Lévitique 14:1-57
14 Jéhovah angbâ ti sara tënë na Moïse, atene:
2 “Ndia so zo ti buruma ayeke sara ye alingbi na ni na lango so a ga na lo na prêtre ti tene prêtre atene so lo ga nzoni awe ayeke so:+
3 Prêtre ni ayeke sigi na gigi ti camp ni, na lo yeke bâ zo ni. Tongana kobela ti buruma ni ahon na terê ti zo ni awe,
4 prêtre ni ayeke mû yanga na zo ni ti ga na andeke use so ayeke nzoni, maboko ti keke ti cèdre, bengba bongo nga na hysope* ti sara si lo ga nzoni.+
5 Prêtre ni ayeke mû yanga si a fâ mbeni ndeke ni oko na yâ ti kungba so a sara ni na sese so nzoni ngu ayeke na yâ ni.
6 Lo yeke mû ndeke so angbâ na fini, maboko ti keke ti cèdre ni, bengba bongo ni nga na hysope ni, lo yôro aye so kue na yâ ti mênë ti ndeke so a fâ lo na yâ ti kungba so nzoni ngu ayeke dä so.
7 Na pekoni, prêtre ni afi mênë ni fani mbasambala na terê ti zo so aye ti ga nzoni na peko ti kobela ti buruma ni, na lo tene so zo ni aga nzoni awe; na lo zia ndeke ni ti tene lo huru lo hon na yâ ti ngonda.+
8 “Zo ni so aye ti ga nzoni ayeke sukula bongo ti lo, lo kio kuä ti terê ti lo kue nga lo sukula ngu, na lo ga nzoni. Na pekoni, lo kiri na yâ ti camp ni, me lo yeke lango na gigi lango mbasambala kozoni si lo lï na yâ ti tente ti lo.
9 Na lango mbasambala ni, lo kio kuä ti li ti lo kue, kuä ti yanga ti lo kue nga na kuä ti ndö ti lê ti lo kue. Na peko ti so lo kio kuä ti terê ti lo kue awe, lo yeke sukula bongo ti lo nga lo sukula ngu, na lo yeke ga nzoni.
10 “Na lango miombe ni, lo yeke mû akete koli-taba use ti ngu oko nga na kete wali-taba oko ti ngu oko, so sioni ye ayeke na terê ti ala pëpe.+ Lo mû nga dixième ota ti épha* ti pendere farine so a mélangé ni na mafuta tongana sandaga ti lê ti kobe;+ lo mû nga log* oko ti mafuta;+
11 prêtre so atene zo ni aga nzoni awe ayeke mû ande zo ni, lo ga na lo nga na aye so lo ye ti mû na sandaga so na devant ti Jéhovah na yanga ti tente ti bungbi.
12 Prêtre ni ayeke mû ande mbeni kete koli-taba ni ti mû ni na sandaga ti zingo tënë na li ti zo,+ legeoko na mafuta ni; na lo yeke yengi ande aye so mbage na mbage na gbele Jéhovah tongana sandaga so a yengi ni.+
13 Na pekoni lo yeke fâ kete koli-taba ni na place so ayeke nzoni-kue, place so a yeke fâ ka nyama dä ti mû na sandaga ndali ti siokpari nga na sandaga so a zö ni agbi kue,+ ndali ti so, tongana ti so nyama ti sandaga ndali ti siokpari ayeke ga ti prêtre, nyama ti sandaga ti zingo tënë na li ti zo nga ayeke ga ti prêtre ni.+ A yeke mbeni ye so ayeke nzoni kue kue kue.+
14 “Prêtre ni ayeke mû ande mbeni mbage ti mênë ti nyama ti sandaga ti zingo tënë na li ti zo, lo zia ni na mê ti zo ni ti mbage ti koli, na ndö ti kota li ti maboko ti lo ti koli nga na ndö ti kota li ti gere ti lo ti koli.
15 Prêtre ni ayeke mû ande mafuta ni,+ lo tuku mbeni na yâ ti maboko ti lo wani, na mbage ti wali.
16 Lo yeke yôro mbeni li ti maboko ti lo ti koli na yâ ti mafuta ni so ayeke na yâ ti maboko ti lo ti wali, na lo fi ni fani mbasambala na gbele Jéhovah.
17 Lo mû mbeni mafuta so angbâ na yâ ti maboko ti lo, lo zia ni na mê ti zo ni ti mbage ti koli, na ndö ti kota li ti maboko ti lo ti koli nga na ndö ti kota li ti gere ti lo ti koli; lo zia ni na ndö ti mênë ti sandaga ti zingo tënë na li ti zo.
