Ruth 1:1-22
1 Na ngoi so lani ajuge+ la ayeke fâ ngbanga, kota nzara atï na yâ ti kodro ni; mbeni koli alondo na Bethléhem+ ti Juda ti gue ti sara kodro tongana wande na sese* ti Moab;+ lo, wali ti lo nga na amolenge ti lo ti koli use la ague.
2 Iri ti koli ni ayeke Élimélek,* iri ti wali ti lo ayeke Naomi,* na iri ti amolenge ti lo use ayeke Mahlon* na Kilion.* Ala yeke azo ti Éphrathah so ayeke na Bethléhem ti Juda. Ala si na sese ti Moab na ala ngbâ kâ.
3 Ambeni ngoi na pekoni, Élimélek, koli ti Naomi, akui; a ngbâ gï Naomi na amolenge ti lo use.
4 Na pekoni, amolenge ni amû awali ti kodro ti Moab; iri ti oko ayeke Orpah, iri ti mbeni ayeke Ruth.+ Ala ngbâ kâ ngu bale-oko tongaso.
5 Tongana ngoi ayeke hon, amolenge-koli use so, Mahlon na Kilion, akui nga; Naomi angbâ gï lo oko, koli ti lo ayeke dä pëpe nga amolenge ni ayeke dä pëpe.
6 Kâ na sese ti Moab, Naomi amä so Jéhovah abi bê ti lo na azo ti lo na lege so lo mû na ala kobe.* Tongaso, lo na akogara ti lo alondo na sese ti Moab ti kiri.
7 Lo na akogara ti lo use kue azia ndo so ala sara kodro dä. Na ngoi so ala yeke na lege ti kiri na sese ti Juda,
8 Naomi atene na akogara ti lo use so: “Ala kiri, zo oko oko akiri na ndo ti mama ti lo. Zia Jéhovah afa tâ ndoye na mbage ti ala,+ tongana ti so ala fa ni na mbage ti akoli so akui so nga na mbage ti mbi.
9 Zia Jéhovah asara si* zo oko oko na popo ti ala awara nzoni duti* na da ti koli ti lo.”+ Na pekoni, lo su ngbangba ti ala, na ala tï na kota toto.
10 Me ala yeke tene na lo: “Ên-ën, e yeke kiri pëpe, me e na mo e yeke gue na ndo ti azo ti mo.”
11 Me Naomi atene: “Amolenge ti mbi, ala kiri. Ala ye ti gue na mbi ti sara nyen? Mbi peut ti dü amolenge-koli si aga akoli ti ala?+
12 Amolenge ti mbi, ala kiri; mbi ga mbakoro mingi awe ti mû mbeni koli. Même tongana mbi peut ti mû koli na bï so na mbi dü amolenge-koli,
13 ala yeke ku juska amolenge ni akono? Ala yeke ke ti kiri ti sara mariage ndali ti ala? Amolenge ti mbi, bê ti mbi ason mingi ndali ti ala, ngbanga ti so Jéhovah alondo ti ke mbi.”+
14 Ala kiri atï na kota toto; na pekoni, Orpah asu ngbangba ti kogara ti lo na lo kiri. Me Ruth ahule na terê ti lo.
15 Tongaso Naomi atene: “Bâ, sambâ ti mo wali-mua akiri na ndo ti azo ti lo nga na terê ti anzapa ti lo awe. Mû peko ti lo, mo na lo akiri.”
16 Me Ruth atene: “Mo ngbâ ti voro yanga na mbi pëpe ti zia mo, wala ti zia mo ti kiri, ndali ti so ndo so mo gue dä, mbi kue mbi yeke gue dä, nga ndo so mo lango dä, mbi kue mbi yeke lango dä. Azo ti mo ayeke ga azo ti mbi, nga Nzapa ti mo ayeke ga Nzapa ti mbi.+
17 Ndo so mo kui dä, mbi kue mbi yeke kui dä, nga a yeke lu mbi dä. Tongana kuâ la akangbi mbi na mo pëpe, zia Jéhovah apunir mbi ngangu.”
18 Tongana Naomi abâ so Ruth aye gï ti gue na lo, lo zia ti ha Ruth ti tene lo kiri.
19 Tongaso, ala use kue ague ngbii ala si na Bethléhem. Gï so ala si na Bethléhem,+ yâ ti gbata ni kue ayengi ndali ti ala. Awali ayeke hunda ndo, atene: “Naomi la ape?”
20 Me lo yeke tene na ala, lo tene: “Ala iri mbi Naomi* pëpe, ala iri mbi Mara,* ndali ti so Lo so ngangu ti lo ahon angangu kue asara si gigi ase na mbi mingi.+
21 Mbi yeke na gbâ ti ye na ngoi so mbi hon, me Jéhovah asara si mbi kiri maboko senge. So Jéhovah la aluti na mbi, na Lo so ngangu ti lo ahon angangu kue la asara si ye ti ngangu awara mbi so, ala iri mbi Naomi ngbanga ti nyen?”+
22 A yeke tongaso si Naomi alondo na sese ti Moab+ lo kiri, lo na kogara ti lo Ruth, wali ti kodro ti Moab. Ala si na Bethléhem na ngoi so azo akomanse ti ko lê ti orge.+
Akete tënë na terê ni
^ Wala “na mbeni ndo.”
^ Ndani aye ti tene “Nzapa ti mbi ayeke Gbia.”
^ Ndani aye ti tene “Ye so anzere na bê ti mbi.”
^ Peut-être a londo na mbeni tënë ti Hébreu so ndani aye ti tene “ngangu ayeke kiri gï kiringo na peko; tï kobela.”
^ Ndani aye ti tene “Zo so aye ti lo atï gï tingo; Zo so ayeke ngbâ ande pëpe.”
^ Na Hébreu: “mapa.”
^ Na Hébreu: “ndo ti wungo terê.”
^ Wala “amû matabisi na ala si.”
^ Ndani aye ti tene “Ye so anzere na bê ti mbi.”
^ Ndani aye ti tene “Ye so ase.”
