Jérémie 9:1-26
9 Aï! Tongana li ti mbi ayeke fade ngu,na lê ti mbi ayeke li ti ngu!+
Ka mbi toto bï na lândali ti azo ti mara ti mbi so a fâ ala.
2 Aï! Tongana fade mbi wara mbeni ndo ti lango ndali ti azo so ayeke hon hongo na yâ ti benyama!
Ka mbi yeke zia azo ti mara ti mbi ti hon ayo,ndali ti so ala kue ayeke gï azo ti gingo wali wala koli nde,+ala yeke mbeni bungbi ti azo so asara ye na handa.
3 Ala leke yanga ti ala tongana ti so zo ayeke gboto kokora ti pika ni;tënë ti mvene, wala ye so ayeke na lege ni pëpe, la amû ndo na yâ ti kodro ni.+
“Ala yeke sara gï ye ti sioni ti gue na ni,na ala bi bê ti ala na mbi pëpe,”+ tënë ti yanga ti Jéhovah la.
4 “Azo oko oko kue asara hange na mba,ala sara confiance même na aita ti ala pëpe.
Ndali ti so aita ti ala ni kue ayeke azo ti handango zo+na ala kue ayeke azo ti dungo mvene na iri ti mba.+
5 Ala oko oko kue ayeke handa amba ti ala,Zo oko ti tene tâ tënë ayeke dä pëpe.
Ala fa lege na yanga ti ala ti tene mvene.+
Ngangu ti ala ahunzi awe na sarango aye ti sioni.
6 Ala yeke duti gï na yâ ti mvene.
Ala yeke tene mvene na ala ke ti hinga mbi,” tënë ti yanga ti Jéhovah la.
7 Tongaso, Jéhovah ti aturugu atene:
“Mbi yeke tö ala si ala ga ngu ti tene ala ga nzoni-kue,+mbeni ye nde wa la mbi lingbi ti sara na molenge-wali ti azo ti mbi?
8 Yanga ti ala ayeke lê ti kokora so ayeke fâ zo na ayeke sara tënë ti handa.
Na yanga ti ala, ala yeke sara tënë ti siriri na amba ti ala,me na yâ ti bê ti ala kâ, ala leke ti sara sioni na amba ti ala.”
9 Jéhovah atene: “Mbi yeke hunda ande ala ndali ti aye so ala sara so ape?
Mbi wani mbi yeke* kiri ande peko ti sioni na mara tongaso ape?+
10 Fade mbi yeke toto na mbi dema terê ti mbi ndali ti ahoto.
Mbi yeke he bia ti vundu* ndali ti ando ti tengo apere ti anyama so ayeke na benyama,ngbanga ti so a gbi ni kue awe si zo alingbi ti hon dä pëpe,a mä go ti anyama kâ pëpe.
Andeke ti nduzu nga na anyama ti ngonda kue akpe awe, ala yeke dä pëpe.+
11 Mbi yeke sara ande si Jérusalem aga ndo so gbâ ti afango da+ la ayeke dä, ndo ti lango ti ambo ti ngonda.*+
Mbi yeke sara si agbata ti Juda abuba kue, zo oko ayeke ngbâ na yâ ni pëpe.+
12 Zo wa la ayeke na ndara mingi ti hinga ngbanga ti nyen ye so asi?
Jéhovah asara tënë so na zo wa, si lo lingbi ti fa peko ni na amba ti lo?
Kodro ni abuba kue ngbanga ti nyen?
Ngbanga ti nyen kodro ni ahule tongana désertsi zo oko ahon na yâ ni pëpe so?”
13 Jéhovah akiri tënë, atene: “A yeke ndali ti so ala ke ndia* ti mbi so mbi zia na gbele ala, nga ndali ti so ala sara ye pëpe alingbi na ndia ni na ala ke ti mä yanga ti mbi.
