ANZONI YE SO AYEKE NA YÂ TI BIBLE | JOB 1-5
Job angbâ be-ta-zo na yâ ti tara
Job alango na gbata ti Uts na ngoi so azo ti Israël ayeke lani na ngbâa na Égypte. Atâa so lo yeke mbeni zo ti Israël ape, Job ayeke lani mbeni wakua ti Jéhovah so ayeke be-ta-zo. Lo yeke na mbeni kota sewa, lo yeke na mosoro nga azo ane lo mingi. A bâ lo lani tongana mbeni kota wamungo wango nga lo fâ ngbanga na mungo mbage ti mbeni zo ape. Lo yeke mû lani ye na awayere nga na ala so ayeke na bezoin ni. Job ayeke mbeni koli so ayeke be-ta-zo.
Job afa polele na yâ ti fini ti lo so Jéhovah ayeke kota mingi
-
Satan abâ lani dutingo be-ta-zo ti Job. Lo dë kite pëpe so Job ayeke mä yanga ti Nzapa; me, lo dë kite na bibe so apusu Job ti sara ni
-
Satan atene so Job ayeke sara na Jéhovah ndali ti aye so lo wara na pekoni
-
Ti kiri tënë na atënë ti mvene ti Satan so, Jéhovah azia si Satan atara mabe ti Job. Satan abuba aye kue so Job ayeke na ni na yâ ti fini ti lo
-
Na ngoi so Job angbâ lani be-ta-zo, Satan adë kite so azo kue alingbi pëpe ti duti be-ta-zo
-
Job asara siokpari ape wala lo tene ape so Nzapa asara mbeni ye ti sioni
