Jérémie 49:1-39
49 Ti azo ti mara ti Ammon,+ bâ tënë so Jéhovah atene la:
“Israël ayeke na amolenge-koli ape?
Israël ayeke na héritier ape?
Malcam+ amû sese ti Gad ngbanga ti nyen?+
Azo so ayeke voro lo asara kodro na yâ ti agbata ti Israël ngbanga ti nyen?”
2 “‘Ndani la, bâ alango ayeke ga,’ tënë ti yanga ti Jéhovah la,‘so mbi yeke sara si a mä dekongo ti azo so aye ti sara bira na Rabbah+ nga na azo ti mara ti Ammon.+
Lo yeke ga gbâ ti afango da,a yeke gbi agbata so ayeke na gbe ti Rabbah.’*
‘Israël ayeke mû kodro ti azo so amû lani kodro ti lo,’+ tënë ti yanga ti Jéhovah la.
3 ‘Hesbon mo toto na vundu, ndali ti so a futi Aï awe!
Ala, agbata so ayeke na gbe ti Rabbah, ala dekongo.
Ala yü bongo ti vundu.
Ala toto na vundu, ala tambela kirikiri na popo ti agbagba ti tênë,*ndali ti so a yeke mû ande Malcam ti gue na lo na kodro-wande,a yeke gue na lo legeoko na aprêtre ti lo nga na amokonzi ti lo.+
4 Mo molenge-wali so mo yeke be-ta-zo pëpe so, mo yeke pika kate ti mo ndali ti apopo-hoto* so ngbanga ti nyen?
Mo pika kate ti mo ndali ti kpangbala ndo so aye alë dä mingi* so ngbanga ti nyen?
Mo molenge-wali so mo zia bê ti mo na ndö ti amosoro ti mo,si mo tene: “Zo wa la ayeke ga ande ti sara bira na mbi zo wa?”’”
5 “Bâ tënë so Seigneur ti dunia kue, Jéhovah ti aturugu, atene la:
‘Mbi yeke sara si mbeni ye so amû kota mbeto na zo aga na ndö ti mo.
Ye ni ayeke londo na mbage ti azo kue so angoro mo.
A yeke kangbi ala kirikiri na ando nde nde kue, mbeni zo ti bungbi ande ala so akpe so ayeke dä pëpe.’”
6 “‘Me na pekoni, mbi yeke bungbi ande azo ti mara ti Ammon so a gbu ala na ngbâa so,’ tënë ti yanga ti Jéhovah la.”
7 Ti Édom, bâ tënë so Jéhovah ti aturugu atene la:
“Ndara ayeke na Téman+ encore ape?
Nzoni wango ahunzi na yanga ti azo ti hingango ndo awe?
Ndara ti ala afun awe?
8 Ala kpe, ala kiri na peko!
Ala azo ti Dedan,+ ala gue asara kodro na yâ ti adû so alï mingi.
Ngbanga ti so mbi yeke ga na ye ti vundu na ndö ti Ésaü,tongana ngoi ni alingbi awe ti tene mbi ga na terê ti lo.
9 Tongana azo ti kongo lê ti vigne aga na ndo ti mo,ala yeke zia ambeni lê ti vigne ni angbâ na peko ti ala na mo?
Tongana azo ti nzi alï na da ti mo na bï,ala yeke buba ye kue so ala ye ti buba ni.+
10 Me mbi yeke zi ande aye kue na terê ti Ésaü ti zia lo senge.
Mbi yeke fa ande ando so lo honde terê ti lo dä,si lo wara lege ti honde terê ti lo pëpe.
Amolenge ti lo, aita ti lo nga na avoizin ti lo, a yeke futi ala ande kue,+na lo yeke ngbâ encore ape.+
11 Amolenge ti mo so babâ ti ala ayeke dä pëpe so, dö ala mo zia,mbi yeke bata ala na fini,na awali-mua ti mo ayeke zia ande bê ti ala na ndö ti mbi.”
