Exode 21:1-36
21 “So ayeke ambela so mo yeke fa na ala la:+
2 “Tongana mo vo mbeni ngbâa so ayeke Hébreu,+ lo yeke duti ngbâa ti mo ngu omene, me na ngu mbasambala ni mo yeke zi lo sân ti tene lo futa mbeni ye.+
3 Tongana lo ga lani na da ti mo gï lo oko, lo yeke sigi ande lo oko. Tongana lo yeke na wali, wali ti lo ayeke gue legeoko na lo.
4 Tongana wa ti lo amû na lo mbeni wali, si wali ni adü na lo amolenge ti koli wala amolenge ti wali, wali ni na amolenge ni ayeke ga ti wa ti lo, na ngbâa ni ayeke hon gï lo oko.+
5 Me tongana ngbâa ni ake, lo tene: ‘Mbi ye wa ti mbi, wali ti mbi na amolenge ti mbi mingi; mbi ye a zi mbi pëpe’,+
6 wa ti lo ni ayeke ga na lo na gbele tâ Nzapa. Na pekoni, lo gue na lo na terê ti yanga-da wala na terê ti cadre ti porte; lo yeke kôro mê ti lo na mbeni suä, lo yeke duti ngbâa ti lo na yâ ti gigi ti lo kue.
7 “Tongana mbeni zo akä molenge ti lo ti wali na ngbâa, a yeke zi molenge-wali ni pëpe tongana ti so a zi na mbeni koli so ayeke ngbâa.
8 Tongana lo nzere na lê ti wa ti lo ni pëpe si wa ti lo ni ake ti mû lo ti ga wali ti lo ti use ndo me lo sara ti tene mbeni zo nde la avo wali ni so,* wa ti lo ni ayeke na droit pëpe ti kä lo na awande, ndali ti so lo sara ye na lo na lege ni pëpe.
9 Me tongana lo mû lo ti ga wali ti molenge ti lo, fade lo mû na lo droit ti molenge-wali.
10 Tongana lo mû mbeni wali nde, a lingbi lo kiri na wungo ti kobe, na bongo ti kozo wali ni so na gbe ni pëpe nga lo ngbâ ti duti na lo koli na wali.*+
11 Tongana lo mû aye ota so na wali ni pëpe, fade wali ni asigi senge senge sân ti futa nginza.
12 “Zo so apika mbeni zo si zo ni akui, a lingbi a fâ lo.+
13 Me tongana lo fâ zo ni na mbana pëpe, tâ Nzapa si azia ye ni asi, mbi yeke fa na mo mbeni ndo so zo ni alingbi ti kpe dä.+
14 Tongana mbeni zo asara ngonzo na terê ti mba ti lo si na nda ni lo fâ lo na mbana,+ atâa lo kpe lo gue na terê ti gbalaka ti mbi, a lingbi mo fâ lo.+
15 Zo so apika babâ ti lo wala mama ti lo, a lingbi a fâ lo.+
16 “Zo so agbu mbeni zo na ngangu lo hon na lo,+ lo gue lo kä lo, wala tongana a wara zo ni na maboko ti lo,+ a lingbi a fâ lo.+
17 “Zo so adeba* babâ ti lo wala mama ti lo, a lingbi a fâ lo.+
18 “Bâ ye so ayeke si tongana azo ayô papa, na mbeni oko apika mba ti lo na tênë wala lo kpo lo na gobo* na zo ni akui pëpe me lo ngbâ na gbogbo:
19 tongana zo ni alingbi ti londo ti gbu mbeni keke ti tambela ti sigi na gigi, a lingbi a punir pëpe zo so apika lo so. Lo yeke futa mbeni ye gï ndali ti ngoi so zo ni awara lege ti sara kua pëpe so juska zo ni asava kue kue kue.
20 “Tongana mbeni zo apika ngbâa ti lo ti koli wala ngbâa ti lo ti wali na keke si lo kui na maboko ti lo, a lingbi a kiri na lo peko ti sioni so lo sara na ngbâa ni so.+
21 Ye oko, tongana lo ngbâ na fini lango oko wala lango use, fade a kiri na lo peko ti sioni so lo sara so pëpe, ngbanga ti so lo vo ngbâa ni vongo na nginza ti lo.
