Lévitique 21:1-24
21 Jéhovah akiri asara tënë na Moïse, atene: “Tene na amolenge ti Aaron, aprêtre, mo tene: ‘Tongana mbeni zo ti Israël akui, a lingbi mbeni prêtre aga sioni pëpe ngbanga ti lo.*+
2 Me lo lingbi ti ga sioni tongana a yeke tâ fami ti lo, na tapande mama ti lo, babâ ti lo, molenge ti lo ti koli wala ti wali, ita ti lo ti koli.
3 Lo lingbi nga ti ga sioni tongana a yeke ita ti lo ti wali so ade ti hinga koli pëpe na so ade mbeni koli amû lo pëpe.
4 A lingbi lo ga sioni pëpe ngbanga ti kuâ ti mbeni wali na popo ti azo ti Israël so koli amû lo awe, ndali ti so lo lingbi encore ape ti sara kua ti Nzapa.
5 Ala kio kuä ti li ti ala pëpe,+ ala fâ ndö ti kuä ti yanga ti ala pëpe, nga ala suru terê ti ala na kä pëpe.+
6 Ala duti nzoni-kue na lê ti Nzapa ti ala,+ na ala bi nengo ti iri ti Nzapa ti ala na sese pëpe,+ ndali ti so ala la ayeke yâa na Jéhovah asandaga so a zö na wâ, mapa* ti Nzapa ti ala; a lingbi ala duti nzoni-kue.+
7 Ala mû pëpe wali-ndumba+ wala wali so ahinga koli awe; ala mû pëpe wali so asara divorce,+ ndali ti so prêtre ayeke nzoni-kue na lê ti Nzapa ti lo.
8 Mo yeke zia lo nde ndali ti Nzapa,+ ngbanga ti so lo la lo yeke yâa mapa ti Nzapa ti mo. A lingbi lo duti nzoni-kue na lê ti mo, ndali ti so mbi Jéhovah, so mbi zia ala nde, mbi yeke nzoni-kue.+
9 “‘Tongana molenge ti prêtre ti wali abi nengo ti lo wani na sese na sarango ndumba, a yeke nengo ti babâ ti lo la lo bi na sese. Ala fâ lo na ala gbi lo.+
10 “‘Lo so ayeke kota prêtre na popo ti aita ti lo ti koli, lo so a tuku mafuta na li ti lo ti soro lo,+ a zia lo na kua ti prêtre nga lo yü bongo ti prêtre,+ lo yeke zi yâ ti kuä ti li ti lo kirikiri pëpe ngbanga ti zo so akui, nga lo yeke suru bongo ti lo pëpe.+
11 Lo gue na terê ti kuâ ti zo* pëpe.+ A lingbi lo ga sioni pëpe même ndali ti kuâ ti babâ wala ti mama ti lo.
12 Lo yeke zia place so ayeke nzoni-kue ti gue ti bâ lege ti kuâ pëpe nga lo yeke buba place so Nzapa azia ni nde ndali ti lo wani so pëpe,+ ndali ti so a tuku mafuta ti Nzapa ti lo na li ti lo awe ti soro lo.+ Mbi yeke Jéhovah Nzapa ti ala.
13 “‘Lo yeke mû gï wali so ade ti hinga koli pëpe.+
14 Lo lingbi pëpe ti mû wali-mua, wali so asara divorce, wali so ahinga koli awe wala wali-ndumba; me lo yeke mû wali so ade ti hinga koli pëpe na yâ ti mara ti lo wani.
15 A lingbi lo sara si yâ ti ahale* ti lo aga kirikiri pëpe,+ ndali ti so mbi Jéhovah la mbi zia lo nde ndali ti mbi.’”
16 Jéhovah angbâ ti sara tënë na Moïse, atene:
17 “Tene na Aaron, mo tene: ‘Na yâ ti ahale* ti mo, tongana mbeni koli ayeke dä so mbeni mbage ti terê ti lo abuba, lo lingbi pëpe ti yâa mapa ti Nzapa ti lo. Tënë so abâ ahale ti mo na yâ ti angoi nde nde so ayeke ga.
18 Tongana mbeni mbage ti terê ti koli ni abuba, lo yeke ga pëpe na place so ayeke nzoni-kue: tongana lê ti lo abuba, gere ti lo abuba, face ti lo abuba,* mbeni membre ti terê ti lo ayo ahon mbeni,
19 gere ti lo wala maboko ti lo akungbi,
20 lo yeke kunguluba, lo yeke ndurukpa,* lo yeke na mbeni kpale na lê ti lo, lo yeke na kä so lê ni ahule hulengo, lo yeke na parata wala yâ ti para ti korobo ti lo afâ, lo yeke ga pëpe na place so ayeke nzoni-kue.+
21 Na yâ ti ahale* ti prêtre Aaron, koli so mbeni mbage ti terê ti lo abuba ayeke zö asandaga na Jéhovah pëpe. So mbeni mbage ti terê ti lo abuba awe, lo lingbi pëpe ti yâa mapa ti Nzapa ti lo.
22 Kobe ti Nzapa ti lo so a zi ni na yâ ti aye so ayeke nzoni kue kue kue+ nga na aye so ayeke nzoni-kue, lo lingbi ti te ni senge.+
23 Ye oko, lo lingbi pëpe ti ga nduru na rideau ni,+ na lo lingbi pëpe ti ga nduru na gbalaka ni,+ teti mbeni mbage ti terê ti lo abuba awe; a lingbi lo buba pëpe place ti mbi so ayeke nzoni-kue,+ ndali ti so mbi Jéhovah la mbi zia ala nde ndali ti mbi.’”+
24 Tënë so Moïse atene na Aaron, na amolenge ti lo ti koli nga na azo ti Israël kue la.
Akete tënë na terê ni
^ Wala “âme so.”
^ Wala “kobe,” a ye ti sara tënë ti asandaga.
^ Wala “mbeni âme so akui.” Ge, tënë ti Hébreu nèphèsh ague oko na mbeni tënë ti Hébreu so ndani aye ti tene “akui awe.”
^ Na Hébreu: “ngongoa.”
^ Na Hébreu: “ngongoa.”
^ Na Hébreu: “hôn ti lo asuru.”
^ A lingbi nga ti tene “zo so ange ngengo.”
^ Na Hébreu: “ngongoa.”
