Osée 1:1-11
1 Jéhovah asara tënë na Osée* molenge ti Beéri na ngoi ti agbia ti Juda+ tongana Ozias,+ Jotham,+ Achaz+ na Ézéchias,+ nga na ngoi so Jéroboam,+ molenge ti Joas,+ ayeke gbia ti Israël.
2 Na ngoi so Jéhovah akomanse ti sara tënë na azo ti lo na lege ti Osée, Jéhovah atene na Osée: “Gue, mo mû mbeni wali-ndumba* na mo dü amolenge ti ndumba,* ndali ti so na lege ti sarango ndumba,* kodro ni azia lege ti mungo peko ti Jéhovah.”+
3 Tongaso, lo gue lo sara mariage na Gomer molenge ti Diblaïm. Gomer amû ngo na lo dü molenge ti koli na Osée.
4 Jéhovah atene na lo: “Mo zia iri ti lo Jizréel,* ngbanga ti so na yâ ti kete ngoi, mbi yeke ga na terê ti ahale ti Jéhu+ ndali ti mênë so ala tuku na gbata ti Jizréel, na mbi yeke sara si gbia akomande na ndö ti azo ti Israël encore ape.+
5 Na ngoi ni so, mbi yeke kungbi yâ ti kokora ti Israël na yâ ti Popo-hoto* ti Jizréel.”
6 Lo kiri lo mû ngo, na lo dü molenge ti wali. Nzapa atene na Osée: “Mo zia iri ti molenge ni Lo-Ruhamah,* ndali ti so mbi yeke sara nzoni bê encore ape+ na azo ti Israël, ngbanga ti so mbi yeke tomba ande ala.+
7 Me mbi yeke sara nzoni bê na azo ti Juda,+ na mbi Jéhovah Nzapa ti ala,+ mbi yeke sö ala. Mbi yeke sö ala pëpe na lege ti kokora, na lege ti épée, na lege ti bira, na lege ti ambarata wala na lege ti azo ti kpengo na mbarata.”+
8 Na peko ti so lo zi Lo-Ruhamah na me awe, lo mû ngo na lo dü molenge ti koli.
9 Nzapa atene: “Mo zia iri ti lo Lo-Ammi,* ndali ti so ala yeke azo ti mbi pëpe nga mbi yeke duti Nzapa ti ala pëpe.
10 “Wungo ti azo* ti Israël ayeke duti tongana mbutu ti ngu-ingo so zo alingbi ti haka ni pëpe wala ti diko ni pëpe.+ Na ndo so a tene na ala, a tene: ‘Ala yeke azo ti mbi pëpe so,’+ a yeke tene ande na ala, a tene: ‘Ala yeke amolenge ti Nzapa so ayeke na fini.’+
11 A yeke bungbi ande azo ti Juda nga na ti Israël kue ndo oko, na ala yeke duti beoko.+ Ala wani ayeke soro mbeni zo ti zia na ndö ti ala, na ala yeke sigi na yâ ti kodro ni ngbanga ti so a yeke duti mbeni kota lango ndali ti Jizréel.+
Akete tënë na terê ni
^ A yeke nduru iri ti Hoshaïah, so ndani aye ti tene “Zo so Jah asö lo; Jah asö zo awe.”
^ Wala “wali so asara lango-sioni; lo gi akoli nde nde.”
^ Wala “lango-sioni; so mama ti ala agi akoli nde nde.”
^ Wala “sarango lango-sioni; gingo awali wala akoli nde nde.”
^ Ndani aye ti tene “Nzapa ayeke lu ngongoa.”
^ Wala “Kpangbala ndo.”
^ Ndani aye ti tene “A sara nzoni bê na lo pëpe.”
^ Ndani aye ti tene “Azo ti mbi la pëpe.”
^ Na Hébreu: “amolenge-koli.”
