Lévitique 6:1-30
6 Jéhovah atene na Moïse, atene:
2 “Tongana mbeni zo* asara siokpari na lo duti be-ta-zo na Jéhovah pëpe+ na lege so lo handa mba ti lo na ndö ti mbeni ye so mba ti lo amû na lo ti bata,+ wala lo nzi ye ti mba ti lo wala lo mû ye ti mba ti lo na likisi,
3 wala tongana lo wara mbeni ye so agirisa me lo tene mvene na ndö ni, nga tongana lo deba yanga ti lo, lo tene so lo sara mara ti siokpari so pëpe,+ bâ ye so a yeke nzoni lo sara la:
4 Tongana biani tënë ayeke na li ti lo ndali ti so lo sara siokpari, lo yeke kiri ande na ye so lo nzi, wala ye so lo mû na likisi wala ye so a mû na lo ti bata, wala ye so agirisa si lo wara
5 wala ye kue so lo mû ni me lo deba yanga ti lo so lo mû ni pëpe, lo yeke futa ande ni kue+ nga lo kiri lo zia na ndö ni oku mbage ti ngere so lo futa. Lo yeke mû ande ni na wa ti ye ni na lango so a fa na lo so tënë ayeke na li ti lo.
6 Lo yeke ga ande na Jéhovah koli-taba so sioni ye ayeke na terê ti lo pëpe tongana sandaga ti zingo tënë na li ti zo, taba so alingbi na ngere so a yeke fa. Lo yeke mû ni na prêtre.+
7 Prêtre ni ayeke sara si a zi siokpari ti lo ni na gbele Jéhovah, na a yeke pardonné lo ndali ti siokpari kue so asara si tënë ayeke na li ti lo.”+
8 Jéhovah akiri atene na Moïse, atene:
9 “Mû yanga na Aaron na amolenge ti lo, mo tene: ‘Ndia ti sandaga so a zö ni agbi kue ayeke so:+ Sandaga ni ayeke ngbâ na lê ti wâ na ndö ti gbalaka ni na bï juska na ndapre, nga ala sara si wâ ti ndö ti gbalaka ni angbâ lakue ti za.
10 Prêtre ayeke yü ande bongo ti kua ti lo so a sara na lin,+ nga lo yeke yü culotte ti lin*+ na terê ti lo. Na pekoni, lo zi mburu ti wâ*+ ti nyama so wâ agbi ni awe na ndö ti gbalaka, lo zia ni na terê ti gbalaka ni.
11 Na pekoni, lo yeke zi ande bongo ti lo ti kua,+ lo yü mbeni bongo nde, lo mû mburu ti wâ ni lo gue na ni na gigi ti camp na mbeni ndo so saleté ayeke dä pëpe.+
12 A lingbi wâ ti ndö ti gbalaka ni angbâ lakue ti za. A doit ti mingo pëpe. Prêtre ayeke zia ande keke ti wâ+ na lê ti wâ ni lakue na ndapre, lo leke nyama ti sandaga so a zö ni agbi kue na lê ni nga lo yeke zö mafuta ti sandaga ti beoko na lê ni.+
13 A lingbi wâ ti ndö ti gbalaka ni angbâ lakue ti za. A doit ti mingo pëpe.
14 “‘Ndia ti sandaga ti lê ti kobe ayeke so:+ Amolenge ti Aaron ayeke ga na ni na devant ti gbalaka na gbe ti Jéhovah.
15 Oko ti ala ayeke fû ande mbage ti pendere farine ni, mafuta ni na vuru dukane ni kue asi yâ ti maboko ti lo oko, lo zö ni na ndö ti gbalaka, na a yeke bâ ni tongana sandaga ni kue la,* sandaga so fion ni afun nzoni na hôn ti Jéhovah.*+
16 Aaron na amolenge ti lo ayeke te ande tanga ni so angbâ so.+ A yeke sara ande ni na mapa so a sara na levure pëpe na a te ni na mbeni place so ayeke nzoni-kue. Ala yeke te ande ni na yâ ti gbagba ti tente ti bungbi.+
17 Mapa ni, a yeke sara ande ni na levure pëpe.+ Ti ala ye so mbi mû na ala na yâ ti asandaga so a zö ni na mbi la.+ A yeke mbeni ye so ayeke nzoni kue kue kue,+ legeoko tongana sandaga ndali ti siokpari nga na sandaga ti zingo tënë na li ti zo.
