Na nze ti septembre, e yeke sara ande kua ngangu mingi ti hunda ti manda Bible na zo oko oko na sarango kua na brochure Ngbâ na fini lakue lakue!. Awafango tënë apeut ti soro ti mû kua ti pionnier auxiliaire ti fa tënë teti l’heure 30. E yeke mû ande mbage na kota kapa so tongana nyen?

• Na kozo tingbingo terê: Sara kua na tënë so ayeke na peko ti brochure ni ti zia nzara ni na yâ ti zo nga gi ti fa tongana nyen la e yeke sara étude na azo. Girisa pëpe azo so kozo asara nzara ti tënë ni, même avizite. Même tongana kozo ala zia lege ti étude ni, peut-être fini kode ti sarango étude ti e na azo nga na brochure ni ayeke nzere na ala. E yeke zia abrochure ni pëpe na azo so ayeke na yanga-da ape wala e yeke tokua ni pëpe na lettre na azo so kozo asara nzara ti tënë ni ape. Komite ti kusala ti congrégation alingbi ti leke ambeni bungbi ti fango tënë nde na yâ ti nze ni.

• Na ambeni lege nde: Tongana congrégation ti mo ayeke sara kua na présentoir, zia brochure Ngbâ na fini lakue lakue! dä ti tene azo abâ ni. Tene na azo so aye ni so tongana ala mû mbeni oko, a peut nga ti manda Bible na ala senge senge na yâ ni. Fa kete na lê ni lê ni tongana nyen la e yeke manda na Bible na azo, wala leke ti sara ni na mbeni lango nde. Surveillant ti kusala apeut ti leke ti tene awafango tënë so alingbi ague na ando ti dengo buze na yâ ti territoire ti hunda ti manda Bible na azo. Mo peut nga ti hunda ti manda Bible na amba ti mo ti place ti kua wala na azo so mo wara ala na fango tënë na alege kue so azi.

Jésus amû yanga na e ti “sara . . . adisciple,” ti ‘fa ye na ala’ (Mt 28:19, 20). Zia si kota kapa so amû maboko na e ti sara ni na sarango kua na Ngbâ na fini lakue lakue!