaseka-koli ni so ayeke pendere mingi so, a fâ ala awe.’+
Tënë so Gbia, lo so iri ti lo ayeke Jéhovah ti aturugu, atene la.+
16 Ye ti vundu so ayeke ga na ndö ti azo ti Moab ayeke si fafadeso,tingo ti ala ayeke ga nduru nduru.+
17 Azo kue so angoro ala ayeke sara mawa ti ala,azo kue so ahinga iri ti ala.
A tene na ala: ‘Azo-oo! Ala bâ tongana nyen la yâ ti ngangu keke so akungbi ma! Pendere keke so!’
18 Mo, molenge-wali ti kodro ti Dibon,+dö lege ti gloire ti mo, mo zia, mo duti na sese na nzara ti ngu ahon ndö ti mo,*ngbanga ti so zo so afuti kodro ti Moab ayeke ga na terê ti mo,lo yeke futi ande agbata ti mo so ayeke na yâ ti ngangu gbagba.+
19 Mo zo ti kodro ti Aroër,+ mo luti na terê ti lege mo bâ ndo.
Hunda koli so ayeke kpe ti hon nga wali so ayeke kpe ti sö kuâ, mo tene: ‘Nyen la apassé nyen?’
20 A zia kamene na lê ti Moab na a sara si mbeto ahon ndö ti lo.
Ala toto na vundu nga ala dekongo ngangu.
Ala to mbela na kodro ti Arnon+ ala tene so a futi kodro ti Moab awe.
21 “Ngbanga atï na ndö ti kpangbala ndo,+ na ndö ti Holon, Jahaz+ nga na Méphaath;+
22 na ndö ti Dibon,+ Nébo+ nga na Beth-Diblathaïm.
23 A yeke tï na ndö ti Kiriathaïm,+ Beth-Gamul nga na Beth-Méon;+
24 a yeke tï nga na ndö ti Kérioth+ na Bozrah nga na agbata kue ti sese ti Moab, agbata so ayeke yongoro kâ nga na ala so ayeke nduru ge.
25 ‘A fâ yâ ti ngangu* ti Moab awe;na a kungbi yâ ti maboko ti lo,’ tënë ti yanga ti Jéhovah la.
26 ‘Ala sara si lo nyon sämba lo soulé,+ ndali ti so lo bâ terê ti lo wani kota ti ke Jéhovah.+
Moab akpaka terê ti lo na yâ ti dengo ti lo,lo ga mbeni ye so azo ahe ni hengo.
27 Mo nga mo he lani Israël ape?+
Eskê a wara lo na popo ti azo ti nzi?
si mo yeke yengi li ti mo ti sara sioni tënë na terê ti lo so?
28 Ala azo ti kodro ti Moab, ala sigi na yâ ti agbata ni ala sara kodro na ndö ti kota tênë,ala ga tongana kolokoto so asara da ti lo na terê ti ayanga ti kota dû.’”
29 “E mä tënë ti pikango kate ti Moab, fandara ti lo ahon ndö ni,e mä tënë ti wuma ti lo, ti baba ti lo, ti fandara ti lo nga so lo bâ terê ti lo kota ahon azo kue.”+
30 “Jéhovah atene: ‘Mbi hinga kota ngonzo ti lo.
Me asenge tënë so lo tene so ayeke ngbâ ande gï senge.
Ala yeke sara ande ye oko pëpe.
31 Ndani la mbi yeke toto na vundu na ndö ti Moab,mbi yeke dekongo ngbanga ti azo ti Moab kue,mbi yeke dema terê ti mbi ndali ti azo ti Kir-Hérès.+
32 Mbi yeke toto mingi ande na ndö ti mo, vigne ti Sibmah,+ahon toto so mbi yeke toto ndali ti Jazer.+
Afini maboko ti mo so asigi ague afâ ngu-ingo.
A si na ngu-ingo, a si na Jazer.
Zo so ayeke futi ye agana terê ti alê ti keke ti mo ti ngoi ti ndowa nga na terê ti alê ti keke ti mo so a ko ni awe.+
33 A mä pëpe dekongo ti ngia na yâ ti ayaka ti akeke so a yeke te lê ni,a mä ni nga pëpe na kodro ti Moab.+
Mbi yeke sara si vin asigi encore ape na yâ ti dû ti sarango na vin.
A yeke mä pëpe dekongo ti ngia ti azo so ayeke pete angu ti lê ti vigne.
