NA YÂ ti ambeni ye, atâ wamandango Bible ayeke tongana azo ti gingo lor. Awamandango Bible so ayeke na bezoin ti sara kua ngangu nga ti ngbâ ti gi yâ ti Bible ti wara ndara so ayeke kota mingi. So e yeke awamandango Bible, nyen la e lingbi ti manda na bango alege ota so a yeke wara na lor?

Tara ti bâ so mo yeke tambela na yanga ti mbeni ngu na mo bâ mbeni ye so akpa kete tênë so aza tongana lâ. Mo kuku mo mû ni nga tere ti mo anzere mingi ti wara mbeni lor ti nzoni mingi. A yeke kete ahon li ti keke ti allumette nga ti wara ni ason ahon warango mbeni diamant so ayeke pendere mingi. Biani, mo yeke gi place ni so ti bâ wala mo lingbi ti wara ambeni lor ti nzoni mingi na ndo ni encore.

Legeoko nga, na mbeni lango so ahon awe, so mo yeke girisa ni ande ape, peut-être mbeni wakua ti Jéhovah asi na yanga-da ti mo ti sara lisoro na ndo ti beku so ayeke na yâ ti Bible. Peut-être mo dabe ti mo polele na ngoi so mo wara ye so ayeke tongana kozo lor ti mo ti nzoni na lege ti yingo. Peut-être a yeke ye so asi na ngoi so mo bâ iri ti Nzapa, Jéhovah, pan na yâ ti Bible (Ps. 83:18, FD). Wala peut-être na ngoi so mo manda so mo lingbi ti ga kamarade ti Jéhovah (Jacq. 2:23). Gi na lê ni lê ni mo hinga lani so mo wara mbeni ye so ayeke pendere mingi ahon lor. Nga, peut-être tere ti mo anzere mingi ti wara ambeni lor ti nzoni na ndo ni encore na lege ti yingo.

Na ambeni ngoi, akete lê ti lor ayeke bungbi na yâ ti akete ngu nga na akota ngu. Gi na yâ ti ambeni nze, azo ti gingo lor so ayeke sara kua ngangu alingbi ti wara gbâ ti alor so ngere ni ayeke kota mingi na yâ ti ando so.

Na ngoi so mbeni Témoin ti Jéhovah akomanse ti manda Bible na mo, peut-être tënë ti bê ti mo ayeke tongana ti mbeni zo ti gingo lor so ayeke hasa mbeni ndo so lor ayeke dä ti gi ni. Tongana mo yeke gbu li na ndo ti aversê ti Bible oko na oko, mo yeke wara ndara mingi, mbeni ye so asara si mo yeke wara mosoro na lege ti yingo. Tongana mo yeke gbu li na ndo ti apendere tâ tënë ti Bible, mo yeke hinga tongana nyen ti ga nduru na Jéhovah nga mo yeke ngbâ na yâ ti ndoye ti lo si mo wara fini ti lakue lakue.—Jacq. 4:8; Jude 20, 21.

Tongana ti mbeni zo ti gingo lor so agi ti wara apendere ndo so lor ayeke dä, peut-être mo nga kue mo  sara kua ngangu ti gi amosoro ti ngangu ngere na lege ti yingo. Na peko ti so mo manda akozo tâ tënë ti Bible, peut-être bê ti mo apusu mo ti sara ambeni ye ti mû tere ti mo na Nzapa nga ti wara batême.—Mat. 28:19, 20.

Mbeni zo ti gingo lor alingbi ti wara kete wungo ti lor na yâ ti atênë so amû wâ ngangu so aga ngu na pekoni akpengba aga tênë. Na yâ ti ambeni mara ti atênë ni so a yeke wara gbâ ti apendere lor so agbu tere, so tongana a fâ yâ ti atênë ni kete kete a lingbi ti zi ni. Na bango ni pan, zo alingbi ti bâ lor na yâ ti atênë ni ape. Ngbanga ti nyen? Ngbanga ti so tongana a mû tonne oko ti tênë a yeke wara na yâ ni gi gramme 10 tongaso ti lor so ayeke nzoni ahon atanga ni kue. Ye oko, ti zo ti gingo lor, tongana lo sara kua ni so lo yeke bâ nzoni na peko ni.

A yeke hunda nga na mbeni zo ti sara effort na peko ti so lo hinga “akozo fango ye na ndo ti Christ awe”. (aHéb. 6:1, 2). A lingbi mo sara kua ngangu ti wara anzoni ye ti manda na lege ti mandango Bible ti mo. Tongaso, nyen la mo lingbi ti sara ti tene mandango Bible ti mo wani angbâ ti lë lengo, atâa so peut-être mo manda Bible asara angu mingi awe?

Ngbâ lakue ti duti na nzara ti manda ye. Gi ti hinga anzene nzene ye na ndo ti aye so mo yeke manda. Ngbâ lakue ti sara effort, mo yeke wara na yâ ti Bible ndara nga na fango lege ti Nzapa so ayeke tongana lor ti nzoni (aRom. 11:33). Ti hinga ye mingi na ndo ti Bible, sara kua nzoni na aye ti sarango na recherche so ayeke na yanga ti kodoro ti mo. Gi yeke yeke afango lege so mo yeke na bezoin ni nga akiringo tënë na ahunda ti mo na ndo ti Bible. Hunda na aita ti fa na mo aversê nga na a-article wa la ala bâ so alingbi mbilimbili ti mû maboko na mo nga ti kpengba mo. Fa na amba ti mo apendere ye so mo wara na ngoi ti mandango Bible ti mo wani.

Biani, ye so mo zia na gbele mo ayeke pëpe gi ti hinga ye mingi. Bazengele Paul atene so “hingango ye apusu zo ti sara baba”. (1 aCor. 8:1). Tongaso, sara ngangu ti ngbâ ti sara tere ti mo kete nga ti kpengba na yâ ti mabe. Ti voro Nzapa na sewa nga ti manda Bible mo wani lakue ayeke mû maboko na mo ti sara ye ague oko na andia ti Jéhovah nga ayeke pusu mo ti mû maboko na ambeni zo. Na ndo ti aye so kue, mo yeke wara ngia ndali ti so mo wara mbeni ye so ayeke pendere mingi ahon lor.—aProv. 3:13, 14.