Fason so a sara na tënë ni na Hébreu amû maboko na e ti mä yâ ti tënë ni na alege nde nde. Tongaso, aye so ayeke na gbe ni ge ayeke mû maboko na e ti hinga mbilimbili nda ti tënë ni:

1. Gbu li na ndö ti tanga ti atënë ti psaume ni. So a sara kua na tënë “na pekoni” na yâ ti versê 12, a ye ti tene so anzoni ye so ayeke na versê 12 ti si na 14 abâ azo ti mbilimbili so ahunda ti tene ‘a zi ala nga a sö ala’ na maboko ti azo ti sioni (versê 11). Tënë so asigi nga na yâ ti versê 15 so tënë “ngia” asigi dä fani use na abâ a-oko zo ni so, “azo so Nzapa ti ala ayeke Jéhovah!”.

2. Fason ti gbungo nda ti tënë ni so ague oko na aversê so asara tënë ti zendo so Nzapa amû ti iri tënë nzoni na ndö ti azo so ayeke be-ta-zo. Psaume so afa tâ polele kpengba beku so David ayeke na ni so na peko ti so Nzapa azi azo ti Israël na maboko ti awato ti ala, Lo yeke sara si ala duti na ngia nga ye ti ala ayeke wu mingi (Lév. 26:9, 10; Deut. 7:13; Ps. 128:1-6). Na tapande, Deutéronome 28:4 atene: “Tufa ayeke ga na ndö ti amolenge ti mo, na ndö ti akobe ti yaka ti mo, na ndö ti amolenge ti anyama ti mo nga na akete bagara na akete taba ti mo.” Biani, na ngoi ti komandema ti Salomon, molenge ti David, azo ti Israël ayeke lani na siriri nga na mosoro so ade ala bâ mara ni lâ oko ape. Kota ye ni ayeke so, komandema ti Salomon aye ti sara tënë ti komandema ti Messie.​—1 aGbia 4:20, 21; Ps. 72:1-20.

Na nda ni, so e mä yâ ti Psaume 144 so tongaso so, a sara si mbeti ti psaume kue akiri afa polele ahon ti kozo beku so awakua ti Jéhovah aye ni mingi so Nzapa ayeke futi ande asioni zo na pekoni lo yeke sara si azo ti mbilimbili aduti na siriri teti lakue lakue nga aye ti ala ayeke wu mingi.​—Ps. 37:​10, 11.