Nahum 2:1-13
2 Zo so ayeke kangbi azo kirikiri aga na ndö ti mo.*+
Mo bata angangu gbagba ni nzoni!
Zia lê ti mo nganganga na ndö ti lege ni.
Mo leke terê* ti mo na mo bungbi ngangu ti mo kue.
2 Jéhovah ayeke kiri ande na gloire ti Jacob na place ni,lo yeke kiri nga na gloire ti Israël na place ni,ngbanga ti so azo so ayeke futi ye afuti ala;+na azo ni afâ amaboko ti keke ti ala so angbâ ti sigi sigingo so.
3 A zia bengba teinture na terê ti avala ti angangu turugu ti lo,aturugu ti lo ayü abengba bongo.
Awen so ayeke na terê ti apuse ti mbarata ti lo ti bira aza tongana wâna lâ ni so lo leke terê ti lo ti sara bira;ala yôro na nduzu alikongo so a leke ni na keke ti genévrier.
4 Apuse ti mbarata ti bira ni ayeke kpe gï na loro na ndö ti alege.
Ala kpe hio ala gue na ando so azo ayeke gue ka dä mingi.
Ala za tongana akeke so wâ aza na yanga ni na ala kpe hio tongana wâ ti bekpa.
5 Lo* yeke iri ande aturugu ti lo ti kota kamba.
Ala yeke pika ande gere ti ala na ngoi so ala yeke ga.
Ala yeke mû loro ti gue na terê ti gbagba ti Ninive.
Ala leke mbeni ye ti kangango lege.
6 Ayanga ti gbagba ti akota ngu ni ayeke zi ande,na yangbo ti gbia ni ayeke tuku na sese.
7 A mû desizion ni awe: A zia lo terê senge,a mû lo a hon na ni, na angbâa ti lo ti wali ayeke dema terê ti ala;ala yeke toto tongana akolokoto na ngoi so ala yeke pika ndö ti kate* ti ala na vundu.
8 Na yâ ti alango kue so Ninive+ ade na fini, lo yeke lani tongana mbeni place ti ngu,me ti fadeso, ala yeke kpe kpengo.
Azo ayeke dekongo, atene: “Ala luti! Ala luti!”
Me zo oko atourné ti bâ ndo na peko pëpe.+
9 Ala gbu argent ahon na ni, ala gbu lor ahon na ni!
Amosoro ni ayeke hunzi pëpe.
A bungbi ni na mara ti anzoni ye nde nde kue a bata ni na ndo oko.
10 Zo oko ayeke na yâ ti gbata ni pëpe, gbata ni angbâ senge, a buba aye kue na yâ ni!+
Mbeto ahon ndö ti ala, agenou ti ala awoko kue, yâ ti ala ayeke dö dongo;lê ti ala kue ayeke na mbeto.
11 Dû ti abamara ni ayeke na ndo wa?+ ndo so abamara so akono awe* ate ye dä so,so bamara ni ayeke sigi dä ti tambela na molenge ti lo so,si zo oko ayeke zia mbeto na yâ ti ala pëpe.
12 Bamara ni agbu nyama, na lo suru yâ ni alingbi na amolenge ti lo.
Lo pete go ti nyama ni lo fâ lo ndali ti awali ti lo.
Lo zia si yâ ti adû so lo lango dä asi singo na anyama so lo gbu,gbâ ti anyama so lo suru yâ ti ala kete kete ayeke na yâ ti adû ti lo.
13 Jéhovah ti aturugu atene: “Bâ, mbi yeke ga na terê ti mo,+mbi yeke gbi apuse ti mbarata ti bira ti mo si aga guru ti wâ,+épée ayeke hunzi ande abamara ti mo so akono awe.*
Mbi yeke zi na ndö ti sese nyama so mo gbu;zo ayeke kiri ti mä go ti azo ti tokua ti mo encore ape.”+
Akete tënë na terê ni
^ So ti tene Ninive.
^ Na Hébreu: “Mo kpengba bassin.”
^ Âmanke gbia ti Assyrie.
^ Na Hébreu: “bê.”
^ Wala “akoli-bamara so akono awe.”
^ Wala “akoli-bamara ti mo so akono awe.”
