Job 1:1-22
1 Mbeni koli ayeke ândö na kodro ti Uz; iri ti lo ayeke Job.*+ Lo yeke mbeni koli so ayeke sara ye lakue mbilimbili;*+ lo kpe mbeto ti Nzapa nga lo kpe ye ti sioni.+
2 Lo dü amolenge-koli mbasambala nga na amolenge-wali ota.
3 Lo yeke na ataba 7 000, achameau 3 000, abagara 1 000,* akororo 500* nga na gbâ ti azo ti kua; aye so asara si lo yeke kota ahon tanga ti azo ti Est kue.
4 Amolenge ti lo ti koli ayeke sara ka matanga na da ti ala wani, zo oko oko na lango ti lo wani.* Ala yeke tisa ka aita ti ala ti wali ota so ti tene ala na ala ate kobe nga anyon ye.
5 Tongana ala sara amatanga ni oko na oko kue awe, Job ayeke tokua yanga na ala ti sara si ala ga nzoni. Na pekoni, lo yeke londo hio na ndapre, lo yeke mû asandaga so a zö ni agbi kue+ teti ala oko oko kue. Ndali ti so Job atene: “Peut-être amolenge ti mbi asara siokpari nga ala zonga Nzapa na yâ ti bê ti ala.” Ye so Job ayeke sara ka la.+
6 Mbeni lâ, amolenge ti tâ Nzapa*+ aga aluti na gbele Jéhovah,+ Satan+ nga kue aga na popo ti ala.+
7 Jéhovah atene na Satan: “Mo londo na ndo wa?” Satan angbâ atene na Jéhovah: “Mbi londo na ndö ti sese, ndo so mbi yeke tambela dä ti bâ ndo.”+
8 Jéhovah atene na Satan: “Mo bâ* wakua ti mbi Job? Na ndö ti sese, mbeni zo tongana lo ayeke dä pëpe. Lo yeke mbeni koli so ayeke sara ye lakue mbilimbili,*+ lo kpe mbeto ti Nzapa nga lo kpe ye ti sioni.”
9 Satan atene na Jéhovah: “A yeke senge la Job akpe mbeto ti Nzapa so?+
10 Mo sara gbagba na terê ti lo,+ na terê ti da ti lo nga na aye ti lo kue ape? Tufa ti mo ayeke na ndö ti akua so lo yeke sara,+ nga anyama ti lo aga gbani na yâ ti kodro ni.
11 Me ti fadeso, yôro maboko ti mo, mo ndu aye ti lo kue, ti tâ tënë ni lo yeke zonga mo tâ na lê ti mo.”
12 Jéhovah atene na Satan: “Bâ, aye ti lo kue ayeke na yâ ti maboko ti mo.* Me mo yôro maboko na terê ti lo pëpe.” Tongaso, Satan asigi na gbele* Jéhovah, lo hon.+
13 Na ngoi so amolenge ti Job ti koli na ti wali ayeke te ye nga ala yeke nyon ye na da ti yaya ti ala kue,+
14 mbeni zo ti tokua aga atene na Job, atene: “Abagara ayeke fâ yaka nga akororo ayeke te pere na terê ti ala
15 na ngoi so azo ti Saba aga amû ala ahon na ni, nga ala fâ azo ti kua ni na épée. Gï mbi oko la mbi kpe na yâ ti maboko ti ala, si mbi ga ti tene na mo so.”
16 Na ndembe so lo ngbâ ti sara tënë, mbeni nde aga, atene: “Wâ alondo na Nzapa* na yayu atï na ndö ti ataba na azo ti kua ni agbi ala kue! Gï mbi oko la mbi sö kuâ, si mbi ga ti tene na mo so.”
17 Na ndembe so lo ngbâ ti sara tënë, mbeni nde aga, atene: “Azo ti Chaldée+ akangbi yâ ti terê ti ala ota, ala ga ala gbu achameau ala hon na ala, nga ala fâ azo ti kua ni na épée. Gï mbi oko la mbi kpe na yâ ti maboko ti ala, si mbi ga ti tene na mo so.”
18 Na ndembe so lo ngbâ ti sara tënë, mbeni nde akiri aga, atene: “Amolenge ti mo ti koli na ti wali ayeke te ye nga ala yeke nyon vin na yâ ti da ti yaya ti ala kue.
19 Mo ye ti bâ, mbeni kota pupu alondo na yâ ti benyama aya akungbi acoin ti da ni osio kue, si da ni atï na ndö ti amaseka so, afâ ala. Gï mbi oko la mbi sö kuâ, si mbi ga ti tene na mo so.”
20 Na mango atënë so, Job alondo, lo suru bongo na terê ti lo nga lo fâ kuä ti li ti lo kue. Na pekoni, lo kpo li ti lo na sese,
21 lo tene:
“Mbi sigi na yâ ti mama ti mbi terê senge,mbi yeke kiri nga terê senge.+
Jéhovah amû ye,+ Jéhovah akiri amû ye ti lo.
Zia iri ti Jéhovah angbâ lakue ti wara gonda.”
22 Na yâ ti aye so kue, Job asara siokpari pëpe wala lo tene pëpe so Nzapa asara mbeni ye ti sioni.*
Akete tënë na terê ni
^ Wala “tënë ayeke na li ti lo pëpe nga lo yeke sara ye na lege ni.”
^ Peut-être a ye ti tene “Ye so a ke ni.”
^ Na Hébreu: “abagara use use, fani 500.”
^ Na Hébreu: “amama ti kororo.”
^ Wala “na da ti zo oko oko tongana a si tour ti lo.”
^ Wala “a-ange.”
^ Na Hébreu: “zia bê ti mo na ndö ti.”
^ Wala “tënë ayeke na li ti lo pëpe nga lo yeke sara ye na lege ni.”
^ Wala “mo yeke na ngangu na ndö ti aye ti lo kue.”
^ Na Hébreu: “na gbe ti lê ti.”
^ A lingbi nga ti tene “Wâ ti bekpa alondo.”
^ Wala “lo bi tënë ti mbeni ye ti sioni na li ti Nzapa pëpe.”
