Ababâ na amama so akpe mbeto ti Nzapa aye mingi ti tene amolenge ti ala aga awakua be-ta-zo ti Jéhovah. Ala lingbi ti sara ni na sarango si afango ye ti Bible alï yâ ti bê ti amolenge ni na ngoi so ala de kete (De 6:7; aPr 22:6). Ti sara ni a hunda ti tene ala sara asacrifice mingi! Me afuta ti peko ni ahon asacrifice so kue.​—3Jn 4.

Ababâ na amama alingbi ti manda ye mingi na mbage ti Joseph na Marie. Lani, ala ‘yeke gue lakue na Jérusalem ngbanga ti Matanga ti Pâque,’ même atâa so a hunda ti sara ngangu nga ti futa nginza mingi (Lc 2:41). Na bango ni, ala zia na kozo ndo abezoin ti sewa ti ala na lege yingo. Legeoko nga, ababâ na amama ti laso ayeke fa nzoni lege na amolenge ti ala na gbungo alege kue so azi ti fa ye na ala na lege ti tënë ti yanga ti ala nga na tapande ti ala.​—Ps 127:3-5.

BÂ VIDÉO ALA GBU ALEGE KUE SO AZI, NA PEKONI KIRI TËNË NA AHUNDANGO NDO SO:

• Jon na Sharon Schiller asara nyen ti ngbâ ti zia aye ti Royaume na kozo ndo na ngoi so ala yeke bâ lege ti sewa ti ala?

• Ngbanga ti nyen a lingbi ababâ na amama afa lege na amolenge ti ala alingbi na bezoin ti zo oko oko?

• Tongana nyen la ababâ na amama alingbi ti leke amolenge ti ala ti dö sese na aye so atara mabe ti ala?

• Agbakuru wa ti bungbi ti Jéhovah ala sara kua na ni ti aidé amolenge ti ala ti maï na lege ti yingo?