Job 2:1-13
2 Mbeni ngoi na pekoni, amolenge ti tâ Nzapa*+ aga aluti na gbele Jéhovah,+ Satan nga kue aga na popo ti ala, lo luti na gbele Jéhovah.+
2 Jéhovah atene na Satan: “Mo londo na ndo wa?” Satan angbâ atene na Jéhovah: “Mbi londo na ndö ti sese, ndo so mbi yeke tambela dä ti bâ ndo.”+
3 Jéhovah atene na Satan: “Mo bâ* wakua ti mbi Job? Na ndö ti sese, mbeni zo tongana lo ayeke dä pëpe. Lo yeke mbeni koli so ayeke sara ye lakue mbilimbili,*+ lo kpe mbeto ti Nzapa nga lo kpe ye ti sioni. Atâa so mo tara ti pusu mbi ti futi* lo senge senge, lo ngbâ lakue ti sara ye mbilimbili.”+
4 Me Satan akiri tënë na Jéhovah, atene: “Poro ti terê na place ti poro ti terê. Zo ayeke mû ye kue so lo yeke na ni ti sö na fini* ti lo.
5 Me ti fadeso, yôro maboko ti mo, mo ndu bio ti lo nga na nyama ti terê ti lo, ti tâ tënë ni lo yeke zonga mo tâ na lê ti mo.”+
6 Jéhovah atene na Satan: “Bâ, lo yeke na yâ ti maboko ti mo.* Me mo mû fini* ti lo pëpe!”
7 Tongaso, Satan asigi na gbele* Jéhovah, lo hon, na pekoni lo sara si furoncle so ason mingi*+ amû terê ti Job kue, a komanse na gbe ti gere ti lo juska na li ti lo.
8 Job amû fango ta si lo yeke kpaka na terê ti lo; nga lo duti na yâ ti mburu ti wâ.+
9 Wali ti Job abâ gbä atene na lo: “Mo ngbâ lakue ti sara ye mbilimbili? Zonga Nzapa mo kui ma!”
10 Me Job atene na lo: “Mo yeke sara tënë tongana mbeni wali so li ti lo ayeke dä pëpe. A lingbi e yeda gï na nzoni ye so alondo na tâ Nzapa? na e yeda nga pëpe na ye so ayeke sioni?”+ Atâa aye so kue, Job asara siokpari na yanga ti lo pëpe.+
11 Akamarade ti Job ota* amä tënë ti aye ti vundu kue so asi na lo, na zo oko oko alondo na kodro ti lo aga: Éliphaz+ zo ti Théman, Bildad+ zo ti mara ti Shuah+ na Zophar+ zo ti Naama. Ala mä terê ti tene ala wara terê si ala gue akangbi vundu na Job nga ala dë bê ti lo.
12 Na ngoi so ala ngbâ yongoro si ala bâ lo, ala girisa lo. Ala tï na toto, ala toto ngangu, ala suru bongo na terê ti ala nga ala tuku fuku ti sese na nduzu nga na li ti ala.+
13 Ala duti na sese na terê ti lo lâ mbasambala na bï mbasambala. Zo oko azi yanga na lo pëpe, teti ala bâ so pasi ti lo ni ayeke mingi.+
Akete tënë na terê ni
^ Wala “a-ange.”
^ Na Hébreu: “zia bê ti mo na ndö ti.”
^ Wala “tënë ayeke na li ti lo pëpe nga lo yeke sara ye na lege ni.”
^ Na Hébreu: “mene.”
^ Wala “âme.”
^ Wala “âme.”
^ Wala “mo yeke na ngangu na ndö ti lo.”
^ Na Hébreu: “na gbe ti lê.”
^ Wala “akä so ason mingi.”
^ Wala “Azo ota so Job ahinga ala.”
