Esdras 4:1-24
4 Na ngoi so awato ti azo ti Juda na ti Benjamin+ amä so azo so alondo lani na ngbâa si akiri+ so ayeke leke temple na Jéhovah Nzapa ti Israël,
2 hio ala ga na terê ti Zorobabel nga na amokonzi ti ahale ti akotara ti azo ti Israël, na ala tene na ala: “Ala zia e sara kua ni legeoko na ala ma, ngbanga ti so e nga kue e yeke voro* Nzapa ti ala+ tongana ala, e ngbâ ti mû sandaga na lo ngbene ye so Ésar-Haddon,+ gbia ti Assyrie, aga na e lani na ndo so.”+
3 Me Zorobabel na Jéshua nga na tanga ti amokonzi ti ahale ti akotara ti azo ti Israël atene na ala: “Ye oko abungbi e na ala na yâ ti kua ti lekengo da ndali ti Nzapa ti e pëpe,+ e wani la e yeke leke da ni na Jéhovah Nzapa ti Israël alingbi na yanga so Cyrus, gbia ti Perse, amû na e.”+
4 Tongaso, azo ti akodro so angoro ala ayeke sara lakue ti tene bê ti azo ti Juda anze* nga ala yeke zia mbeto na yâ ti ala si ala sara kua ti da ni pëpe.+
5 Ala futa awamungo wango ti tene ala mû asioni wango na azo ti Israël ti buba yâ ti aye so ala ye ti sara,+ ala sara tongaso na ngoi kue so Cyrus, gbia ti Perse, ayeke komande juska ti si na gbe ti komandema ti Darius,+ gbia ti Perse.
6 Na tongo nda ti komandema ti Assuérus, ala sû mbeni mbeti ti bi tënë na li ti azo ti Juda na ti Jérusalem.
7 Na ngoi ti komandema ti Artaxerxès, gbia ti Perse, Bishlam, Mithrédath, Tabéel nga na tanga ti amba ti lo awakua, asû mbeti ala tokua na Gbia Artaxerxès. Ala kiri peko ti mbeti ni na yanga ti Araméen,+ na ala sû ni na kode ti sungo agere-mbeti* ti yanga ti Araméen.
8 * Réhum so ayeke kota mokonzi ti gouvernement ni na Shimshaï so ayeke wakuasu ni adë mbeti na terê ti azo ti Jérusalem, ala tokua ni na gbia Artaxerxès; mbeti ni atene:
9 (Mbeti ni so alondo na Réhum kota mokonzi ti gouvernement, Shimshaï wakuasu ni nga na amba ti ala awakua, ajuge, akete gouverneur, awakuasu, azo ti kodro ti Érek,+ azo ti Babylone, azo ti kodro ti Suse,+ so ti tene azo ti Élam,+
10 tanga ti azo ti kodro ni, ala so kota zo Asenappar,* so iri ti lo awu mingi, agbu ala ândö ahon na ni si ala sara kodro na gbata ti Samarie,+ na tanga ti azo ti ando so ayeke na Mbage ti ngu;
11 bâ copie ti mbeti ni so ala tokua na lo la.)
“Gbia Artaxerxès, awakua ti mo atokua mbeti so na mo, azo ti ando so ayeke na Mbage ti ngu: fadeso
12 gbia, a yeke nzoni mo hinga so aJuif so alondo lani na mo kâ so, ala si na e ge na Jérusalem awe. Ala yeke leke gbata ti azo ti kpengba-li nga ti azo ti sioni so, ala ngbâ ti hunzi kua ti lekengo agbagba ni+ na ala yeke leke agere ti gbata ni.
13 Gbia, a yeke nzoni mo hinga so tongana azo so akiri aleke gbata ni so nga ala hunzi ti leke agbagba ni, ala yeke futa ande impôt wala douane+ wala impôt ndali ti lege pëpe, na ye so ayeke sara ande si wungo ti nginza so ayeke lï na yâ ti asanduku ti agbia ayeke kiri na peko.
14 So e yeke te ingo so alondo na yangbo* ti gbia, e bâ so a yeke na lege ni pëpe ti tene azo abuba aye ti gbia, ni la e tokua mbeti so ti sara tënë ni na gbia,
15 tongaso si a lingbi a gi nda ti tënë so na yâ ti ambeti ti mbaï ti akotara ti mo.+ Tongana mo diko mbeti ti mbaï ni, mo yeke hinga so azo ti gbata so asara lani kpengba-li, ala zonga agbia na akodro-komanda. Nga, na popo ti ala a yeke wara azo so aninga awe la si ala yeke pusu ka amba ti ala ti ke yanga ti azo ti komande. A yeke ngbanga ni la si a futi ândö gbata ni so.+
16 E ye ti tene na mo gbia, so tongana mo zia si ala kiri aleke gbata ni nga si gbagba ni ahunzi, fade ando so ayeke na Mbage ti ngu so ayeke duti na gbe ti mo encore ape.”+
17 Gbia ni akiri tënë na Réhum kota mokonzi ti gouvernement na Shimshaï wakuasu ni na amba ti ala awakua so ayeke na Samarie nga na tanga ti azo ti ando so ayeke na Mbage ti ngu ni, lo tene:
“Bara ala! Fadeso
18 mbeti so ala tokua na e so, a diko ni mbilimbili na lê ti mbi.
19 Mbi mû yanga lani si a gi nda ti tënë ni nzoni, na a ga ti bâ so ândö azo ti gbata so alondo ti ke agbia, ala sara kpengba-li nga aye ti wusuwusu aduti lani kâ.+
20 Agbia so ayeke ngangu mingi la ayeke komande lani na ndö ti Jérusalem na ala komande lani ando kue so ayeke na Mbage ti ngu ni, azo ayeke futa lani na ala douane, impôt so ala doit ti futa nga na impôt ndali ti lege.
21 Fadeso mbi mû yanga ti tene azo so akaï kua ni: ala yeke kiri ti leke gbata ni pëpe juska mbi kiri mbi mû yanga si.
22 Lê ti ala akpengba ti bâ si a sara ye ague nde na tënë so pëpe, si azo akiri abuba aye ti agbia ahon ndö ni pëpe.”+
23 Na peko ti so a diko copie ti mbeti ti Gbia Artaxerxès so na lê ti Réhum na Shimshaï, wakuasu ni, na amba ti ala awakua awe, ala londo hio ala gue na aJuif so ayeke na Jérusalem na ala pusu ala na ngangu ti zia lege ti kua ni.
24 A yeke tongaso si kua ti lekengo da ti Nzapa so ayeke na Jérusalem aluti. Kua ni aluti juska na yâ ti use ngu ti komandema ti Darius, gbia ti Perse.+
Akete tënë na terê ni
^ Na Hébreu: “gi Nzapa.”
^ Na Hébreu: “sara si maboko ti azo ni afatigué.”
^ A lingbi nga ti tene “ala sû ni na yanga ti Araméen si ala kiri peko ni na mbeni yanga nde.”
^ So ti tene Ashurbanipal.
^ Wala “e yeke wara nginza ti e na mbage ti yangbo.”
