Akota kpale ayeke si ka laso mingi na azo. Tongana mbeni kota kpale asi, azo so ayeke sara effort ti aidé abezoin ti leke yâ ti kua ti ala nzoni nga ti bâ ndo na ndö ni nzoni. Ti sara ni, Bebungbi aleke si a zia na yâ ti aBéthel kue, mbeni ndokua ti mungo maboko na peko ti kpale.

Tongana aita so ayeke na yâ ti ndokua so amä so mbeni kota kpale asi, hio ala yeke gi ti wara a-ancien ti ndo ni ti bâ mungo maboko wa la awafango tënë ni abezoin ni. Tongana kpale ni ayeke ngangu mingi na awafango tënë ti ndo ni apeut ti gbu lê ni ape, Béthel ayeke mû ambeni ita-koli so alingbi ti mû li ni na yâ ti kua ti mungo maboko ni. Aita-koli so apeut ti hunda ti tene a mû na ala avolontaire, akungba wala ala peut ti gue ti vo aye so awafango tënë ti ndo ni ayeke na bezoin ni ti mû na ala.

Gbâ ti aye ti nzoni aga na peko ti lekengo akpale ni na fason ni so. A sara si ala sara kua use use ape, li ti ala aga kirikiri ape nga ala buba nginza nga na akungba ape. Aye so apeut ti si fade tongana aita asara gi ye ti li ti ala wani.

Aita-koli so Béthel asoro ala apeut ti hinga wungo ti nginza nga na ti avolontaire so a yeke bezoin ni ande ndali ti kua ti mungo maboko ni. Ala peut ti sara lisoro na akota zo ti ndo ni, so apeut ti aidé e ti sara kua ti e ti mungo maboko ni hio. Tongaso, zo oko oko adoit ti londo na li ti lo wani ape ti ro nginza na tïtî aita, ti tokua aye ti aidé wala ti gue na mbeni ndo so kota kpale asi dä sân ti tene a hunda na lo ti sara ni.

Me tongana mbeni kota kpale asi, e ye ti aidé aita (aHb 13:16). E ye aita ti e mingi! Nyen la e peut ti sara? Kota ye so e peut ti sara, a yeke ti sambela ndali ti ala so awara aye ti ngangu na yâ ti kpale ni nga ndali ti ala so ayeke sara kua ti mungo maboko na ala. E peut ti mû offrande ndali ti kua ti e na yâ ti dunia. Na gbe ti fango lege ti Bebungbi, aBéthel ayeke hinga nzoni mingi ndo so a-offrande so ayeke aidé dä nzoni mingi. Nga tongana e ye ti mû mbage ti e na yâ ti kua ni, e peut ti remplir Demande d’admission comme volontaire local développement/construction (DC-50).

BÂ VIDÉO KOTA NGU SO ABUBA AYE NA BRÉSIL, NA PEKONI KIRI TËNË NA HUNDA SO:

Nyen la apika bê ti mo mingi na ndö ti aye so aTémoin ti Jéhovah asara ti mû maboko na peko ti kota ngu so asuku amû ndo na Brésil na ngu 2020?