18 Tanga ti mafuta ni so angbâ na yâ ti maboko ti prêtre ni, lo tuku ni na li ti zo so aye ti ga nzoni na peko ti kobela ti lo so, na prêtre ni ayeke sara si a zi siokpari ti lo na gbele Jéhovah.+
19 “Prêtre ni ayeke yâa ande sandaga ndali ti siokpari+ nga lo sara si a zi siokpari ti zo so kobela ti lo asara si lo ga sioni; na pekoni lo yeke fâ nyama ti sandaga so a zö ni agbi kue.
20 Lo yeke mû nyama ni na sandaga nga lo yeke yâa sandaga ti lê ti kobe ni+ na ndö ti gbalaka, na lo yeke sara si a zi siokpari ti zo ni;+ na zo ni aga nzoni.+
21 “Ye oko, tongana zo ni ayeke wayere si lo yeke na ye mingi pëpe, lo yeke mû ande kete koli-taba oko ti mû na sandaga ti zingo tënë na li ti zo, si a yengi ande ni mbage na mbage ti tene a zi siokpari ti lo. Lo yeke mû ande nga dixième ti épha* ti pendere farine so a mélangé ni na mafuta ti mû na sandaga ti lê ti kobe; nga lo yeke mû log oko ti mafuta.
22 Lo yeke mû nga akolokoto use wala akete pigeon use, a lingbi na ye so lo yeke na ni. Oko ayeke ti sandaga ndali ti siokpari nga tanga ni ayeke ti sandaga so a zö ni agbi kue.+
23 Na lango miombe ni,+ lo yeke ga ande na ala na yanga ti tente ti bungbi na gbele Jéhovah ti tene prêtre ni atene lo ga nzoni awe.+
24 “Prêtre ni ayeke mû ande kete koli-taba ti sandaga ti zingo tënë na li ti zo ni+ nga na log ti mafuta ni, lo yengi ni mbage na mbage na gbe ti Jéhovah tongana sandaga so a yengi ni.+
25 Prêtre ni ayeke fâ ande kete koli-taba ni, na lo mû mbage ti mênë ni, lo zia ni na mê ti zo ni ti mbage ti koli, na ndö ti kota li ti maboko ti lo ti koli nga na ndö ti kota li ti gere ti lo ti koli.+
26 Prêtre ni ayeke tuku ande mbeni mafuta ni na yâ ti maboko ti lo wani, na mbage ti wali,+
27 na lo yôro li ti maboko ti lo ti koli na yâ ti mafuta ni, lo fi ni fani mbasambala na gbele Jéhovah.
28 Prêtre ni ayeke mû ande mbeni mafuta ni, lo zia ni na mê ti zo ni ti mbage ti koli, na ndö ti kota li ti maboko ti lo ti koli nga na ndö ti kota li ti gere ti lo ti koli; lo zia ni na place so lo zia fade mênë ti sandaga ti zingo tënë na li ti zo dä so.
29 Tanga ti mafuta ni so angbâ na yâ ti maboko ti prêtre ni, lo tuku ni na li ti zo so aye ti ga nzoni so ti sara si a zi siokpari ti lo na gbele Jéhovah.
30 “Prêtre ni ayeke mû ande na sandaga mbeni kolokoto ni oko wala mbeni kete pigeon ni oko, a lingbi na ye so wayere ni ayeke na ni,+
31 lo mû oko na sandaga ndali ti siokpari nga lo mû tanga ni na sandaga so a zö ni agbi kue;+ lo yeke mû asandaga ni so legeoko na sandaga ti lê ti kobe; na prêtre ni ayeke sara si a zi siokpari ti zo ni na gbele Jéhovah.+
32 “Ndia so la zo ti buruma so ayeke na ye mingi pëpe ayeke sara ye alingbi na ni na lango so lo ga ti tene prêtre atene lo ga nzoni awe.”
33 Jéhovah atene na Moïse na Aaron, atene:
34 “Tongana ala si na sese ti Canaan+ so mbi yeke mû na ala,+ na mbi sara si buruma amû terê ti mbeni da na sese ti ala ni,+
35 wa ti da ni ayeke ga ande na ndo ti prêtre, na lo tene na lo, lo tene: ‘Mbeni ye tongana kobela asigi na terê ti da ti mbi na mbage ti yâ ni.’
