Apocalypse 17:1-18
-
A fâ ngbanga na ndö ti “Babylone, Ngangu gbata” (1-18)
17 Na pekoni, mbeni oko ti a-ange mbasambala+ so ayeke fade na adû ti sembe mbasambala aga, lo sara tënë na mbi, lo tene: “Ga, mbi yeke fa ande na mo ngbanga so ayeke tï na ndö ti kota wali-ndumba so aduti na ndö ti angu mingi mingi,+
2 lo so agbia ti sese asara lango-sioni*+ na lo, na ngoi so ala so ayeke sara kodro na ndö ti sese asoulé na vin ti lango-sioni* ti lo.”+
3 Lo mû mbi na yâ ti ngangu ti yingo lo gue na mbi na yâ ti benyama. Na mbi bâ mbeni wali so aduti na ndö ti mbeni bengba nyama ti ngonda so airi so azonga Nzapa asi singo na terê ti lo, nyama ni ayeke na ali mbasambala na adidi bale-oko.
4 Wali ni ayü bongo so ayeke violet+ nga bengba bengba, lo sara pendere na terê ti lo na lor, na atênë ti ngangu ngere nga na aperle.+ Mbeni kopo ti lor ayeke na maboko ti lo, so asi na aye ti saleté nga na asioni ye ti lango-sioni* ti lo.
5 Na ndö ti lê ti lo, a sû mbeni iri, mbeni tënë so zo amä yâ ni pëpe: “Babylone, Ngangu gbata, mama ti awali-ndumba+ na ti aye ti saleté ti sese so.”+
6 Mbi bâ so wali ni anyon mênë ti azo ti be-vulu nga na mênë ti atémoin ti Jésus si asoulé lo.+
Biani, so mbi bâ lo, tâ li ti mbi akpe kue.
7 Tongaso, ange ni atene na mbi: “Li ti mo akpe kue ngbanga ti nyen? Mbi yeke fa na mo nda ti tënë so zo amä yâ ni pëpe so, tënë ti wali ni+ na ti nyama ti ngonda ni so ayeke yô wali ni so, nyama so ayeke na ali mbasambala na adidi bale-oko:+
8 Nyama ti ngonda so mo bâ, lo yeke dä ândö, me lo yeke dä fadeso mbeni pëpe, lo yeke nduru ti londo na yâ ti kota dû so alï mingi+ ti sigi, na lo yeke gue ti wara futingo. Azo so ayeke sara kodro na ndö ti sese (ala so a sû iri ti ala pëpe na yâ ti rouleau ti fini+ ngbene ye so a zia gere ti dunia), li ti ala ayeke kpe ande kue na ngoi so ala yeke bâ tongana nyen nyama ti ngonda so ayeke dä ândö, me lo yeke dä fadeso mbeni pëpe, nga so lo yeke kiri ti duti ande dä.
9 “Ge la si a hunda hingango ndo nga na ndara: Ali mbasambala+ ni aye ti sara tënë ti ahoto mbasambala so wali ni aduti kâ na li ni.
10 Agbia ayeke mbasambala: Oku atï awe, oko angbâ, mbeni oko ade ti si pëpe, me tongana lo si ande, lo doit ti ngbâ teti kete ngoi.
11 Nga, nyama ti ngonda ni so lo yeke dä ândö, si lo yeke dä fadeso pëpe so,+ lo nga lo yeke mbeni miombe gbia ni, me lo sigi na yâ ti agbia mbasambala ni, na lo yeke gue ti wara futingo.
12 “Adidi bale-oko so mo bâ ayeke agbia bale-oko, so ade ala wara mbeni royaume pëpe, me ala wara komandema tongana agbia ndali ti ngbonga oko legeoko na nyama ti ngonda ni.
13 Tënë ti bê ti ala ayeke gï oko, tongaso ala mû ngangu ti ala na komandema ti ala na nyama ti ngonda ni.
14 Ala yeke tiri ande bira na Molenge ti taba ni,+ me ngbanga ti so lo yeke Seigneur ti aseigneur na Gbia ti agbia,+ lo yeke sö benda na ndö ti ala.+ Nga, ala so ayeke na terê ti lo si a iri ala, ala so a soro ala na so ayeke abe-ta-zo ayeke sö benda ande.”+
15 Lo tene na mbi: “Angu so mo bâ, so wali-ndumba ni ayeke duti na ndö ni so, ayeke azo ti kodro, gbâ ti azo, amara nga na ayanga ti kodro.+
16 Adidi bale-oko+ so mo bâ, nga na nyama ti ngonda ni,+ ala yeke ke ande wali-ndumba+ so, na ala yeke sara si lo ngbâ na ye oko pëpe na ala zia lo terê senge, na ala yeke te ande nyama ti terê ti lo si ala yeke gbi lo kue na wâ.+
17 Biani, Nzapa azia na yâ ti bê ti ala ti sara ye so ayeke na bê ti lo,+ so ti tene ti sara ye so ayeke na bê ti ala na mungo royaume ti ala na nyama ti ngonda ni+ juska atënë ti Nzapa aga tâ tënë.
18 Nga, wali+ so mo bâ lo ayeke kota gbata so ayeke na komandema na ndö ti agbia ti sese.”
Akete tënë na terê ni
^ Bâ na kete bakari.
^ Na Grec: pornéïa. Bâ na kete bakari.
^ Na Grec: pornéïa. Bâ na kete bakari.
