Lévitique 12:1-8
-
Zingo sioni ye na terê ti zo na peko ti dungo molenge (1-8)
12 Jéhovah atene na Moïse:
2 “Tene na azo ti Israël, mo tene: ‘Tongana mbeni wali amû ngo si lo dü koli, lo yeke ga sioni lango mbasambala, gï tongana ti so lo ga sioni na ngoi ti bango yâ ti lo.+
3 Na lango miombe ni, a yeke fâ ande molenge ni na ganza.+
4 Wali ni ayeke kiri ti ngbâ na yanga-da lango 33 ti tene lo ga nzoni na peko ti mênë ti lo so ayuru. Ye kue so a zia ni nde ndali ti Nzapa, lo yeke ndu ande ni pëpe, nga lo yeke gue pëpe na place so ayeke nzoni-kue juska alango ni so ahunzi si.
5 “‘Tongana lo dü wali, lo yeke ga sioni lango 14, gï tongana ti so lo ga sioni na ngoi ti bango yâ ti lo. Na peko ti lango 14 so, lo yeke ngbâ na yanga-da lango 66 ti tene lo ga nzoni na peko ti mênë ti lo so ayuru.
6 Tongana alango ni so a mû ti tene lo ga nzoni na peko ti dungo molenge-koli wala molenge-wali ahunzi awe, lo yeke ga ande na kete koli-taba ti ngu oko ti mû na sandaga so a zö ni agbi kue+ nga na kete pigeon wala kolokoto ti mû na sandaga ndali ti siokpari; lo yeke ga na ala na prêtre na yanga ti tente ti bungbi.
7 Prêtre ni ayeke ga na ala na gbele Jéhovah na lo yeke sara si a zi siokpari ti wali ni, na wali ni ayeke ga nzoni na peko ti mênë ti lo so ayuru. Ndia so abâ wali so adü molenge ti koli wala ti wali la.
8 Me tongana lo lingbi pëpe ti ga na taba, lo yeke ga na akolokoto use wala akete pigeon use:+ oko ayeke ti mû na sandaga so a zö ni agbi kue, oko ayeke ti mû na sandaga ndali ti siokpari; prêtre ayeke sara si a zi siokpari ti wali ni, na lo yeke ga nzoni.’”
