Lévitique 27:1-34
27 Jéhovah akiri atene na Moïse, atene:
2 “Tene na azo ti Israël, mo tene: ‘Tongana zo amû mbeni kpengba zendo+ ti futa mbeni nginza na Jéhovah na place ti mbeni zo* so lo ye fade ti mû na lo,
3 tongana zo ni ayeke koli so ayeke na popo ti ngu 20 ti si na ngu 60, lo yeke futa sicle* ti argent 50, a lingbi na nengo ti sicle so a yeke sara kua na ni na ndo so ayeke nzoni-kue.*
4 Me tongana zo ni ayeke wali, a yeke futa sicle ti argent 30.
5 Ti azo so ngu ti ala ayeke na popo ti ngu 5 ti si na ngu 20, tongana a yeke koli, a yeke futa sicle ti argent 20; tongana a yeke wali, a yeke futa sicle ti argent 10.
6 Ti azo so ngu ti ala ayeke na popo ti nze oko ti si na ngu 5, tongana a yeke koli, a yeke futa sicle ti argent 5; tongana a yeke wali, a yeke futa sicle ti argent 3.
7 “‘Ti azo so ngu ti ala alondo na ngu 60 ti gue na ni, tongana a yeke koli, a yeke futa sicle ti argent 15; tongana a yeke wali, a yeke futa sicle ti argent 10.
8 Tongana yere ti zo so amû zendo ni ahon ndö ni si lo lingbi pëpe ti futa nginza so a fa,+ lo yeke zia zo ni na devant ti prêtre, na prêtre ni ayeke fa ngere so lo lingbi ti futa. Prêtre ni ayeke fa ni alingbi na ye so zo so amû zendo ni ayeke na ngangu ti futa ni.+
9 “‘Tongana zo amû zendo ti mû mbeni nyama na Jéhovah, na a yeke nyama so a yeke mû ka na sandaga, nyama kue so zo ni amû na Jéhovah ayeke ga ti Lo.
10 Lo lingbi ti ga na mbeni nyama nde na place ni pëpe, nga lo lingbi pëpe ti changé nyama ni na mbeni nyama so ayeke nzoni wala ayeke sioni ahon kozo nyama ni. Me tongana lo bâ so a lingbi lo changé nyama ni, anyama ni use kue ayeke ga ti Nzapa.
11 Tongana nyama ni ayeke sioni,+ mara ti nyama so a lingbi ti mû na sandaga na Jéhovah pëpe, zo so amû zendo ni ayeke zia nyama ni na devant ti prêtre.
12 Prêtre ni ayeke bâ wala nyama ni ayeke nzoni wala ayeke nzoni pëpe na lo fa ngere ni. Ngere so prêtre ni afa, a yeke gï ni la.
13 Me tongana zo ni aye ti kiri ti vo nyama ni, lo yeke futa ngere so a fa na lo, na lo kiri lo zia na ndö ni oku mbage ti ngere so lo futa.+
14 “‘Tongana zo aye ti mû da ti lo na Jéhovah, prêtre ayeke bâ wala da ni ayeke nzoni wala ayeke nzoni pëpe na lo fa ngere ni. Ngere so prêtre ni afa, so ngere ni la.+
15 Me tongana zo ni aye ti kiri ti vo da ni, lo yeke futa ngere so a fa na lo, na lo kiri lo zia na ndö ni oku mbage ti ngere so lo futa; da ni ayeke kiri ti ga ti lo.
16 “‘Tongana zo amû mbage ti yaka ti lo na Jéhovah, a yeke fa ngere ni alingbi na wungo ti ngongoa so a lingbi ti lu dä: ngere ti homer* ti ngongoa ti orge ayeke duti ande sicle ti argent 50.
17 Tongana zo ni amû yaka ti lo ni na Nzapa na ngu ti Jubilé,+ ngere ni ayeke ngbâ gï tongana ti so a fa.
18 Tongana lo mû yaka ti lo ni na Nzapa na peko ti ngu ti Jubilé, prêtre ni ayeke fa ngere ni alingbi na angu so angbâ ti si na ngu ti Jubilé ti peko, na zo ni afuta nginza ti yaka ni alingbi na angu so angbâ.+
19 Me tongana zo so amû yaka ni na Nzapa aye gï ti kiri ti vo yaka ni, lo yeke futa ngere so a fa na lo, na lo kiri lo zia na ndö ni oku mbage ti ngere so lo futa; yaka ni ayeke ngbâ gï ti lo.
