aJuge 12:1-15
12 A iri azo ti Éphraïm ti bungbi terê ti ala, na ala fâ ngu ala gue na Zaphon,* ala tene na Jephté: “Na ngoi so mo gue ti sara bira na azo ti Ammon, mo iri e pëpe ngbanga ti nyen?+ E yeke bungbi mo na da ti mo kue ti gbi ni.”
2 Me Jephté atene na ala: “Mbi na azo ti mbi e tiri ngangu mingi na azo ti Ammon. Mbi iri ala ti ga ti mû maboko na mbi, me ala ke ti sö mbi na maboko ti ala.
3 Tongana mbi bâ so ala ye ti sö mbi pëpe, mbi zia fini ti mbi na lê ti kuâ ti gue ti tiri na azo ti Ammon.+ Jéhovah azia ala na maboko ti mbi. Ka ndani nyen si ala ga laso ti tiri na mbi so?”
4 Jephté abungbi akoli ti kodro ti Galaad kue,+ na ala tiri na azo ti Éphraïm. Azo ti Galaad asö benda na ndö ti azo ti Éphraïm so atene na azo ti Galaad, atene: “Ala azo ti Galaad na ti Manassé so, ala yeke gï azo so akpe kodro ti Éphraïm si asara kodro na mbeni ndo nde.”
5 Azo ti Galaad ahon kozo na azo ti Éphraïm, ala mû ndo so a yeke fâ Ngu ti Jourdain dä na gere;+ tongana zo ti Éphraïm ayeke gi ti kpe, lo yeke tene: “Ala zia mbi, mbi fâ ngu ni.” Azo ti Galaad ayeke hunda lo, atene: “Mo yeke zo ti Éphraïm?” Tongana lo tene: “Ên-ën,”
6 ala yeke tene na lo, atene: “Tene Shibboleth e bâ.” Me zo ni ayeke tene: “Sibboleth” ndali ti so lo peut ti tene ni nzoni pëpe. Tongaso, ala yeke gbu lo na ala yeke fâ lo na ndo so a yeke fâ Ngu ti Jourdain dä na gere. Azo ti Éphraïm 42 000 la a fâ ala na ngoi ni so.
7 Jephté aduti juge na Israël ngu omene, na pekoni Jephté zo ti Galaad akui, na a lu lo na yâ ti gbata ti lo na Galaad.
8 Na peko ti lo, Ibzan, zo ti Bethléhem, aga juge na Israël.+
9 Lo yeke na amolenge ti koli 30 nga na amolenge ti wali 30. Lo mû amolenge ti lo ti wali ni na ambeni koli so ayeke ti mbeni mbage ti mara ti lo pëpe ti sara mariage na ala, nga lo ga na awali 30 ti tene amolenge ti lo ti koli asara mariage na ala. Lo duti juge na Israël ngu mbasambala.
10 Na pekoni, Ibzan akui, na a lu lo na Bethléhem.
11 Na peko ti lo, Élon, zo ti mara ti Zabulon, aga juge na Israël; lo duti juge na Israël ngu bale-oko.
12 Na pekoni, Élon, zo ti mara ti Zabulon, akui, na a lu lo na Aijalon na sese ti Zabulon.
13 Na peko ti lo, Abdon, molenge ti Hillel zo ti kodro ti Pirathon, aga juge na Israël.
14 Lo yeke na amolenge ti koli 40 nga na a-âta ti koli 30 so ayeke tambela na ndö ti akororo 70. Lo duti juge na Israël ngu miombe.
15 Na pekoni, Abdon, molenge ti Hillel zo ti kodro ti Pirathon, akui, na a lu lo na Pirathon na sese ti Éphraïm na yâ ti hoto ti azo ti mara ti Amalec.+
Akete tënë na terê ni
^ A lingbi nga ti tene “ala fâ ngu ala gue na mbage ti nord.”
