Zacharie 4:1-14
4 Ange so asara tënë na mbi so akiri aga azingo mbi, tongana ti so a yeke zingo mbeni zo so alango.
2 Lo tene na mbi: “Nyen la mo bâ?”
Mbi tene: “Mbi bâ ndo na mbi bâ ye ti yongo na lampe so a sara ni kue na lor,+ na mbeni dû ti sembe ayeke na ndö ni. Lampe mbasambala ayeke na ndö ti ye ti yongo na lampe ni.+ Ambeni ye mbasambala tongana atuyau aga na terê ti alampe mbasambala ni.
3 Akeke ti olive use+ ayeke na terê ti ye ti yongo na lampe ni, oko na mbage ti koli, oko na mbage ti wali.”
4 Na pekoni, mbi hunda ange so ayeke sara tënë na mbi so, mbi tene: “Seigneur ti mbi, nda ti aye ni so kue ayeke nyen?”
5 Ange ni ahunda mbi, atene: “Mo hinga nda ti aye ni so ape?”
Mbi tene: “Ên-ën, mbi hinga ni pëpe, seigneur ti mbi.”
6 Lo tene na mbi: “Jéhovah atene na mo Zorobabel, atene: ‘“Aye so kue ayeke si ande na lege ti aturugu pëpe, wala na lege ti ngangu pëpe,+ me na lege ti yingo ti mbi,”+ tënë ti yanga ti Jéhovah ti aturugu la.
7 Même tongana Zorobabel+ atingbi na mbeni kpale so ayeke tongana kota hoto, a yeke ga ande tongana kpangbala ndo.+ Na gbele azo, lo yeke yô na nduzu tênë so ayeke duti ande na li ti temple ni, na ala yeke dekongo, atene: “So pendere ye! So pendere ye!”’”
8 Jéhovah akiri atene na mbi:
9 “Maboko ti mo Zorobabel la azia gere ti da ni,+ na mo la mo yeke hunzi ande ni.”+ Ala yeke hinga ande so Jéhovah ti aturugu la atokua mbi na ala.
10 Lo kiri lo tene: “Mbeni zo azere lani akete kua*+ so a komanse ti sara ti leke na temple ni? Azo ayeke duti ande na ngia ti bâ fil à plomb* na maboko ti Zorobabel. Alê mbasambala ni so ayeke lê ti Jéhovah so ayeke bâ ndo na ndö ti sese kue.”+
11 Na pekoni mbi hunda lo, mbi tene: “Akeke ti olive use so ayeke na terê ti ye ti yongo na lampe na mbage ti koli nga na ti wali so, ndani ayeke nyen?”+
12 Mbi kiri mbi hunda lo ti fani use ni, mbi tene: “Akete maboko ti akeke ti olive use,* so lor so aga ngu ayeke londo dä ti hon na yâ ti atuyau use ti lor ti si na yâ ti dû ti sembe so, ndani ayeke nyen?”
13 Lo hunda mbi, lo tene: “Mo hinga nda ti aye ni so ape?”
Mbi tene: “Ên-ën, mbi hinga ni pëpe, seigneur ti mbi.”
14 Lo tene: “A yeke azo use so a soro ala, ala so ayeke luti na terê ti Seigneur ti sese kue.”+
Akete tënë na terê ni
^ Wala “akete ye.”
^ Na Hébreu: “tênë.” Ge, a yeke kamba so a kanga na terê ti tênë so a sara kua na ni ti bâ wala mbeni mur ayeke droit.
^ So ti tene akete maboko ni so lengo ni asi singo dä.
