Mo peut ti hon ndö ti bibe ti kengo zo grâce na aide ti Nzapa. Yingo vulu ti lo apeut ti sara si e lë lengo ti yingo so peut-être lâ oko e yeke na ni ape. Tongaso, ahon ti tene e gi ti hon ndö ti bibe ti kengo zo na ngangu ti e wani, a yeke nzoni e zia bê ti e na Nzapa ti tene lo aidé e. Tongana e sara ni, e yeke wara même sentiment so bazengele Paul ayeke na ni lani, lo tene: “Mbi wara ngangu ti sara aye kue ndali ti lo so lo mû ngangu ni na mbi.” (aPhilippien 4:13). Nga, e yeke wara lege ande ti tene: “Ye ti mungo maboko na mbi alondo na Jéhovah.”​—Psaume 121:2.

Sambela Jéhovah, hunda lo na bê ti mo kue ti tene lo mû na mo yingo vulu ti lo (Luc 11:13). Hunda na lo ti aidé mo ti duti na anzoni sarango ye na yâ ti fini ti mo. Manda aye so Bible afa na ndö ti anzoni sarango ye tongana ndoye, siriri, kangango bê ti ku ti tene a-aidé mo ti zi bibe ti kengo zo. Gi alege so apeut ti aidé mo ti duti na asarango ye ni so na yâ ti gigi ti mo. Nga sara kamarade na azo so ayeke gi ti duti na asarango ye ni so. Azo tongaso apeut ti aidé mo “ti zia na bê ti [mo] nzara ti duti na ndoye na ti sara anzoni kusala.”—aHébreu 10:24; kete tënë na gbe ni.