Zo-ti-fa-tene 10:1-20
10 Tongana ti so kuâ ti angungu asara si mafuta ti zo ti sarango yombo afun nzoni pëpe na abuba, kete ye ti buba so zo asara akanga ndö ti ndara nga na gloire.+
2 Bê ti zo ti ndara ague na lo na nzoni lege,* me bê ti zo ti buba ague na lo na sioni lege.*+
3 Atâa lege wa la zo ti buba atambela dä, li ti lo ayeke dä pëpe;+ na lo zia si azo kue ahinga so lo yeke zo ti buba.+
4 Tongana mokonzi asara ngonzo na terê ti mo, ngbâ na place ti mo,+ ndali ti so dutingo kpô akanga lege na akota siokpari.+
5 Mbi bâ mbeni ye na gbe ti lâ so amû vundu na zo, mara ti faute so azo ti komande ayeke sara:+
6 A zia azo ti buba na akota ndo nde nde, me azo ti mosoro* angbâ na akete ndo.
7 Mbi bâ azo ti kua na ndö ti ambarata, me amokonzi ayeke tambela ti ala na gere tongana azo ti kua.+
8 Zo so azi dû, lo lingbi ti tï na yâ ni;+ nga zo so akungbi gbagba ti tênë, ngbo alingbi ti dë lo.
9 Zo so apika tênë, atênë ni alingbi ti sara sioni na lo; nga zo so asuru akeke, akeke ni alingbi ti sara sioni na lo.*
10 Tongana yanga ti wen akui si zo aleke ni pëpe, lo yeke sara ngangu mingi si lo sara kua na ni. Me ndara amû maboko si ye aga nzoni.
11 Tongana ngbo adë zo kozo ti tene zo so ayeke na kode ti handango angbo ahanda ngbo ni, nzoni ti nyen la zo ti handango angbo awara?
12 Tënë ti yanga ti zo ti ndara asara si a bâ zo na nzoni lê,+ me tënë ti yanga ti zo ti buba afuti lo.+
13 Kozo tënë ti yanga ti lo ayeke tënë ti buba,+ nga andangba tënë ti lo ayeke atënë ti fou so afuti ye.
14 Me zo ti buba angbâ gï ti sara tënë.+
Zo ahinga pëpe ye so ayeke si ande; zo wa la apeut ti fa na lo ye so ayeke si na peko ti lo?+
15 Ngangu kua so zo ti buba ayeke sara awoko lo kue, ndali ti so lo hinga même pëpe tongana nyen ti wara lege ti guengo na gbata.
16 Tongana gbia ti kodro angbâ molenge nga amokonzi ni akomanse ti sara matanga gï na ndapre, a yeke sioni mingi ndali ti kodro ni.+
17 Me tongana gbia ni ayeke molenge ti akota zo nga amokonzi ti kodro ni ate ye na mbilimbili ngoi ni ti wara ngangu me ala soulé pëpe, kodro ni ayeke duti na ngia.+
18 Tongana zo ayeke kota zo ti goigoi, keke ti li ti da ti lo ayeke fun kue, nga da ni ayuru ndali ti so lo sara kua na maboko ti lo pëpe.+
19 A sara mapa* ti tene zo ahe ngia, nga vin asara si gigi ti zo anzere na lo;+ me nginza amû lege na zo ti wara aye kue so lo yeke na bezoin ni.+
20 Même na yâ ti pensé ti mo,* deba* gbia pëpe,+ nga na yâ ti chambre ti mo, deba azo ti mosoro pëpe, ndali ti so mbeni ndeke* alingbi ti sara si azo amä tënë ni wala mbeni kete nyama so ayeke na kpangbi alingbi ti tene peko ti ye so mo tene.
Akete tënë na terê ni
^ Na Hébreu: “ayeke na mbage ti maboko ti lo ti koli.”
^ Na Hébreu: “ayeke na mbage ti maboko ti lo ti wali.”
^ Wala “azo so ahinga kua ni nzoni.”
^ A lingbi nga ti tene “a yeke nzoni lo sara hange na ni.”
^ Wala “kobe.”
^ A lingbi nga ti tene “na ndö ti gbogbo ti mo.”
^ Wala “iri sioni na ndö ti.”
^ Na Hébreu: “nyama so ayeke huru na nduzu.”
