Bible afa kozo awe so Satan ayeke sara ye ti ngangu na e ti kanga lege na kua ti e ti fango tënë (Jn 15:20; Apc 12:17). Tongana nyen la e lingbi ti mû maboko na aita ti e so a sara ye ti ngangu na ala na yâ ti ambeni kodoro? E lingbi ti sambela ndali ti ala. ‘Sambela ti zo ti mbilimbili ti voro tere na Nzapa ayeke sara aye mingi.’—Jac 5:16.

Nyen la e lingbi ti hunda na yâ ti sambela ti e? E lingbi ti hunda na Jéhovah ti mû ngangu na aita ti e nga ti mû maboko na ala ti sara ye na mbeto pëpe (És 41:10-13). E lingbi nga ti sambela ndali ti akota zo ti kodoro ti zia lege na e ti fa tënë, “tongaso si e ngbâ ti duti kpô nga na siriri.”—1Tm 2:1, 2.

Na ngoi so a sara ye ti ngangu na Paul nga na Pierre, akozo Chrétien asambela lani ndali ti ala na dingo iri ti ala (Kus 12:5; aRm 15:30, 31). Laso, même tongana e hinga pëpe iri ti aita kue so a sara ye ti ngangu na ala, e lingbi ti sara tënë ti congrégation ti ala, kodoro ti ala wala ndo so ala yeke dä na yâ ti sambela ti e.