Job 33:1-33
33 “Me fadeso, pardon Job, mo mä tënë ti mbi si,mä tënë kue so ayeke sigi na yanga ti mbi.
2 Pardon, mbi yeke zi yanga;a lingbi mbi zi yanga,* mbi sara tënë.
3 Atënë ti mbi ayeke fa mbilimbili ti bê ti mbi,+nga langue ti mbi ayeke fa biani ye so mbi hinga.
4 Yingo ti Nzapa la asara mbi,+nga pupu ti yanga ti Lo so ngangu ti lo ahon angangu kue la asara si mbi wara fini.+
5 Tongana mo lingbi, mo kiri tënë na mbi ma;fa atënë ti mo na gbele mbi; leke terê ti mo ti kiri tënë.
6 Bâ! Dutingo ti mbi na ti mo ayeke legeoko na gbele tâ Nzapa;mbi nga kue a sara mbi na popoto.+
7 Tongaso, mbi ye si mbeto ti mbi ahon ndö ti mo pëpe,nga mbi yeke tene na mo pëpe mbeni tënë so ane na ndö ti mo.
8 Me mbi mä mo fade,ti tâ tënë ni, mbi mä, mo tene:
9 ‘Bê ti mbi avuru, mbi sara mbeni ye ti ke ndia pëpe;+sioni ye ayeke na yâ ti mbi pëpe, mbi sara faute pëpe.+
10 Me Nzapa agi ambeni raison ti ke mbi;lo bâ mbi tongana wato ti lo.+
11 Lo yôro gere ti mbi na yâ ti olombo;ndo kue so mbi gue dä, lê ti lo gï dä.’+
12 Me mo yeke na raison pëpe, ni la mbi yeke kiri tënë na mo:
Nzapa ayeke kota mingi ahon zo ti sese.+
13 Ngbanga ti nyen mo yeke dema na terê ti lo?+
A yeke ndali ti so lo kiri tënë na mo kue ape?+
14 Nzapa asara tënë fani oko, nga ti fani use ni,me zo oko adengi mê pëpe;
15 lo sara tënë na yâ ti bango li, na yâ ti vision na bï,+na ngoi so azo atï na kota lango,na ngoi so ala yeke lango na ndö ti gbogbo ti ala.
16 Na pekoni, lo zi mê ti ala,+na lo sara si afango ye ti lo alï na yâ ti mê ti ala,*
17 si zo ake sarango ye ti sioni,+na lo bata zo, si baba alï lo pëpe.+
18 Nzapa abata âme* ti lo si ague na dû ti kuâ pëpe,+nga lo bata fini ti lo si lo kui na lege ti épée* pëpe.
19 Zo alingbi ti manda mbeni ye na ngoi so terê ti lo ayeke son na ndö ti gbogbo ti lo,nga na ngoi so yâ ti abio ti lo ayeke son lo lakue.
20 Tongaso nzara ti tengo ye asigi na yâ ti lo,*na lo ke même pendere kobe.+
21 Na bango lo, nyama ti terê ti lo ahon kue,nga abio ti lo so lani zo abâ pëpe ayeke fadeso na gigi.*
22 Lo ga* nduru ti gue na yâ ti dû ti kuâ,nga fini ti lo aga nduru ti tï na yâ ti maboko ti azo so amû kuâ na zo.
23 Tongana mbeni watokua* ndali ti lo ayeke dä,zo oko na popo ti azo saki oko ti gbu koko ti lo,ti fa na zo ye so ayeke mbilimbili,
24 tongaso Nzapa asara nzoni bê na lo, na lo tene:
‘Zi lo si lo gue na yâ ti dû ti kuâ pëpe!+
Mbi wara ye so a hunda ni ti tene a zi lo awe.+
25 Zia si terê ti lo akiri aza* ahon ti lâ ti maseka ti lo;+zia lo kiri na tango so lo de maseka si ngangu ti lo ayeke mingi so.’+
26 Lo yeke toto na Nzapa,+ na Lo yeke mä lo,lo yeke dekongo na ngia ti bâ lê ti Nzapa;na pekoni Nzapa amû mbilimbili ti lo, lo kiri na ni na zo ti sese.
27 Zo ni ayeke tene* na azo, lo tene:
‘Mbi sara siokpari+ nga mbi ba yâ ti ye so ayeke mbilimbili,me mbi wara pëpe futa ti peko ti ye so mbi sara.*
28 Lo zi âme* ti mbi si ague na yâ ti dû ti kuâ pëpe,+na fini ti mbi ayeke bâ lumière.’
29 Ni la Nzapa asara aye so kue,lo sara ni ndali ti zo fani use, même fani ota,
30 ti zi lo* na yâ ti dû ti kuâsi lo bâ lumière ti fini.+
31 Dengi mê ti mo, Job, mo mä mbi!
Duti kpô, na mbi yeke ngbâ ti sara tënë.
32 Tongana mo yeke na mbeni tënë ti tene, tene ni.
Sara tënë, teti mbi ye ti fa so mo yeke na raison.
33 Tongana mo yeke na tënë ti tene pëpe, a yeke nzoni mo mä mbi;duti kpô, na mbi yeke fa na mo ndara.”
Akete tënë na terê ni
^ Na Hébreu: “langue ti mbi nga na yâ ti yanga ti mbi.”
^ Na Hébreu: “lo kpo nzoroko na ndö ti aye so lo fa na ala.”
^ Wala “na lege ti mbeni ye ti bira (kokora).”
^ Wala “fini.”
^ Na Hébreu: “na yâ ti fini ti lo.”
^ Wala “asigi dandara.”
^ Wala “Fini ti lo aga.”
^ Wala “mbeni ange.”
^ Wala “akiri aga pendere.”
^ Na Hébreu: “he bia.”
^ A lingbi nga ti tene “na mbi bâ ye ti peko ni pëpe.”
^ Wala “fini.”
^ Wala “âme ti lo.”
