Na yâ ti lettre so yingo vulu apusu bazengele Paul ti sû na Tite, lo tene so amaseka-koli, même Tite nga kue, adoit ti sara kue ti “duti tapande na lege ti sarango anzoni kusala.” (Tt 2:6, 7). Na pekoni, na yâ ti oko chapitre ni, lo fa so Jésus ayeke sukula awakua ti Jéhovah tongaso si ala lingbi ti “yapu ti sara anzoni kusala.” (Tt 2:14). Mbeni oko ti anzoni kusala so ayeke ti fa tënë nga ti fa ye na ndö ti Royaume ti Nzapa. Tongana mo yeke maseka, mo lingbi ti sara kua na ngangu ti mo ti sara kua ti pionnier auxiliaire wala pionnier permanent?—aPr 20:29.

Tongana mo ye ti sara kua ti pionnier, leke yâ ti kapa ti mo ti sara ni (Lc 14:28-30). Na tapande, tongana nyen la mo yeke wara nginza ti bâ na lege ti aye ti mo na ngoi so mo yeke sara kua ti ngoi kue? Tongana nyen la mo lingbi ti wara wungo ti ngbonga so a hunda? Sara tënë ni na Jéhovah na yâ ti sambela (Ps 37:5). Sara tënë ti ye so mo leke ti sara so na babâ na mama ti mo nga na aita so asara kua ti pionnier nzoni mingi. Na pekoni, sara aye so ayeke gue na mo ti si na ye so mo zia na gbele mo. Ti tâ tënë ni, Jéhovah ayeke sara tufa na ndö ti akota effort so mo yeke sara na yâ ti kusala ti lo!

BÂ VIDÉO AMASEKA SO AMÛ GONDA NA JÉHOVAH, NA PEKONI, KIRI TËNË NA AHUNDA SO:

• Akpale wa la ambeni ita ahon ndö ni ti sara kua ti pionnier? Ala hon ndö ni tongana nyen?

• Tongana nyen la ababâ na amama alingbi ti mû maboko na amolenge ti ala ti ga pionnier permanent?

• Ngbanga ti nyen a yeke kota ye ti duti na mbeni kapa ti fango tënë?

• Tongana nyen la aita ti congrégation alingbi ti kpengba mbeni pionnier nga ti mû maboko na lo?

• Aye ti nzoni wa la aita so asara kua ti pionnier ayeke wara?