Dekongo ni so ayeke duti mbeni dekongo so ayeke nde.’”+
34 “‘A mä dekongo so alondo na Hesbon+ juska na Éléaléh.+
Ala dekongo, na go ti ala atoto juska na Jahaz,+a londo na Zoar asi na Horonaïm,+ a si nga na Églath-Shélishiyah.
Même angu ti Nimrim ayeke hule kue.’+
35 Jéhovah atene: ‘Mbi yeke sara si a bâ na Moab encore apezo so ayeke yâa sandaga na ando so ayeke na nduzu,nga zo so ayeke yâa asandaga na nzapa ti lo.
36 Ndani la, bê ti mbi ayeke dema na vundu* ndali ti Moab tongana totongo ti flûte,*+bê ti mbi ayeke dema na vundu* ndali ti azo ti Kir-Hérès tongana totongo ti flûte.*
Ngbanga ti so amosoro so lo wara ayeke girisa ande.
37 Ndali ti so a kpaka kuä ti li ti azo kue,+na a fâ kuä ti yanga ti azo kue.
A suru terê ti amaboko ti azo kue na akä,+na ala kanga bongo ti vundu na ngbonda ti ala.’”+
38 “‘Na li ti ada ti Moab,nga na ando ti gbata ni so azo ayeke gue ka dä mingi,a yeke mä mbeni ye nde pëpe gï toto ti demango terê.
Ndali ti so mbi fâ yâ ti Moab awe,tongana ti so zo afâ yâ ti ta ti sese so lo ke ni,’ tënë ti yanga ti Jéhovah la.
39 ‘Ala bâ tongana nyen la mbeto ahon ndö ti lo ma! Ala toto na vundu!
Ala bâ tongana nyen la Moab atourné peko ti lo na kamene so ma!
Moab aga mbeni ye so azo ayeke he ni hengo,lo ga mbeni ye so asara mbeto na azo kue so ayeke nduru na lo.’”
40 “Bâ tënë so Jéhovah atene la:
‘Ala bâ, legeoko tongana aigle so ayeke descend ti gbu mbeni nyama,+wato ayeke zi yâ ti akpangbi ti lo na ndö ti Moab ti gbu lo.+
41 A yeke gbu ande agbata ni,a yeke gbu angangu gbagba ti lo.
Na ngoi ni so, bê ti angangu zo ti bira ti Moabayeke ga tongana bê ti mbeni wali so angbâ ti dü molenge.’”
42 “‘A yeke futi ande Moab, lo yeke ngbâ mara encore ape,+ndali ti so lo bâ terê ti lo wani kota ti ke Jéhovah.+
43 Ala azo ti kodro ti Moab,mbeto na dû nga na kûkû ayeke na devant ti ala,’ tënë ti yanga ti Jéhovah la.
44 ‘Zo kue so akpe ye so amû kota mbeto so, lo yeke tï ande na yâ ti dû ni,na zo kue so asigi na yâ ti dû ni, lo yeke tï na yâ ti kûkû ni.’
‘Ndali ti so mbi yeke sara si ngu so a yeke punir ande Moab na yâ ni aga na ndö ti lo,’ tënë ti yanga ti Jéhovah la.
45 ‘Azo so akpe aluti na gbe ti dê ti Hesbon, ngangu ti ala ahunzi.
Ndali ti so mbeni wâ ayeke sigi ande na yâ ti Hesbon,na mbeni wâ so aza ngangu ayeke londo na yâ ti Sihon ti sigi.+
Wâ ni ayeke gbi ande devant ti li ti Moab,wâ ni ayeke gbi nga bio ti li ti amolenge so asara wuluwulu.’+
46 ‘Mawa na mo, Moab!
A futi azo ti Kémosh+ awe.
Ndali ti so a gbu amolenge ti mo ti koli na ngbâa awe,a gbu nga amolenge ti mo ti wali a gue na ala na kodro-wande.+
47 Me na alango ti nda ni, mbi yeke mû azo ti Moab so a gue na ala na ngbâa ti bungbi ala ndo oko,’ tënë ti yanga ti Jéhovah la.
‘A yeke na ndö ti tënë so la ngbanga so a fâ na ndö ti Moab ahunzi.’”+
Akete tënë na terê ni
^ Wala “âme.”
^ Wala “kpangbala ndo.”
^ A lingbi nga ti tene “mo duti na yâ ti kuru sese.”
^ Na Hébreu: “didi.”
^ Wala “mbi yeke dekongo ngangu.”
^ So ti tene flûte so a hûru ni na ngoi ti totongo kuâ.
^ Wala “mbi yeke dekongo ngangu.”
^ So ti tene flûte so a hûru ni na ngoi ti totongo kuâ.
