GIGI TI E TI CHRÉTIEN
Ti sara si azo aga adisciple, a yeke kota ye ti fa tënë nga ti fa ye
Jésus amû yanga na adisciple ti lo ti gue ti sara si azo aga adisciple (Mt 28:19). Ye so ahunda ti fa tënë nga ti fa ye. Ngoi na ngoi, a yeke nzoni e hunda terê ti e: ‘Tongana nyen la mbi lingbi ti fa tënë nga ti fa ye nzoni ahon ti kozo?’
FANGO TËNË
Ahon ti ku ti tene azo la aga na mbage ti e, a lingbi e sara ngangu e gi azo so “alingbi”. (Mt 10:11). Na ngoi so e yeke na fango tënë, e yeke gbu alege kue so azi ti sara lisoro na “azo so ayeke duti na ndo so” e wara ala dä so? (Kus 17:17). So bazengele Paul afa tënë ngangu, a sara si Lydie aga lani disciple.—Kus 16:13-15.
“Lu angongoa ti kobe ti mo na ndapre, na juska lakui zia si maboko ti mo aduti senge pëpe” (Zo 11:6)
BÂ VIDÉO “ZIA PËPE” TI FA TËNË NA ALEGE KUE SO AZI NGA DA NA DA; NA PEKONI KIRI TËNË NA AHUNDA SO:
-
Na yâ ti aye so Samuel ayeke sara lâ oko oko, tongana nyen la lo fa so lo yeke sara ngangu ti lu angongoa ti tâ tënë?
-
Ngbanga ti nyen a lingbi e ngbâ ti sara kua na akode kue ti fango tënë?
-
Zo wa la mo lingbi ti fa tënë ti Royaume na lo na ngoi so mo yeke sara akua ti mo ti lâ oko oko?
FANGO YE
Ti sara si azo aga adisciple, a lingbi e sara ye mingi ahon gï ti mû na ala ambeti. Ti mû maboko na ala ti gue na li ni na lege ti yingo, a lingbi e sara avizite nga e manda Bible na ala (1aC 3:6-9). Ka tongana angangu so e sara ti fa tâ tënë ti Royaume na mbeni zo aga na aye ti nzoni mingi ape? (Mt 13:19-22). A lingbi e ngbâ ti gi azo so bê ti ala ayeke tongana “pendere sese”.—Mt 13:23; Kus 13:48.
“Mbi lu ye lani, Apollos atuku ngu dä, me Nzapa asara si a kono” (1aC 3:6)
BÂ VIDÉO “ZIA PËPE” TI FA TËNË NA ANDO SO AZO AYEKE DÄ MINGI NGA NA SARANGO ADISCIPLE, NA PEKONI KIRI TËNË NA AHUNDA SO:
-
Tongana nyen la Salomon na Marie atuku ngu na ndö ti angongoa ti tâ tënë so ayeke na yâ ti bê ti Ézékiel na Abigaïl?
-
Nyen la a lingbi e zia na gbele e ti si dä na ngoi so e yeke fa tënë na alege nde nde kue, même na ando so azo ayeke dä mingi?
-
Tongana nyen la e lingbi ti bi bê ti e mingi na fango tâ tënë na azo?
