Esdras 8:1-36
8 Azo so ayeke amokonzi na ndö ti ahale ti akotara ti ala nga na azo so a sû iri ti ala na mbeti na lege ti akotara ti ala, ala so na ngoi ti komandema ti Gbia Artaxerxès mbi na ala e sigi lani legeoko na Babylone la:+
2 Guershom mokonzi ti ahale ti Phinéhas;+ Daniel mokonzi ti ahale ti Ithamar;+ Hattush mokonzi ti ahale ti David;
3 Zacharie mokonzi ti ahale ti Shécaniah, ti ahale ti Parosh, nga na terê ti lo akoli 150 so a sû iri ti ala na mbeti na lege ti akotara ti ala;
4 Éliého-Énaï, molenge ti Zérahiah, lo yeke mokonzi ti ahale ti Pahath-Moab,+ na terê ti lo akoli 200;
5 Shécaniah, molenge ti Jahaziël mokonzi ti ahale ti Zattu,+ na terê ti lo akoli 300;
6 Ébed, molenge ti Jonathan mokonzi ti ahale ti Adin,+ na terê ti lo akoli 50;
7 Jéshaïah, molenge ti Athaliah mokonzi ti ahale ti Élam,+ na terê ti lo akoli 70;
8 Zébadiah, molenge ti Michel mokonzi ti ahale ti Shéphatiah,+ na terê ti lo akoli 80;
9 Obadiah, molenge ti Jéhiel mokonzi ti ahale ti Joab, na terê ti lo akoli 218;
10 Shélomith, molenge ti Josiphiah mokonzi ti ahale ti Bani, na terê ti lo akoli 160;
11 Zacharie, molenge ti Bébaï+ mokonzi ti ahale ti Bébaï, na terê ti lo akoli 28;
12 Johanan, molenge ti Haccatan mokonzi ti ahale ti Azgad,+ na terê ti lo akoli 110;
13 Éliphélet, Jéïel na Shémaïah so ayeke andangba zo ni, ala si ayeke amokonzi ti ahale ti Adonicam,+ na terê ti ala akoli 60;
14 Uthaï na Zabbud amokonzi ti ahale ti Bigvaï,+ na terê ti ala akoli 70.
15 Mbi bungbi ala na terê ti kota ngu so ayeke sua ti gue na mbage ti Ahava,+ na e sara camp ti e na ndo so lango ota. Me tongana mbi gi ndo na popo ti azo ni nga na popo ti aprêtre, mbi wara mbeni hale ti azo ti mara ti Lévi oko pëpe.
16 Tongaso, mbi tokua a iri na mbi Éliézer, Ariel, Shémaïah, Elnathan, Jarib, Elnathan, Nathan, Zacharie na Méshullam so ayeke na li ti azo ni, nga na Joïarib na Elnathan, so ayeke awafango ye.
17 Na pekoni mbi tokua ala na Iddo, lo so lo yeke mokonzi na li ti ndo so a iri ni Casiphia. Mbi tene na ala, ti tene ala tene na Iddo nga na aita ti lo, azo ti kua ti temple* so ayeke na Casiphia, ti ga na azo ti sara kua ndali ti da ti Nzapa ti e.
18 Ndali ti so maboko ti Nzapa ti e ayeke na ndö ti e, ala ga na e mbeni koli so lê ti lo ahan, lo yeke ti ahale ti Mahli.+ Mahli ayeke mbeni âta ti Lévi, Lévi ayeke molenge ti Israël, iri ti koli ni so ayeke Shérébiah,+ lo na amolenge ti lo ti koli nga na aita ti lo, wungo ti ala ayeke 18.
19 Ala ga nga na Hashabiah, na terê ti lo Jéshaïah so ayeke ti ahale ti Mérari,+ na aita ti lo nga na amolenge ti ala ti koli, wungo ti ala ayeke 20.
20 Ala ga nga na akoli 220 so ayeke azo ti kua ti temple,* ala so David nga na amokonzi amû ala ândö na azo ti mara ti Lévi ti sara kua na terê ti ala, a sû iri ti ala kue na mbeti.
21 Tongaso na terê ti ngu ti Ahava mbi mû yanga ti tene e mû jeûne, si e sara terê ti e kete na lê ti Nzapa ti e, si e hunda lo ti fa lege na e na amolenge ti e nga na akungba ti e kue na yâ ti tambela so e ye ti gue so.
