Job 32:1-22
32 Tongaso akoli ota so azia ti tara ti sara tënë na Job, ndali ti so, na lê ti lo, lo yeke zo ti mbilimbili.+
2 Me ngonzo agbu Élihu ngangu, molenge ti Barakel, zo ti Buz+ so ayeke ti sewa ti Ram. Ngonzo ti lo aza wâ na terê ti Job ndali ti so lo tara ti fa so lo la lo yeke* mbilimbili, ahon ti fa so a yeke Nzapa.+
3 Ngonzo asara nga lo mingi na terê ti akamarade ti Job ota ndali ti so ala wara mbeni tënë ti kiri na ni na Job pëpe, me ala tene so Nzapa ayeke sioni.+
4 Élihu aku ngbii si lo sara tënë na Job, ndali ti so ngu ti ala kue ahon ti lo.+
5 Tongana Élihu abâ so akoli ota so ayeke na mbeni tënë ti kiri na ni pëpe, ngonzo ti lo aga wâ.
6 Tongaso Élihu, molenge ti Barakel zo ti Buz, amû tënë, atene:
“Mbi de maseka*nga ngu ti ala ahon ti mbi,+tongaso na nengo zo mbi ke ti zi yanga+nga mbi ye pëpe ti tene na ala ye so mbi hinga.
7 Na yâ ti bê ti mbi, mbi tene: ‘A yeke nzoni azo so ngu* ti ala ayeke mingi asara tënë,nga a yeke nzoni azo so ngu ti ala awu afa ndara.’
8 Me a yeke yingo ti Nzapa so lo mû na azo,pupu ti Lo so ngangu ti lo ahon angangu kue la asara si ala mä yâ ti aye.+
9 Gï dutingo na ngu mingi* la alingbi ti sara si zo aga zo ti ndara pëpe,nga a yeke pëpe gï ambakoro la ahinga ye so ayeke na lege ni.+
10 Ni la mbi tene: ‘Ala mä mbi si,na mbi nga mbi yeke fa na ala ye so mbi hinga.’
11 Ala bâ, mbi ku ti mä tënë so ala yeke tene,mê ti mbi ayeke mä atënë ti bê ti ala,+na ngoi so ala yeke gi atënë so ala lingbi ti tene.+
12 Mbi dengi mê na atënë ti ala,me mbeni zo ti fa so Job ayeke na raison pëpe* ayeke dä pëpe,wala mbeni zo ti fa so atënë ti Job ayeke na lege ni pëpe ayeke dä pëpe.
13 Tongaso, ala tene pëpe: ‘E wara ndara awe;Nzapa la ake na lo, me zo pëpe.’
14 Lo tene atënë ni na terê ti mbi pëpe,ni la a yeke pëpe atënë ti ala la mbi yeke mû ti kiri tënë na lo.
15 Li ti ala aga kirikiri, ala yeke na mbeni tënë ti kiri na ni pëpe;tënë ahunzi na yanga ti ala awe.
16 Mbi ku, me ala kaï ti sara tënë;ala luti gï tongaso, tënë ahunzi na yanga ti ala awe.
17 Tongaso, mbi nga mbi yeke sara tënë;mbi nga mbi yeke fa ye so mbi hinga;
18 ndali ti so tënë asi mbi singo;yingo so ayeke na yâ ti mbi ayeke pusu mbi ti sara tënë.
19 Bê ti mbi ayeke kporo kporongo,a yeke tongana fini bozo ti vin so aye ti sungba.+
20 Ala zia mbi sara tënë, si bê ti mbi adë!
Mbi yeke zi yanga ti sara tënë.
21 Mbi yeke mû ande mbage ti mbeni zo pëpe;+nga mbi yeke tene ande nzoni tënë ti mbeni zo ngbanga ti lê ti lo pëpe;*
22 mbi hinga pëpe ti tene nzoni tënë ti zo ngbanga ti lê ti lo;tongana mbi sara tongaso, Zo so asara mbi ayeke futi mbi hio.
Akete tënë na terê ni
^ Wala “âme ti lo ayeke.”
^ Na Hébreu: “Lango ti mbi ayeke kete.”
^ Na Hébreu: “lango.”
^ Wala “Gï gbâ ti alango.”
^ Wala “mbeni zo ti ke na Job.”
^ Wala “mbi yeke yâa iri ti mbeni zo pëpe.”