20 Tongana zo ni akiri avo yaka ni pëpe si a kä ni na mbeni zo nde, zo alingbi ti kiri ti vo ni pëpe.
21 Na ngu ti Jubilé, yaka ni ayeke ga ye so a zia ni nde ndali ti Jéhovah, na a yeke ga ti lo biani biani. A yeke ga ti aprêtre.+
22 “‘Tongana zo avo mbeni yaka, me yaka ni ayeke ti sese ti lo pëpe, si na pekoni lo mû ni na Jéhovah,+
23 prêtre ni ayeke fa ngere ni alingbi na angu so angbâ ti si na ngu ti Jubilé ti peko, na lo yeke futa ni tâ na lango ni so.+ Nginza ni ayeke ye so a zia ni nde ndali ti Jéhovah.
24 Na ngu ti Jubilé, yaka ni ayeke kiri na zo so lo vo ni na maboko ti lo, zo so yaka ni ayeke ti lo.+
25 “‘A yeke fa ngere ti ye kue a lingbi na nengo ti sicle so a sara kua na ni na ndo so ayeke nzoni-kue. Sicle oko ayeke guérah* 20.
26 “‘Me, so akozo molenge ti anyama kue ayeke ti Jéhovah, zo ayeke na bezoin ti mû kozo molenge ti nyama na Jéhovah pëpe.+ Atâa a yeke bagara wala taba, a yeke ti Jéhovah awe.+
27 Tongana nyama ni ayeke nzoni pëpe na wa ti nyama ni akiri avo nyama ni, lo yeke futa ngere so a fa na lo, na lo kiri lo zia na ndö ni oku mbage ti ngere ni.+ Me tongana wa ti nyama ni akiri avo ni pëpe, a yeke kä nyama ni alingbi na ngere so a fa.
28 “‘Tongana zo amû zo wala nyama wala yaka na Jéhovah ti ga ti lo biani biani,* a lingbi lâ oko pëpe ti kä wala ti futa ye na place ti zo ni wala nyama ni wala yaka ni. Zo ni wala nyama ni wala yaka ni ayeke nzoni kue kue kue na lê ti Jéhovah.+
29 Me zo so a dë ngbanga na li ti lo na a zia lo nde ti fâ lo, a lingbi ti futa ye ti zi lo pëpe.+ Ala fâ gï lo.+
30 “‘Dixième kue*+ ti yaka, atâa a yeke lê ti kobe wala lê ti keke, ayeke ti Jéhovah. A yeke ye so ayeke nzoni-kue na lê ti Jéhovah.
31 Tongana zo aye ti kiri ti vo mbeni ye so lo mû na dîme, lo yeke futa ngere so a fa na lo, na lo kiri lo zia na ndö ni oku mbage ti ngere so lo futa.
32 Tongana zo ayeke diko abagara wala ataba ti lo na ngoi so ala yeke hon na gbe ti keke ti lo, lo yeke diko ngbii lo zi nyama* bale-oko ni, lo diko ngbii lo zi nyama bale-oko ni; ala kue ayeke ga aye so a zia ni nde ti mû na Jéhovah.
33 Lo yeke gi pëpe ti bâ wala nyama ni ayeke nzoni wala ayeke nzoni pëpe, nga lo yeke changé nyama ni na mbeni nde pëpe. Me tongana lo bâ so a lingbi lo changé nyama ni, anyama ni use kue aga ye so a zia ni nde ndali ti Nzapa.+ A lingbi ti futa ye na place ti anyama ni pëpe.’”
34 So ayeke acommandement so Jéhovah afa na Moïse si lo fa ni na azo ti Israël na Hoto ti Sinaï la.+
Akete tënë na terê ni
^ Wala “âme.”
^ Wala “na lege ti sicle so ayeke nzoni-kue.”
^ Wala “lo mû ni ti tene a futi ni.”
^ Wala “Dîme kue.”
^ Na Hébreu: “li.”
