Jérémie 6:1-30
6 Azo ti Benjamin, ala gi ndo ti honde terê ti ala dä, ala sigi na yâ ti Jérusalem.
Ala hûru didi+ na kodro ti Técoa;+ala za mbeni wâ so ayeke fa lege ti guengo na Beth-Hakkérem,ndali ti so ye ti vundu ayeke londo na mbage ti nord ti ga, kota ye ti vundu.+
2 Molenge-wali ti Sion akpa mbeni wali so ayeke tâ pendere, so aza zango.+
3 Aberger na anyama ti ala ayeke londo ti ga na terê ti lo.
Ala yeke lu atente ti ala angoro terê ti lo kue,+berger oko oko ayeke zia anyama ti lo ate pere na ndo ti lo wani.+
4 “Ala leke terê ti ala ti sara bira na Jérusalem.
Ala londo, zia e gue e sara bira na lo tâ na midi.”
“Mawa na e, ndali ti so lâ ayeke gue ti lï,na agbe ti dê ti lakui ayeke yo yongo.”
5 “Ala londo, zia e sara bira na lo na bï,zia e kungbi agbata ti lo so ayeke na yâ ti angangu gbagba so ayo na nduzu.”+
6 Ndali ti so Jéhovah ti aturugu atene:
“Ala fâ akeke na sese nga ala monté sese aga koto angoro Jérusalem.+
Jérusalem ayeke mbeni gbata so a doit ti dë ngbanga na ndö ti lo,gï sarango ye ti ngangu na zo la si ahon ndö ni na yâ ti gbata ni.+
7 Legeoko tongana dû so a zi ti bata ngu dä, so ayeke bata ngu si adë,Jérusalem nga ayeke bata sarango ye ti sioni ti lo adë.
A mä tënë ti sarango ye ti ngangu nga na futingo ye na yâ ti gbata ni;+lakue kobela nga na ye ti ngangu ayeke na gbele mbi.
8 Jérusalem, zia si a gboto mê ti mo, tongaso pëpe, mbi yeke* tourné peko na mo na mbi yeke bâ mo na sioni lê;+mbi yeke sara si mo ga mbeni kodro so abuba kue awe, so azo ayeke na yâ ni pëpe.”+
9 Bâ tënë so Jéhovah ti aturugu atene la:
“Ala yeke ko ande tanga ti azo ti Israël kue, tongana ti tanga ti alê ti vigne so angbâ na terê ti maboko ti keke ni.
Ala kiri ayôro maboko ti ala tongana ti so zo ayeke yôro maboko ti lo ti ko alê ti vigne na terê ti maboko ti keke ni.”
10 “Mbi yeke sara tënë na zo wa? Mbi yeke gboto mê ti zo wa?
Zo wa la ayeke mä mbi?
Bâ, mê ti ala akanga awe,* ni la ala lingbi ti mä ndo pëpe.+
Bâ, tënë ti yanga ti Jéhovah, ala zere ni zerengo;+tënë ni anzere na ala kete pëpe.
11 Tongaso, ngonzo so asara Jéhovah na terê ti ala ayeke kporo na yâ ti mbi,mbi fatigué awe ti bata ngonzo ni so.”+
“Tuku ngonzo ti mo na ndö ti amolenge so ayeke na ndö ti lege,+tuku ni na ndö ti amaseka-koli so abungbi ndo oko.
A yeke gbu ande ala kue, a gbu koli na wali ti lo,ambakoro nga na azo so ate gigi aninga mingi awe.+
12 A yeke mû da ti ala a mû na ambeni zo nde,a yeke mû ayaka ti ala na awali ti ala nga kue ti mû na ambeni zo nde.+
Ndali ti so mbi yeke yôro maboko ti mbi ti sara sioni na azo ti kodro ni,” tënë ti yanga ti Jéhovah la.
13 “Ngbanga ti so a londo na asenge zo ti si na akota zo, zo oko oko kue ayeke wara ye na lege ti likisi.+
Ti londo na aprophète ti si na aprêtre, zo oko oko kue ayeke sara ye ti nzi.+
14 Ala tara ti kaï vundu* ti azo ti mbi gï kete, ala yeke tene:
‘Siriri ayeke dä! Siriri ayeke dä!’
Andâ siriri oko ayeke dä pëpe.+
15 Aye ti sioni so ala sara so, eskê kamene asara ala la?
Kamene oko asara ala pëpe!
Ala hinga nga pëpe wala kamene ni ayeke sara ka zo tongana nyen!+
Ni la ala yeke tï ande na popo ti azo so atï ti ala awe.
Na ngoi so mbi yeke ga ti punir ala, ala yeke pika gere ti ala,” tënë ti yanga ti Jéhovah la.
16 Bâ tënë so Jéhovah atene la:
“Ala gue aluti na ndo so alege atingbi terê dä na ala bâ ndo.
