Zacharie 6:1-15
6 Mbi kiri mbi yô lê ti mbi na nduzu na mbi bâ apuse ti mbarata osio so alondo na popo ti ahoto use ti cuivre ayeke ga.
2 Abengba mbarata la ayeke gboto kozo puse ni nga avuko mbarata la ayeke gboto use puse ni.+
3 Avuru mbarata la ayeke gboto ota puse ni nga ambarata so ayeke top top nga nzoroko nzoroko la ayeke gboto osio puse ni.+
4 Mbi hunda ange so ayeke sara tënë na mbi so, mbi tene: “Seigneur ti mbi, apuse wa la?”
5 Ange ni atene: “Ala yeke ayingo osio+ ti yayu so ayeke hon na peko ti so ala luti na gbele Seigneur ti sese kue.+
6 Puse so avuko mbarata agboto ni so ayeke gue na sese ti nord;+ puse so avuru mbarata agboto ni so ayeke gue na peko ti ngu-ingo; ti so ambarata so ayeke top top nga nzoroko nzoroko la agboto ni so ayeke gue na sese ti sud.
7 Ambarata so ayeke top top nga nzoroko nzoroko aye mingi ti gue ti tambela na ndö ti sese kue.” Lo kiri lo tene: “Ala gue, ala tambela na ndö ti sese kue.” Tongaso, ala komanse ti tambela na ndö ti sese kue.
8 Na pekoni, lo tene na mbi na kota go, lo tene: “Bâ, ala so ayeke gue na sese ti nord asara si ngonzo ti Jéhovah adë na terê ti sese ti nord.”
9 Jéhovah akiri atene na mbi, atene:
10 “Mû na maboko ti Heldaï, Tobijah nga na Jédaïah aye so ala mû na maboko ti azo so a gue na ala na kodro-wande. Na lango so a fa, a lingbi mo na azo so alondo na Babylone aga, ala gue na da ti Josias molenge ti Sophonie.
11 A yeke nzoni mo mû argent na lor mo leke na couronne,* na mo zia ni na li ti Kota prêtre Josué+ molenge ti Jéhozadac.
12 Tene na lo, mo tene:
“‘Jéhovah ti aturugu atene: “Bâ koli so iri ti lo ayeke Kete keke so asigi.+ Lo yeke sigi ande na place ti lo wani lo kono, na lo yeke leke temple ti Jéhovah.+
13 Lo la lo yeke leke ande temple ti Jéhovah nga lo la lo yeke wara gloire mingi. Lo yeke duti na ndö ti trône ti lo na lo yeke komande. Lo yeke sara nga kua ti prêtre na ndö ti trône ti lo,+ na akua use so* ayeke tambela nzoni.
14 A yeke zia ande couronne* ni na yâ ti temple ti Jéhovah ti tene azo adabe ti ala* na Hélem, Tobijah,+ Jédaïah nga na Hen molenge ti Sophonie.
15 Azo so ayeke na yongoro ndo ayeke ga ande na ala yeke mû maboko na kua ti lekengo temple ti Jéhovah.” Ala yeke hinga so Jéhovah ti aturugu la atokua mbi na ala. Ye ni so ayeke si ande tongana ala mä yanga ti Jéhovah Nzapa ti ala.’”
Akete tënë na terê ni
^ Wala “kota pendere couronne.”
^ So ti tene kua ti lo ti gbia na ti prêtre.
^ Wala “kota pendere couronne.”
^ Wala “tongana ye ti dango bê.”