Lévitique 22:1-33
22 Jéhovah akiri atene na Moïse, atene:
2 “Tene na Aaron na amolenge ti lo ti koli ti sara hange na lege so ala yeke sara ye na* aye so azo ti Israël azia ni nde ndali ti mbi. Tongana a ndu tënë ti aye so a zia ni nde ndali ti mbi,+ ala bi nengo ti iri ti mbi na sese pëpe, iri ti mbi so ayeke nzoni-kue so.+ Mbi yeke Jéhovah Nzapa ti ala.
3 Tene na ala, mo tene: ‘Na yâ ti ahale ti ala kue na yâ ti angoi nde nde so ayeke ga, tongana mbeni hale ti ala so aga sioni awe aga na terê ti aye so azo ti Israël azia ni nde ndali ti mbi, ala fâ zo* ni so, ala zi lo na lê ti mbi.+ Mbi yeke Jéhovah Nzapa ti ala.
4 Tongana mbeni hale ti Aaron ayeke zo ti buruma+ wala kobela asara si ye ayuru na terê ti lo,+ a lingbi lo te pëpe ye so a zia ni nde ndali ti mbi juska lo ga nzoni si;+ tongana lo ndu mbeni zo so aga sioni awe ngbanga ti kuâ ti mbeni zo*+ wala tongana ngu ti terê ti lo ayuru,+
5 wala tongana lo ndu mbeni oko ti gbâ ti akete kete nyama so ayeke sioni+ wala tongana lo ndu zo so mbeni ye asara si lo ga sioni awe na lo nga lo lingbi ti ga sioni,+ a lingbi lo te pëpe ye so a zia ni nde ndali ti mbi juska lo ga nzoni si.
6 Zo* so andu mara ti aye tongaso ayeke ga sioni juska na lakui; lo te pëpe aye so a zia ni nde ndali ti mbi juska lo sukula ngu si.+
7 Tongana lâ alinda awe, lo yeke ga nzoni; na pekoni aye so a zia ni nde ndali ti mbi, lo te ni senge, ndali ti so a yeke kobe ti lo.+
8 A lingbi lo te pëpe nyama so akui awe wala nyama so mbeni nyama ti ngonda asuru yâ ti lo, si lo ga sioni pëpe ndali ni.+ Mbi yeke Jéhovah Nzapa ti ala.
9 “‘A lingbi ala bata aye so mbi fa na ala, si siokpari aga na li ti ala pëpe na ala kui ndali ti so ala buba nengo ti aye so a zia ni nde ndali ti mbi. Mbi Jéhovah la, mbi so mbi zia ala nde ndali ti mbi.
10 “‘Mbeni zo nde* alingbi pëpe ti te aye so a zia ni nde ndali ti mbi.+ Wande so aga gene na ndo ti prêtre wala zo so prêtre amû lo na kua, lo yeke te ni pëpe.
11 Me tongana prêtre ni avo mbeni zo* vongo na nginza ti lo, zo ni alingbi ti te ni senge. Angbâa so a dü ala na yâ ti da ti lo, ala lingbi ti te kobe so a zia ni nde.+
12 Tongana molenge ti prêtre ni ti wali amû koli so ayeke na yâ ti mara ti aprêtre pëpe,* wali so ayeke te ande pëpe aye so a zia ni nde ndali ti Nzapa.
13 Me tongana molenge ti prêtre ni aga wali-mua wala lo sara divorce sân ti dü, lo yeke kiri na da ti babâ ti lo, lo duti tongana ti so lo duti lani na ngoi so lo yeke maseka, lo lingbi ti te kobe ti babâ ti lo senge;+ me mbeni zo nde* alingbi ti te ni pëpe.
14 “‘Tongana mbeni zo ate mbeni ye so a zia ni nde, me lo sara ni na mbana pëpe, lo yeke kiri ande na sandaga ni so na prêtre ni, me lo yeke zia nga na ndö ni oku mbage ti sandaga ni.+
15 A lingbi aprêtre abuba pëpe ye so azo ti Israël azia ni nde, so ala mû na Jéhovah,+
16 si tënë aga na li ti ala pëpe ndali ti so ala te aye so ala zia ni nde ndali ti mbi; teti mbi Jéhovah la mbi zia ala nde ndali ti mbi.’”