Ala hunda azo na ndö ti tënë ti alege ti ândö,ala hunda azo ni ti hinga nzoni lege ni ayeke na ndo wa, na ala tambela na ndö ni,+tongaso ala wara lege ti wu terê ti ala.”*
Me ala tene: “E yeke tambela ande na ndö ti lege ni so pëpe.”+
17 “Mbi zia asinziri ti mbi na ndö ti ala,+ asinziri ni atene:
‘Ala dengi mê ti ala ti mä totongo ti didi!’”+
Me ala tene: “E yeke dengi mê ti e ti mä ni oko pëpe.”+
18 “Tongaso, ala amara, ala mä si!
Zia ala hinga ye so ayeke si andena azo ti Jérusalem.
19 Sese, mo mä si!
Mbi yeke ga na ye ti vundu na ndö ti azo so,+so ayeke lengo ti peko ti aye so ala gbu li ti ala dä la,ndali ti so ala dengi mê ti ala ti mä atënë ti mbi pëpe,na ala ke ndia* ti mbi awe.”
20 “Dukane so alondo na Shéba, so ala ga na ni na mbi so, mbi sara nyen na ni?
Asosongo so fion ni afun nzoni so, so ala mû na mbeni kodro yongoro kâ si aga na ni na mbi so, mbi sara nyen na ni?
Asandaga ti anyama so agbi kue na wâ, so ala mû ni na mbi, mbi yeda na ni pëpe,asandaga ti ala anzere na mbi pëpe.”+
21 Tongaso, bâ tënë so Jéhovah atene la:
“Bâ mbi yeke zia ambeni ye ti tene azo so apika gere ti ala dä,na ala yeke pika gere ti ala dä,ababâ na amolenge ayeke pika gere ti ala dä,voizin na kamarade ti lo ayeke pika gere ti ala dä,ala kue ayeke kui.”+
22 Bâ tënë so Jéhovah atene la:
“Bâ, ambeni zo alondo na kodro so ayeke na mbage ti nord ala yeke ga,mbeni kota mara ayeke londo ande na mbage ti sese yongoro kâ.+
23 Ala yeke gbu ande kokora na likongo.
Ala yeke sioni mingi, ala yeke bâ mawa ti zo pëpe.
Totongo ti go ti ala ayeke tongana totongo ti ngu-ingo,na ala yeke kpe na ambarata.+
Ala leke terê ti ala tongana zo so aleke terê ti lo ti sara bira, ti sara bira na mo, molenge-wali ti Sion.”
24 So e mä tënë ni so,e woko kue.*+
Vundu agbu e,vundu* ni ayeke tongana songo ti yâ ti wali so angbâ ti dü.+
25 Ala sigi ala gue na yaka pëpe,na ala fono na ndö ti lege pëpe.
Ndali ti so wato ni ayeke na épéeye ti mungo mbeto ayeke na ndo kue.
26 Molenge-wali ti azo ti kodro ti mbi,mo yü bongo ti vundu+ na mo kpaka terê ti mo na yâ ti mburu ti wâ.
Mo sara vundu tongana ti so zo ayeke sara vundu ndali ti oko molenge ti lo ti koli so akui, mo toto ngangu,+ndali ti so gï hio tongaso zo ti fango zo ayeke ga na ndö ti e.+
27 “Mbi sara si mo* ga zo so ayeke tö lor nga na argent ti zi saleté na terê ni, ndali ti so mo doit ti zi saleté na terê ti azo ti mbi,mo ga mbeni zo so ayeke gi nda ti aye nzoni mingi;mo doit ti zia lê ti mo na ndö ti ala, mo bâ ala mbilimbili ti bâ aye so ala yeke sara.
28 Ala kue ayeke azo so li ti ala akpengba mingi.+
ala yeke fono ti dü mvene na iri ti azo.+
Li ti ala akpengba tongana cuivre na wen.
Ala kue ayeke azo so sarango ye ti ala abuba awe.
29 A mû ye ti pengo na wâ ti ndao a hûru na wâ ngangu ti zi saleté na terê ti argent;ye ti pengo na wâ ni agbi me gï plomb la a wara na pekoni.+
A sara si wâ ni akiri aza ngangu, me ngangu kue so a sara angbâ gï senge senge.+
Ala so ayeke sioni so a zi ala na popo ti azo ni pëpe.
30 Azo ayeke iri ala ‘argent so a ke ni awe,’ndali ti so Jéhovah ake ala awe.”+
Akete tënë na terê ni
^ Wala “âme ti mbi ayeke.”
^ Na Hébreu: “a fâ mê ti ala na ganza pëpe.”
^ Wala “bio ti terê so akungbi.”
^ Wala “âme ti ala.”
^ Wala “fango ye.”
^ Na Hébreu: “songo ti dungo molenge.”
^ Na Hébreu: “maboko ti e awoko.”
^ So ti tene Jérémie.