18 Amolenge ti Aaron kue so ayeke akoli ayeke te ande ni.+ Ye ti ala so a yeke mû na ala na ahale ti ala lakue na yâ ti asandaga so a zö na Jéhovah la.+ Ye kue so andu ni* ayeke ga ande ye ti Nzapa.’”
19 Jéhovah akiri atene na Moïse, atene:
20 “Sandaga so Aaron wala mbeni hale ti lo ayeke mû lakue na Jéhovah na lango so a yeke tuku mafuta na li ti lo+ ayeke so: dixième ti épha*+ ti pendere farine tongana sandaga ti lê ti kobe,+ ndambo ni na ndapre na ndambo ni na lakui.
21 A yeke mélangé fuku ni na mafuta, na a zö ni na yâ ti gbarabuba.+ Na pekoni, a tuku mafuta dä nzoni, a ga na ni. A fâ yâ ni kete kete, a mû ni na Jéhovah tongana sandaga so fion ni afun nzoni na hôn ti lo.*
22 Prêtre ni, hale ti Aaron so a tuku mafuta na li ti lo ti mû place ti Aaron,+ lo la lo yeke mû ande sandaga ni. Ndia so ayeke ngbâ aninga: A yeke zö ande sandaga ni na Jéhovah, a gbi kue.
23 Sandaga ti lê ti kobe kue so mbeni prêtre ayeke mû ni, a lingbi a zö ni agbi kue. A te ni pëpe.”
24 Jéhovah akiri atene na Moïse, atene:
25 “Tene na Aaron na amolenge ti lo, mo tene: ‘Ndia ti sandaga ndali ti siokpari+ ayeke so: A yeke fâ nga nyama ti sandaga ndali ti siokpari na devant ti Jéhovah na place so a yeke fâ ka dä nyama ti sandaga so a zö ni agbi kue.+ A yeke mbeni ye so ayeke nzoni kue kue kue.
26 Prêtre so amû sandaga ni ndali ti siokpari la ayeke te ande ni.+ A yeke te ande ni na yâ ti gbagba ti tente ti bungbi na mbeni place so ayeke nzoni-kue.+
27 “‘Ye kue so andu kasa ti nyama ni ayeke ga ande ye ti Nzapa, nga tongana mbeni zo asara si mênë ni atï na terê ti bongo, mo sukula bongo ni so na mbeni place so ayeke nzoni-kue.
28 Tongana a tö ni na yâ ti ta ti sese, a yeke fâ ande yâ ti ta ni kete kete. Me tongana a tö ni na yâ ti ta ti cuivre, a yeke kpaka ande yâ ni na a sukula ni na ngu.
29 “‘Akoli kue so ayeke aprêtre ayeke te ande ni.+ A yeke mbeni ye so ayeke nzoni kue kue kue.+
30 Âdu ti nyama so a mû na sandaga ndali ti siokpari, so a gue na mbeni mbage ti mênë ni na yâ ti tente ti bungbi na ndo so ayeke nzoni-kue ti sara si a zi siokpari,+ a yeke te ande ni pëpe. A yeke zö ni a gbi kue.
Akete tënë na terê ni
^ Wala “âme.”
^ Wala “mburu ti wâ so mafuta ayeke dä,” so ti tene amburu ti wâ so amélangé na mafuta ti anyama so a mû na sandaga.
^ Wala “kete bongo so lo yü na gbe ti bongo.”
^ Wala “tongana ye ti dango bê na sandaga ni kue.”
^ Wala “adë bê ti Jéhovah.” Na Hébreu: “asara si Jéhovah awu terê ti lo.”
^ Wala “asandaga so.”
^ Wala “adë bê ti lo.” Na Hébreu: “asara si lo wu terê ti lo.”