36 Prêtre ni ayeke mû ande yanga ti tene a sigi na aye ti yâ ti da ni kue na gigi kozo si lo ga lo bâ ye so asigi na terê ti da ni, ngbanga ti lo tene ye kue so ayeke na yâ ti da ni aga sioni awe; na pekoni prêtre ni ayeke lï ti bâ yâ ti da ni.
37 Lo yeke bâ place so ye ni asigi dä so, na tongana lo bâ so ye ni aye ti gue vert wala bengba tongaso nga alï na yâ ti mur ni,
38 prêtre ni ayeke sigi na yâ ti da ni, lo kanga yanga ti da ni si zo alï dä pëpe lango mbasambala.+
39 “Prêtre ni ayeke kiri na lango mbasambala ni ti bâ da ni; tongana lo bâ so ye so asigi na terê ti mur ti da ni so akiri akono,
40 lo yeke mû yanga ti tene azo azi atênë ti place so ye ni asigi dä, ala tuku ni na mbeni ndo so a yeke tuku saleté dä na gigi ti gbata ni.
41 Na pekoni, lo yeke mû yanga na azo ti kpaka terê ti mur ti yâ ti da ni kue, na ala tuku asese so ala kpaka ni so na mbeni ndo so a yeke tuku saleté dä na gigi ti gbata ni.
42 Azo ni ayeke mû ambeni tênë nde ala monté ni na place ti akozo ni so; na lo yeke mû yanga si ala mû mbeni popoto nde, ala crépir na yâ ti da ni.
43 “Ye oko, tongana ye ni so akiri asigi na terê ti mur ti da ni na peko ti so a zi akozo tênë ni, a kpaka terê ti mur ni nga a crépir yâ ti da ni,
44 prêtre ni ayeke kiri na yâ ti da ni ti bâ place ni so; tongana ye ni akiri akono na terê ti da ni, so sioni buruma+ ti da la. Da ni aga sioni awe.
45 Lo yeke mû yanga ti tene azo akungbi da ni, na ala mû atênë ni, akeke ni nga na sese ti popoto so a monté na da ni, ala gue na ni na mbeni ndo so a yeke tuku saleté dä na gigi ti gbata ni.+
46 Me zo so alï na yâ ti da ni na yâ ti alango kue so a kanga yanga ti da ni,+ lo yeke ga sioni juska na lakui;+
47 tongana mbeni zo alango dä wala lo te ye dä, lo yeke sukula bongo ti lo.
48 “Me tongana prêtre ni akiri abâ da ni, na lo bâ so ye ni akiri akono pëpe na terê ti da ni na peko ti so a crépir ni, prêtre ni ayeke tene so da ni aga nzoni awe, ndali ti so ye so asigi na terê ni ahon awe.
49 Ti sara si da ni akiri aga nzoni,* lo yeke mû ande andeke use, maboko ti keke ti cèdre, bengba bongo nga na hysope.+
50 Lo yeke fâ mbeni ndeke ni oko na yâ ti kungba so a sara ni na sese so nzoni ngu ayeke na yâ ni.
51 Lo mû maboko ti keke ti cèdre ni, hysope ni, bengba bongo ni nga na ndeke so angbâ na fini, lo yôro aye so kue na yâ ti mênë ti ndeke so a fâ lo na yâ ti kungba so nzoni ngu ayeke dä; na lo fi mênë ni fani mbasambala na mbage ti da ni.+
52 Lo mû mênë ti ndeke ni so a fâ lo so, nzoni ngu ni, ndeke so angbâ na fini so, maboko ti keke ti cèdre ni, hysope ni nga na bengba bongo ni, lo sara si da ni akiri aga nzoni.*
53 Lo zia ndeke ni ti tene lo huru lo hon na yâ ti ngonda, tongaso si a zi sioni ye na terê ti da ni, na a ga nzoni.
54 “So ndia na ndö ti kobela ti buruma nde nde kue la: ti kuä ti li wala kuä ti yanga,+
55 ti bongo+ nga na ti da,+
56 ti ye so asuku zo, ti kä so lê ni ahule hulengo nga na ti ye so asigi na ndö ti poro ti terê ti zo,+
57 si ala hinga popo ti ye so sioni ye ayeke dä na ye so sioni ye ayeke dä pëpe.+ So ayeke ndia na ndö ti buruma la.”+
Akete tënë na terê ni
^ A ye peut-être ti sara tënë ti mbeni kete keke wala ti ambeni kete keke, me a hinga ni nzoni pëpe.
^ Na Hébreu: “Ti zi siokpari na terê ti da ni.”
^ Na Hébreu: “lo zi siokpari na terê ti da ni.”
