Ngbanga ti nyen la e ye akota bungbi ti e ti lango ota so e yeke sara ngu oko oko mingi? Tongana ti azo ti Israël ândö, akota bungbi ti e ti lango ota amû lege na e ti voro Jéhovah na amba ti e aChrétien ngbangbo mingi, même saki mingi. E ye mingi atënë kue so e mä na ngoi ni so, so a-aidé e ti ngbâ nduru na Jéhovah. E ye nga mingi pendere ngoi so e passé na aita ti e nga na sewa ti e. Tongaso, e ye ti duti dä na alango ti kota bungbi ni kue.

Tongana e wara lege ti bungbi ndo oko, e doit ti pensé gï na ye so e wani e lingbi ti wara ape, me nga ti pensé na lege so e lingbi ti fa ndoye na mbage ti amba ti e (aGl 6:10; aHb 10:24, 25). Tongana e bata gï place so e yeke na bezoin ni, e yeke fa so e pensé na amba ti e (aPh 2:3, 4). Akota bungbi ti lango ota ayeke apendere ngoi ti wara afini kamarade. Kozo na kapa ni, na pekoni nga na ngoi ti wungo terê, e lingbi ti zia na gbele e ti sara lisoro na mbeni zo so e hinga lo ape (2aC 6:13). Akamarade so e yeke wara na ngoi ni so alingbi ti ngbâ teti lakue lakue. Na ndö ti aye so kue, tongana azo abâ tâ ndoye so e yeke fa na popo ti e, ala lingbi ti mû desizion ti bungbi na e ti voro Jéhovah.—Jn 13:35.

BÂ VIDÉO ASSEMBLÉE INTERNATIONALE “NDOYE AYEKE HON LÂ OKO APE”, NA PEKONI KIRI TËNË NA AHUNDA SO:

• Tongana nyen la a fa ndoye na mbage ti aita so ague na Assemblée Internationale ti ngu 2019?

• Ngbanga ti nyen la beoko nga na ndoye so ayeke na popo ti awakua ti Jéhovah apika bê mingi?

• Ambage wa ti ndoye ti aChrétien amembre ti Bebungbi agboto lê na ndö ni?

• Tongana nyen la ndoye abungbi aita ti Allemagne nga na ti Corée du Sud oko?

• Nyen la e doit ti leke na bê ti e ti sara?