12 Ndani la, Jéhovah atene: “Bâ, so ala so a fâ ngbanga na li ti ala pëpe ti nyon kopo ni anyon ni so, si a yeke zia mo ngbâ senge tongaso, a punir mo ape? Ên-ën, a yeke zia mo ngbâ ande senge tongaso pëpe, a yeke punir mo, ndali ti so, ti mo, mo doit ti nyon ni.”+
13 “Ndali ti so mbi wani mbi deba yanga ti mbi, mbi tene,” tënë ti yanga ti Jéhovah la, “Bozrah ayeke ga mbeni ye so amû mbeto mingi na zo,+ mbeni ye ti kamene, mbeni ye so a deba ni awe; na agbata ti lo kue ayeke ga ande mbeni ndo so abuba kue awe kpu na kpu.”+
14 Mbi mä mbeni tënë so Jéhovah atene,a tokua mbeni zo na popo ti amara, ti tene zo ni atene:
“Ala bungbi terê ti ala ndo oko, na ala ga na ndö ti lo;ala leke terê ti ala ti sara bira.”+
15 “Bâ, ndali ti so mbi sara si mo ga mbeni senge ye na popo ti amara,azo ake mo.+
16 Jéhovah atene: “Ye ti mbeto so mo sara si aga so ahanda mo awe,so ti tene fandara ti bê ti mo,mo so mo lango na yâ ti adû ti kota tênë so,mo yeke na ndö ti hoto so ayo na nduzu mingi.
Atâa so mo sara da ti mo ayo na nduzu tongana da ti aigle,mbi yeke descend mo na sese.”
17 “A lingbi Édom aga mbeni ye so amû mbeto mingi na zo.+ Azo so ahon nduru na lo ayeke sara mbeto nga ala yeke hûru yanga ti ala na ndö ti lo ndali ti aye ti ngangu so asi na lo so.
18 Gï tongana ti so a futi lani Sodome na Gomorrhe nga na akete gbata so ayeke na terê ni,”+ Jéhovah atene: “Zo oko ayeke sara ande kodro kâ pëpe, nga zo oko ayeke duti ande kâ pëpe.+
19 “Bâ, legeoko tongana mbeni bamara+ so asigi na yâ ti gbako so aserré si ayeke na terê ti Ngu ti Jourdain, mbeni zo ayeke londo ande ti ga na terê ti ando ti tengo pere ti anyama so a bata ni nzoni, me mbi yeke sara si Édom akpe yongoro na sese ti lo. Mbi yeke soro mbeni zo ti zia lo na ndö ni. Ngbanga ti so zo wa la ayeke tongana mbi zo wa? Zo wa la alingbi ti gue na mbi na devant ti ngbanga zo wa? Berger wa la alingbi ti luti na devant ti mbi?+
20 Tongaso, azo, ala mä tënë ti ye so Jéhovah apensé ti sara na terê ti Édom nga tënë ti ye so lo bi bê ti lo ti sara na azo ti kodro ti Téman:+
Ti tâ tënë ni, a yeke gbu ande akete taba ti kundu ni ti hon na ni.
Ngbanga ti azo ti kodro so, lo yeke sara si ndo so akete taba so asara kodro dä aga mbeni ndo so abuba kue awe.+
21 Gï na mango totongo ti tingo ti ala, sese ayengi.
A mä mbeni dekongo.
A mä ni juska na Kota Ngu-Bengba.+
22 Bâ, legeoko tongana ti mbeni aigle so ayeke monté na adescend ti ga ti gbu mbeni nyama,+ mbeni zo ayeke ga,lo yeke zi ande yâ ti akpangbi* ti lo na ndö ti Bozrah+ ti gbu ni.
Na lango ni so, bê ti angangu zo ti bira ti Édomayeke ga tongana bê ti mbeni wali so angbâ ti dü molenge.”
23 Ti Damas:+
“A bi kamene na lê ti Hamath+ na Arpad awe,ngbanga ti so ala mä mbeni sioni sango.
Bê ti ala afun kue na mbeto.
Ngu-ingo alingbi ti duti kpô pëpe.
24 Ngangu ti Damas ahunzi awe.
Lo tourné ti kpe, me li ti lo aga kirikiri.
Vundu na pasi ahon ndö ti lo awe,legeoko tongana wali so angbâ ti dü molenge.
25 A sara tongana nyen la si ala dö lege ti gbata ti gloire so azia ape?
gbata so azia ngia na bê ti zo so.
26 Ti gbata so, amaseka-koli ni ayeke tï ti kui na ando so azo ayeke gue ka dä mingi,aturugu ni kue ayeke kui na lango ni so,” tënë ti yanga ti Jéhovah ti aturugu la.
