Osée 13:1-16
13 “Na ngoi so Éphraïm asara tënë, terê ti azo adö;lo yeke lani kota zo na Israël.+
Me vorongo Baal+ asara si tënë ayeke na li ti lo, na lo kui.
2 Ti fadeso, azo ni akiri asara siokpari ahon ndö ni;ala mû argent+ ti ala, ala sara na astatue ti wen.*Ala sara ayanda na kode, ni kue ayeke ye so zo so ahinga ti sara kua ti maboko nzoni si asara ni.
Ala tene na ayanda, ala tene: ‘Zia azo so amû sandaga asu ngbangba ti akete bagara ni.’+
3 Ala yeke ga tongana ambinda ti ndapre,tongana ngu ti pere so ahule hio,
tongana poro ti terê ti lê ti kobe so pupu ahon na ni
nga tongana guru so asigi na yâ ti dû so ayeke na li ti da.
4 Me ngbene ye na kodro ti Égypte,+ mbi yeke Jéhovah Nzapa ti ala.Ala hinga mbeni Nzapa nde pëpe, gï mbi oko;nde na mbi, mbeni sauveur ayeke dä pëpe.+
5 Mbi hinga ala lani na yâ ti benyama,+ na ndo so ahule.
6 Ala wara gbâ ti kobe na ndo so mbi gue na ala dä, na yâ ti ala asi;+yâ ti ala asi, na ala komanse ti sara baba,
na tongaso ala girisa mbi.+
7 Mbi yeke ga tongana bamara so akono awe na terê ti ala,+nga mbi yeke ga tongana zen so alango na terê ti lege.
8 Mbi yeke ga na ndö ti ala tongana ours so agirisa amolenge ti lo,na mbi yeke suru yâ ti kate ti ala.*
Kâ, mbi yeke te ala tongana bamara.Nyama ti ngonda ayeke suru yâ ti ala kete kete.
9 A yeke futi mo, Israël,ndali ti so mo ke mbi awe, mo ke zo so ayeke mû maboko na mo.
10 Tongaso gbia ti mo ni ayeke na ndo wa? si lo sö mo na yâ ti agbata ti mo kue pëpe so.+
Azo ti mo so ayeke komande,* so mo sara tënë ti ala lani, mo tene:‘Mû na mbi gbia nga na amokonzi’, ala yeke na ndo wa?+
11 Na ngonzo na bê, mbi mû na mo gbia lani.+Na kota ngonzo na bê, mbi yeke zi lo.+
12 A girisa na ndö ti faute ti Éphraïm pëpe, me a bata ni;a bata siokpari ti lo na mbeni ndo.
13 Yâ ti mama ti lo ayeke son ande na ngoi so lo ye ti dü lo.
Me lo yeke molenge ti ndara pëpe;na ngoi so a ye ti dü lo, lo sigi pëpe.
14 Mbi zi azo ti mbi na gbe ti ngangu ti Dû ti kuâ;*mbi yeke zi ala na maboko ti kuâ.+
Kuâ, akî ti mo so mo yeke kpo na zo ayeke na ndo wa?+
Dû ti kuâ, ngangu ti mo ti futingo ye ni ayeke na ndo wa?+
Mbi yeke bâ ande mawa ti mo pëpe.
15 Même tongana lo dü gbani na popo ti asosongo,mbeni pupu so alondo na mbage ti est, pupu ti Jéhovah, ayeke ga.Pupu ni ayeke londo na désert si aga; a yeke sara si dû ti ngu nga na li ti ngu ti lo ahule.
Mbeni zo ayeke nzi aye ti lo kue ti nginza mingi so ayeke na ndo so a bata amosoro dä.+
16 A yeke tene so tënë ayeke na li ti Samarie,+ ndali ti so lo sara kpengba-li na Nzapa.+
A yeke fâ ande azo ni na épée.+A yeke fâ yâ ti amolenge ti ala kete kete,na a yeke suru yâ ti awali ti kodro ni so ayeke na ngo.”
Akete tënë na terê ni
^ Wala “astatue so a tö wen aga ngu si a leke na ni.”
^ Na Hébreu: “ye so akanga ndö ti bê ti ala.”
^ Na Hébreu: “Ajuge.”
^ Wala “Shéol,” so ti tene dû ti kuâ so azo kue ayeke gue dä. Bâ na kete bakari.