22 Kamene asara mbi lani ti hunda na gbia ti mû na mbi aturugu nga na azo ti kpengo na mbarata ti tene abata e na lege ndali ti awato ti e, ngbanga ti so e tene lani na gbia, e tene: “Maboko ti Nzapa ti e ayeke na ndö ti azo kue so ayeke gi lo,+ me ngangu ti lo nga na ngonzo ti lo ayeke na terê ti azo kue so adö lo azia.”+
23 Tongaso e mû jeûne na e hunda Nzapa ti e ti fa lege na e, na lo mä sambela ti e.+
24 Na pekoni, mbi soro na popo ti amokonzi ti aprêtre, akoli 12, zo tongana Shérébiah na Hashabiah+ legeoko na ambeni ita ti ala bale-oko.
25 Tongaso mbi pesé argent na lor nga na akungba, amatabisi so gbia na awamungo wango ti lo na amokonzi ti lo nga na azo ti Israël kue so ayeke lani dä amû ndali ti da ti Nzapa ti e,+ mbi mû ni mbi mû na ala.
26 Mbi pesé argent ane kilo 22 230, asembe nde nde ti argent wungo ni ayeke 100 so ngere ni alingbi na talent* 2, na lor so ane kilo 3 420 mbi mû na ala;
27 mbi pesé nga akete dû ti sembe 20 so ane daric* 1 000 nga akota sembe* use so a sara ni na pendere cuivre ti bengba so aza pendere, so ngere ni ayeke tongana ti lor.
28 Na pekoni mbi tene na ala: “Ala yeke azo so ayeke nzoni-kue ndali ti Jéhovah,+ na akungba so ayeke nzoni-kue, argent ni na lor ni ayeke aye so azo amû na bê ti ala wani na Jéhovah Nzapa ti akotara ti ala.
29 Ala bata ni nzoni juska ala pesé ni na yâ ti akubu* ti da ti Jéhovah, na lê ti amokonzi ti aprêtre, na lê ti azo ti mara ti Lévi nga na lê ti amokonzi ti ahale ti akotara ti azo ti Israël so ayeke na Jérusalem.”+
30 Aprêtre ni na azo ti mara ti Lévi amû argent ni, lor ni nga na akungba ni so mbi pesé ni na ala so, ti gue na ni na Jérusalem na da ti Nzapa ti e.
31 Na nda ni, na lango 12 ti kozo nze,+ e londo na terê ti ngu ti Ahava+ ti gue na Jérusalem; maboko ti Nzapa ti e ayeke na ndö ti e na lo bata e si e tï na maboko ti awato pëpe nga e tï pëpe na maboko ti azo so ayeke honde terê ti ala na terê ti lege ti sara sioni na azo.
32 Tongana e si na Jérusalem,+ e wu terê ti e lango ota.
33 A si na lango osio ni, e pesé argent ni, lor ni nga na akungba ni na yâ ti da ti Nzapa ti e+ na e mû ni na Mérémoth,+ lo yeke molenge ti prêtre Urie, na terê ti lo a yeke wara Éléazar molenge ti Phinéhas nga na Jozabad+ molenge ti Jéshua, Noadiah molenge ti Binnui+ so ayeke azo ti mara ti Lévi.
34 E diko ye ni kue nga e pesé ni, na a sû nengo ni kue na mbeti.
35 Azo so a gbu ala ândö a gue na ala na ngbâa si ala kiri so, ala mû asandaga na Nzapa ti Israël, asandaga so a zö ni agbi kue. Ala mû akoli-bagara 12,+ akoli-taba 96,+ akete koli-taba 77 nga na akoli-ngasa 12+ na sandaga ndali ti siokpari. A yâa anyama so kue na sandaga so a zö ni agbi kue na Jéhovah.+
36 Na pekoni e mû ambela ti gbia+ e mû na asatrape* ti gbia, na agouverneur ti ando so ayeke na Mbage ti ngu ni,*+ na ala mû maboko na azo ti Israël nga na da ti tâ Nzapa.+
Akete tënë na terê ni
^ Wala “aNéthinim.” Na Hébreu: “azo so a mû ala tongana matabisi.”
^ Wala “aNéthinim.” Na Hébreu: “azo so a mû ala tongana matabisi.”
^ Na Hébreu: “akungba.”
^ Wala “ando ti tengo kobe.”
^ Ndani aye ti tene “azo ti batango kodro.” Ge a ye ti sara tënë ti agouverneur ti akodro-komanda ti sese ti Perse.
^ So ti tene Ngu ti Euphrate.
