Lévitique 10:1-20
10 Mbeni ngoi na pekoni, amolenge ti Aaron, Nadab na Abihu,+ amû ye ti ala ti ziango lê ti wâ dä, ala zia lê ti wâ na yâ ni, ala zia dukane+ na lê ni. Na pekoni, ala yâa na gbele Jéhovah mbeni wâ so lo mû yanga na ala ti sara ni pëpe;+ a yeke mbeni ye so lo fa na ala pëpe ti sara ni.
2 Ye so asara si wâ alondo na Jéhovah agbi ala,+ na ala kui na devant ti Jéhovah.+
3 Tongaso, Moïse atene na Aaron: “Jéhovah atene: ‘A lingbi azo so ayeke nduru na mbi+ abâ so mbi yeke nzoni-kue, nga a lingbi mbi wara gloire na lê ti azo kue.’” Aaron azi yanga pëpe.
4 Moïse airi Mishaël na Elzaphan, amolenge ti Uzziel,+ babâ kete ti Aaron, lo tene na ala: “Ala ga, ala yô kuâ ti aita ti ala na devant ti ndo so ayeke nzoni-kue, ala gue na ni na gigi ti camp.”
5 Tongaso ala ga, ala yô akuâ ni na yâ ti ayongoro bongo ti akuâ ni wani, ala gue na ala na gigi ti camp, gï tongana ti so Moïse atene na ala.
6 Moïse atene na Aaron nga na tanga ti amolenge ti lo Éléazar na Ithamar, lo tene: “Ala ngbâ ti leke kuä ti li ti ala na ala suru bongo na terê ti ala pëpe,+ si ala kui pëpe nga si bê ti Nzapa ason pëpe na terê ti azo ni kue. Aita ti ala, azo ti Israël kue, la ayeke toto ande akuâ ti azo so Jéhovah asara si wâ agbi ala.
7 Ala gue ayo na yanga ti tente ti bungbi pëpe si ala kui pëpe, ndali ti so a soro ala awe na lege ti mafuta ti Jéhovah so a tuku na li ti ala.”+ Ni la, ala sara gï tongana ti so Moïse atene.
8 Jéhovah atene na Aaron, atene:
9 “Tongana mo na amolenge ti mo alï na yâ ti tente ti bungbi,+ ala nyon vin wala sämba pëpe, si ala kui pëpe. Mbela so ayeke ngbâ aninga teti ala na ahale ti ala.
10 Tongaso, ala yeke hinga popo ti ye so ayeke ti Nzapa na senge ye, nga popo ti ye so sioni ye ayeke dä na ye so sioni ye ayeke dä pëpe,+
11 nga ala fa na azo ti Israël andia kue so Jéhovah amû na ala na lege ti Moïse.”+
12 Moïse atene na Aaron nga na Éléazar na Ithamar, amolenge ti Aaron so angbâ, lo tene: “Ala mû tanga ti sandaga ti lê ti kobe so angbâ na peko ti so a zö asandaga na Jéhovah, ala sara ni na mapa so a sara na levure pëpe na ala te ni na terê ti gbalaka,+ ndali ti so a yeke mbeni ye so ayeke nzoni kue kue kue.+
13 Ala yeke te ande ni na mbeni place so ayeke nzoni-kue,+ ndali ti so a yeke ye ti mo na ti ahale ti mo so a zi ni na yâ ti asandaga so a zö na Jéhovah; yanga so a mû na mbi la.
14 Kate ti nyama ti sandaga so a yengi ni nga na gere ni ayeke mbage so a zia ni nde ndali ti ala;+ ala yeke te ande ni na mbeni ndo so saleté ayeke dä pëpe, mo na amolenge ti mo ti koli na ti wali,+ ndali ti so a yeke ye ti mo na ti ahale ti mo so a zi ni na yâ ti asandaga ti beoko so azo ti Israël amû.
15 Gere ni so ayeke mbage so a zia ni nde ndali ti ala, kate ti nyama ni nga na mafuta ti nyama ni, azo ti Israël ayeke ga ande na ni ti mû na sandaga so a zö ni. Na peko ti so ala yengi ni mbage na mbage na gbe ti Jéhovah awe, gere ni na kate ni ayeke ga ti mo na ahale ti mo;+ a yeke mû ni na ala lakue, a lingbi na yanga so Jéhovah amû.”
16 Moïse agi ngasa ti sandaga ndali ti siokpari ni gbä,+ na lo bâ so a gbi ni awe. Bê ti lo ason na terê ti Éléazar na Ithamar, amolenge ti Aaron ti koli so angbâ, na lo tene:
17 “Nyama ti sandaga ndali ti siokpari ni, ngbanga ti nyen ala ke ti mû ni ti te na mbeni place so ayeke nzoni-kue?+ A yeke mbeni ye so ayeke nzoni kue kue kue, na Nzapa amû ni na ala si ala yô siokpari ti azo ni nga ala sara si a zi siokpari ti azo ni na gbele Jéhovah.
18 A lï nga na mênë ni pëpe na yâ ti mbeni place so ayeke nzoni-kue.+ A yeke ngbanga ti ala ti te fade ni na mbeni place so ayeke nzoni-kue, a lingbi na yanga so a mû na mbi.”
19 Aaron atene na Moïse: “Atâa aye ti ngangu so asi na mbi laso, azo ni aga na gbele Jéhovah na nyama ti mungo na sandaga ndali ti siokpari nga na nyama ti mungo na sandaga so a zö ni agbi kue.+ Tongana mbi te fade nyama ti sandaga ndali ti siokpari, ka a yeke nzere na Jéhovah?”
20 Tongana Moïse amä tënë so, lo yeda na ni.