14 Me ala sara kpengba-li ala mû peko ti ye so bê ti ala afa+ na ala, ala mû peko ti ayanda ti Baal, tongana ti so ababâ ti ala afa ândö na ala.+
15 Tongaso, bâ tënë so Jéhovah ti aturugu, Nzapa ti azo ti Israël, atene la: ‘Bâ, mbi yeke sara si azo so ate absinthe nga mbi yeke sara si ala nyon ngu so a bi sioni yorö na yâ ni.+
16 Mbi yeke kangbi ande ala kirikiri na popo ti amara nde so ala na ababâ ti ala ahinga amara ni so kozo pëpe,+ na fade mbi tokua épée na peko ti ala juska mbi hunzi ala kue.’+
17 Bâ tënë so Jéhovah ti aturugu atene la:
‘Ala sara ye tongana azo so ayeke mä yâ ti ye ma!
Ala tokua ndo a iri awali so ayeke he bia ti vundu*+ ti ga.
Ala iri awali so ahinga totongo kuâ nzoni ti tene ala ga,
18 zia ala ga hio na ala he bia ti totongo kuâ na ndo ti e,tongaso si ngu ti lê ti e alingbi ti sua,na ngu asigi gbani gbani na yâ ti lê ti e,+
19 si na mbage ti Sion a mä go ti bia ti totongo kuâ ni, a tene:+
“Aï! A futi e kue awe!
So kota kamene na lê ti e!
Ndali ti so e dö kodro ni e zia awe, na a kungbi ada ti e na sese awe.”+
20 Ala awali, ala mä tënë ti Jéhovah.
Zia mê ti ala amä tënë ti yanga ti lo.
Ala fa bia ti vundu* so na amolenge ti ala ti wali,ala fa nga bia ni so na amba ti ala.+
21 Ndali ti so kuâ aga alï na lê ti afenêtre ti e;kuâ ni alï na yâ ti ada ti e so ayeke na yâ ti angangu gbagba,lo lï ti fâ amolenge so ayeke na ndö ti alege,nga ti fâ amaseka-koli so ayeke na ando so azo ayeke gue ka dä mingi.’+
22 Mo tene: ‘Bâ tënë so Jéhovah atene la:
“Kuâ ti azo ayeke lango ande na lê ti sese tongana puru ti anyama na lê ti yaka,tongana alê ti kobe ti yaka so azo ti fango alê ti kobe afâ ni fini fini azia na peko ti ala,si mbeni zo ti bungbi alê ti kobe ni so ayeke dä pëpe.”’”+
23 Bâ tënë so Jéhovah atene la:
“Zia zo ti ndara apika kate ti lo na ndö ti ndara ti lo pëpe.+
Zia wangangu apika kate ti lo na ndö ti ngangu ti lo pëpe.
Zia zo ti mosoro apika kate ti lo na ndö ti amosoro ti lo pëpe.”+
24 “Me zia zo so ayeke pika kate ti lo apika kate ti lo na ndö ti aye so:
So lo hinga ndo nga lo hinga mbi,+so mbi yeke Jéhovah, lo so ayeke sara ye na tâ ndoye, lo so afâ ngbanga na lege ni nga lo so asara ye na lege ti mbilimbili na ndö ti sese,+ndali ti so a yeke aye so la anzere na bê ti mbi,”+ tënë ti yanga ti Jéhovah la.
25 Jéhovah atene: “Bâ, alango ayeke ga, so mbi yeke fâ ngbanga na ndö ti azo kue so afâ ganza nga na ala kue so ade ti fâ ganza pëpe,+
26 na ndö ti azo ti Égypte,+ ti Juda,+ ti azo ti kodro ti Édom,+ ti azo ti mara ti Ammon,+ Moab+ nga na azo kue so asara kodro na yâ ti benyama+ si ala kio kuä ti li ti ala so adescend na terê ti mê ti ala; ndali ti so amara kue ade afâ ganza pëpe, nga azo ti mara ti Israël kue ayeke azo so ade a fâ bê ti ala na ganza pëpe.”+
Akete tënë na terê ni
^ Wala “Âme ti mbi ayeke.”
^ Wala “bia ti totongo kuâ.”
^ Wala “chacal.”
^ Wala “fango ye.”
^ Wala “bia ti totongo kuâ.”
^ Wala “bia ti totongo kuâ.”