27 “Mbi yeke bi wâ na terê ti gbagba ti Damas,na wâ ni ayeke gbi ande angangu tour ti Ben-Hadad.”+
28 Ti Kédar+ nga na aroyaume ti Hazor so gbia ti Babylone Nébucadnezzar* akungbi ni na sese, bâ tënë so Jéhovah atene la:
“Ala londo ala gue na Kédar,na ala futi amolenge-koli ti Est.
29 A yeke mû ande atente ti ala nga na ataba ti ala,a yeke mû abongo ti atente ti ala nga na anzoni ye ti ala.
A yeke mû ande achameau ti ala ti hon na ni,azo ayeke dekongo ande na li ti ala, atene: ‘Mbeto ayeke na ndo kue!’”
30 “Azo ti gbata ti Hazor! Ala kpe ala hon yongoro.
Ala gue ala honde terê ti ala na gbe ni kâ,” tënë so Jéhovah atene la.
“Ngbanga ti so Nébucadnezzar,* gbia ti Babylone, aleke terê ti lo awe ti sara sioni na ala,lo leke na bê ti lo ti sara mbeni ye na ala.”
31 Jéhovah atene: “Ala londo, ala gue na ndö ti mara so ayeke na siriri,mara so mbeni ye ti sara lo mbeto ayeke dä pëpe so.
Kodro so ayanga ti gbagba ni ayeke dä pëpe nga abarre ti kangango na ni ayeke dä oko pëpe so; azo ni aduti gï ala oko awe.
32 A yeke mû ande achameau ti ala a hon na ni,nga na gbâ ti anyama ti ala tongana aye so a gbu na peko ti bira.
Mbi yeke kangbi yâ ti ala kirikiri na ando nde nde kue,*azo so akpaka kuä ti li ti ala so ayeke nduru na terê ti lê ti ala so,+mbi yeke mû ye ti vundu na ando nde nde kue ti ga na ni na ndö ti ala,” tënë ti yanga ti Jéhovah la.
33 “Hazor ayeke ga ande ndo ti lango ti ambo ti ngonda,*mbeni ndo so abuba biani biani awe.
zo oko ayeke sara ande kodro kâ pëpe,nga zo oko ayeke duti ande kâ pëpe.”
34 Jéhovah asara tënë so na prophète Jérémie na ndö ti Élam,+ kete na peko ti so Sédécias,+ gbia ti Juda, akomanse ti komande, lo tene:
35 “Bâ tënë so Jéhovah ti aturugu atene la: ‘Mbi yeke fâ yâ ti kokora ti Élam,+ ye so ayeke mû ngangu na ala.*
36 Mbi yeke mû apupu na ambage osio ti sese ti ga na ni na ndö ti azo ti Élam, na mbi yeke kangbi ala kirikiri na ambage* osio so kue. Azo ti Élam so mbi kangbi ala kirikiri so, ala yeke gue na yâ ti akodro kue.’”
37 “Mbi yeke fâ yâ ti azo ti Élam kete kete na devant ti awato ti ala nga na devant ti azo so ayeke gi lege ti fâ ala,* na mbi yeke ga na ye ti vundu na ndö ti ala, mbi yeke ga nga na kota ngonzo ti mbi na ndö ti ala,” tënë ti yanga ti Jéhovah la. “Mbi yeke tokua épée na peko ti ala juska mbi futi ala kue.”
38 “Mbi yeke zia trône ti mbi na Élam,+ mbi yeke futi gbia ni nga na amokonzi ni,” tënë ti yanga ti Jéhovah la.
39 “Me na alango ti nda ni, mbi yeke mû azo ti Élam so a gue na ala na ngbâa ti bungbi ala ndo oko,” tënë ti yanga ti Jéhovah la.
Akete tënë na terê ni
^ Wala “so angoro Rabbah.”
^ Wala “agbagba ti batango ataba so a sara ni na tênë.”
^ Wala “akpangbala ndo.”
^ Na Hébreu: “aye ayeke sua dä.”
^ Wala “aile.”
^ Na Hébreu: “Nébucadrezzar,” so mbeni lege ti di iri ni so la.
^ Na Hébreu: “Nébucadrezzar,” so mbeni lege ti di iri ni so la.
^ Na Hébreu: “na apupu nde nde kue.”
^ Wala “achacal.”
^ Na Hébreu: “komansema ti ngangu ti ala.”
^ Na Hébreu: “apupu.”
^ Wala “âme ti ala.”