17 Jéhovah angbâ ti sara tënë na Moïse, atene:
18 “Tene na Aaron, na amolenge ti lo nga na azo ti Israël kue, mo tene: ‘Tongana mbeni zo ti Israël wala mbeni wande so asara kodro na Israël aye ti mû na Jéhovah sandaga so a zö ni agbi kue,+ atâa a yeke ti sara ye alingbi na zendo so lo mû wala a yeke sandaga so lo ga na ni na bê ti lo wani,+
19 na zo ni aye ti tene sandaga ni anzere na lê ti Nzapa, a lingbi lo mû koli-bagara, koli-taba wala koli-ngasa so sioni ye ayeke na terê ti lo pëpe.+
20 Ala mû na sandaga pëpe nyama so mbeni mbage ti terê ti lo abuba,+ ndali ti so a yeke sara pëpe si ala nzere na lê ti Nzapa.
21 “‘Tongana mbeni zo aye ti mû na Jéhovah sandaga ti beoko+ ti sara ye alingbi na zendo so lo mû wala a yeke sandaga so lo ga na ni na bê ti lo wani, a lingbi lo mû bagara, taba wala ngasa so sioni ye ayeke na terê ti lo pëpe, si sandaga ni anzere na lê ti Nzapa. A lingbi mbeni mbage ti terê ti nyama ni abuba pëpe.
22 Nyama so lê ti lo abuba, wala bio ti lo akungbi, wala kä ayeke na terê ti lo, wala akete bouton asigi na terê ti lo, wala kä so lê ni ahule hulengo ayeke na terê ti lo wala parata ayeke na terê ti lo, ala ga na lo na gbe ti Jéhovah pëpe; ala zö lo pëpe na sandaga na ndö ti gbalaka na Jéhovah.
23 Bagara wala taba so mbeni gere ti lo ayo ahon mbeni wala ayeke nduru ahon mbeni, ala lingbi ti ga na ni ti mû na sandaga so zo amû na bê ti lo wani; me tongana ala mû ni ti sara ye alingbi na zendo so ala mû, mbi yeke yeda na ni pëpe.
24 Nyama so a pete para ti korobo ti lo si abuba wala a zi ni, ala ga na lo na Jéhovah pëpe; na kodro ti ala, ala mû mara ti nyama tongaso na sandaga pëpe.
25 Ala mû mara ti anyama tongaso na maboko ti awande pëpe ti mû na Nzapa ti ala tongana kobe ti lo, ndali ti so ye ti sioni ayeke na terê ni. Mbi yeke yeda na ni pëpe.’”
26 Jéhovah akiri atene na Moïse, atene:
27 “Tongana bagara, taba wala ngasa adü, a lingbi molenge ni angbâ na terê ti mama ti lo lango mbasambala;+ me na lango miombe ni ti gue na ni, a lingbi ti mû molenge ni na sandaga so a zö ni na Jéhovah, na lo yeke yeda na ni senge.
28 Ala fâ mama ti bagara wala ti taba nga na molenge ti lo na yâ ti oko lango pëpe.+
29 “Tongana ala ye ti mû sandaga ti kiri singila na Jéhovah,+ a yeke nzoni ala mû ni ti tene ala nzere na lê ti Nzapa.
30 Ala te ni gï na yâ ti lango ni. Ala bata ni juska ndade na ndapre pëpe.+ Mbi yeke Jéhovah Nzapa ti ala.
31 “Ala bata acommandement ti mbi, na ala sara ye alingbi na ni.+ Mbi yeke Jéhovah Nzapa ti ala.
32 Iri ti mbi so ayeke nzoni-kue so, ala bi nengo ni na sese pëpe;+ ala sara si azo ti Israël ane mbi mingi.+ Mbi Jéhovah la mbi zia ala nde ndali ti mbi,+
33 mbi la mbi sigi na ala na Égypte ti fa na ala so mbi yeke Nzapa ti ala.+ Mbi yeke Jéhovah Nzapa ti ala.”
Akete tënë na terê ni
^ Na Hébreu: “ala zi terê ti ala na terê ti.”
^ Wala “âme.”
^ Wala “âme.”
^ Wala “Âme.”
^ Na Hébreu: “wande,” so ti tene mbeni zo so ayeke ti sewa ti Aaron pëpe.
^ Wala “âme.”
^ Wala “asara mariage na mbeni wande.”
^ Na Hébreu: “wande,” so ti tene mbeni zo so ayeke ti sewa ti Aaron pëpe.