22 “Tongana azo ayeke tiri, na ala pusu mbeni mama ti ngo si molenge ti lo asigi kozo na ngoi ti dungo lo,*+ me kuâ* asi dä pëpe, a lingbi a hunda na lo so asara ye ni so ti futa mbeni ye alingbi na ye so koli ti wali ni ahunda na lo; lo yeke futa ni na gbele ajuge.+
23 Me tongana kuâ asi na pekoni, a lingbi mo mû fini na place ti fini,*+
24 lê na place ti lê, pembe na place ti pembe, maboko na place ti maboko, gere na place ti gere,+
25 kä ti wâ na place ti kä ti wâ, kä na place ti kä, gobo na place ti gobo.
26 “Tongana mbeni zo apika lê ti ngbâa ti lo ti koli wala lê ti ngbâa ti lo ti wali si abuba, lo yeke zi ngbâa ni na place ti lê ti lo ni.+
27 Tongana lo fâ pembe ti ngbâa ti lo ti koli wala ti ngbâa ti lo ti wali, lo yeke zi ngbâa ni na place ti pembe ti lo ni.
28 “Tongana bagara akpo mbeni koli wala mbeni wali si zo ni akui, a yeke bo bagara ni na tênë juska a fâ lo,+ a yeke te nyama ti lo pëpe, nga a yeke punir wa ti bagara ni pëpe.
29 Me tongana bagara ni ayeke kpo ka azo, na a sara tënë ni na wa ti bagara ni me lo yeke kanga ka bagara ni pëpe, si bagara ni akpo mbeni koli wala wali na kuâ, a yeke bo bagara ni juska a fâ lo, a yeke fâ nga wa ti bagara ni.
30 Tongana a hunda na lo ti futa mbeni ye* ti kanga lê ti kpale ni, lo yeke futa ye so a hunda na lo ti mû ti sö na fini* ti lo alingbi na ye kue so a yeke hunda na lo ti futa.
31 Tongana bagara ni akpo mbeni molenge-koli wala mbeni molenge-wali, a lingbi a sara ye na wa ti bagara ni alingbi na mbela so.
32 Tongana bagara akpo mbeni ngbâa ti koli wala ngbâa ti wali, wa ti bagara ni ayeke futa sicle* 30 na wa ti ngbâa ni, a yeke bo bagara ni na tênë juska lo kui.
33 “Tongana mbeni zo azia yanga ti mbeni dû senge, wala lo zi mbeni dû si lo kanga yanga ni pëpe na bagara wala kororo atï na yâ ni,
34 wa ti dû ni ayeke futa mbeni ye na place ni.+ Lo yeke futa ngere ti nyama ni na wa ti nyama ni, na kuâ ti nyama ni ayeke ga ti lo.
35 Tongana bagara ti mbeni zo akpo bagara ti mba ti lo si bagara ni so akui, ala yeke kä bagara ni so angbâ na fini so na ala kangbi yâ ti nginza ni. Ala kangbi nga yâ ti kuâ ti bagara ni so.
36 Nga, tongana azo ahinga so bagara ni so ayeke kpo ka amba ti lo, me wa ti lo ayeke kanga ka lo pëpe, lo yeke futa mbeni ye biani, lo yeke mû bagara na place ti bagara, na kuâ ti bagara ni so ayeke ga ti lo.
Akete tënë na terê ni
^ Na Hébreu: “a futa mbeni ye na place ti lo ti zi lo.”
^ Na Hébreu: ti mû na lo “ye ti lo ti mariage.”
^ Wala “airi sioni na ndö ti.”
^ A lingbi nga ti tene “na mbeni ye ti kua.”
^ Na Hébreu: “si molenge ti lo asigi.”
^ Wala “kota kä.”
^ Wala “âme na place ti âme.”
^ Wala “ti leke mbeni ye.”
^ Wala “na âme.”
