Ti zia terê ti e na place ti azo ayeke ngangu so e yeke na ni ti hinga pensé ti ala, atënë so agbu bê ti ala, aye so ayeke kota ye na lê ti ala nga na abezoin ti ala. Tongana e zia terê ti e na place ti amba ti e, ala yeke hinga ni. Tâ nzara so e yeke na ni ti aidé ala la ayeke pusu e ti zia terê ti e na place ti ala. Tongana e zia terê ti e na place ti azo na fango tënë, andâ e mû tapande ti Jéhovah so andoye azo nga abi bê na ala, na ye so ayeke gboto ala na mbage ti lo.—aPh 2:4.

Ziango terê ti e na place ti azo ayeke gï pëpe mbeni senge kode so e yeke sara kua na ni ti fa na ye. A yeke bâ ni na yâ ti fason so e yeke mä na tënë, e yeke sara na tënë, na yâ ti bango ndo ti e, ageste ti e nga na lê ti e. E yeke fa ni na lege so e bi bê biani na zo, e yeke hinga aye so agbu bê ti lo, aye so lo mä na bê na ni nga dutingo ti lo. E yeke mû na lo nzoni wango nga e yeke sara ambeni ye ti aidé lo, me e yeke forcé lo ape ti changé. Tongana azo ayeda na maboko so e mû na ala, e yeke wara ngia mingi na fango tënë.

ZIA VIDÉO WARA NGIA SO ZO AYEKE WARA NA SARANGO ADISCIPLE—MAÏ AKODE TI MO: FA SO MO HINGA TI ZIA TERÊ TI MO NA PLACE TI AMBA TI MO, NA PEKONI KIRI TËNË NA AHUNDA SO:

• Na ngoi so Jenny asi na retard, tongana nyen la Neeta azia terê ti lo na place ti lo?

• Na ngoi so Jenny atene lo yeke sara étude ape ndali ti so stress ahon ndö ti lo, tongana nyen la Neeta azia terê ti lo na place ti lo?

• Na ngoi so Jenny atene so aye ti lo ayeke na ordre ape, tongana nyen la Neeta azia terê ti lo na place ti lo?