1. Desizion wa la a lingbi amaseka amû na ndö ti kekereke ti ala? Ngbanga ti nyen la a lingbi ala gï bê ti ala mingi na ndö ni ape? (Bâ foto so ayeke na tongo nda ti article so.)

AMASEKA, peut-être ala yeke yeda so kozo ti tene zo ague na mbeni tambela, a yeke na lege ti ndara ti hinga ndo so lo ye ti gue dä. Fini ti zo ayeke tongana mbeni voyage, nga ngoi ti tene mo hinga ndo so mo ye ti gue dä ayeke na ngoi so mo ngbâ maseka. Me ti tâ tënë ni, ti leke aye so mo ye ti sara ande ayeke kete ye ape. Mbeni maseka-wali so iri ti lo ayeke Heather atene: “A yeke ye ti mungo mbeto na zo. A lingbi mo soro ye so mo ye ti sara ni na yâ ti gigi ti mo kue.” Me sara mbeto ape. Jéhovah atene na azo ti lo, atene: “Gi bê ti mo pëpe, ndali ti so mbi yeke Nzapa ti mo. Mbi yeke kpengba mo, ti tâ tënë ni, mbi yeke mû maboko na mo.”—És. 41:10.

2. Mo hinga tongana nyen so Jéhovah aye si mo leke ti sara aye so ayeke sara si mo wara ngia ande?

² Jéhovah awa mo ti leke aye so mo ye ti sara ande na ndara (Zo-ti. 12:1; Mat. 6:20). Lo ye si mo duti na ngia. Aye so afa ni na mo ayeke aye so lo sara, na tapande aye so anzere na mo ti bâ ni, pendere totongo ti aye nga na aye so anzere na yanga ti mo. Pensé nga na ndö ti lege so lo yeke bi bê na e nga lo yeke fa na e tâ nzoni ye ti sara na yâ ti gigi ti e. Jéhovah atene na azo so ake wango ti lo, lo  tene: “Ala soro ti sara ye so anzere na mbi pëpe. . . . Awakua ti mbi ayeke sara ngia, me ti ala, kamene ayeke sara ala. Awakua ti mbi ayeke dekongo na ngia ndali ti so bê ti ala ayeke na ngia.” (És. 65:12-14). Tongana azo ti Jéhovah asoro aye so ala ye ti sara na lege ti ndara, a yeke mû gloire na lo.—aProv. 27:11.

3. Nyen la Jéhovah aye ti tene mo leke ti sara ni?

³ Aye wa la Jéhovah aye ti tene mo leke ti sara ni? Lo sara azo ti duti na ngia na lege so ala hinga lo nga ala sara na lo be-ta-zo (Ps. 128:1; Mat. 5:3). So ayeke nde mingi na ye so lo leke anyama ti sara ni, so ti tene gï ti tene ala te ye, ala nyon ye nga ala dü. Nzapa aye si mo duti na ngia na lege so mo leke ti sara ambeni ye mingi ahon ti ati so anyama ayeke sara. Lo so acréé mo ayeke “Nzapa ti ndoye”, “Nzapa so ayeke na ngia,” so asara azo “na image ti lo”. (2 aCor. 13:11; 1 Tim. 1:11; Gen. 1:27). Tongana mo sara ye tongana Nzapa ti e so aye e mingi, mo yeke duti ande na ngia. Bible atene: “Mungo ye na zo aga na ngia mingi ahon warango ye na tïtî zo.” (Kus. 20:35). Mo wani mo wara ngia so awe? So ayeke mbeni tënë so ayeke tâ tënë. Ndani la Jéhovah aye ti tene aye so mo leke ti sara afa so mo ye amba ti mo nga mo ye Nzapa.—Diko Matthieu 22:36-39.

4, 5. Nyen la asara lani si Jésus ayeke na ngia?

⁴ Jésus Christ azia nzoni tapande na ala amaseka. Kite ayeke dä ape so na ngoi so Jésus ayeke lani molenge, a nzere na lo ti sara ngia. Bible atene so “ngoi ti hengo ngia” ayeke dä nga “ngoi ti dodo” ayeke dä (Zo-ti. 3:4). Jésus aga nga lani nduru na Jéhovah na lege ti mandango Mbeti ti Nzapa. Na ngoi so lo yeke lani na ngu 12, bê ti amaître ti temple apika ndali ti “aye so lo hinga nga ndali ti atënë so lo yeke kiri na ni.”—Luc 2:42, 46, 47.

⁵ Na ngoi so Jésus aga lani kota zo, lo yeke na ngia. Nyen la asara si lo yeke na ngia? Lo hinga lani so Nzapa aye ti tene lo “fa nzoni tënë na awayere” nga lo “fa na awaziba so ala yeke kiri ande ti bâ ndo”. (Luc 4:18). So Jésus asara ye so Nzapa ahunda na lo ti sara asara lani si Jésus ayeke na ngia. Psaume 40:8 afa tënë ti bê ti Jésus atene: “Nzapa ti mbi, a nzere na mbi mingi ti sara ye so bê ti mo aye!” Jésus aye lani mingi ti fa ye na azo na ndö ti Babâ ti lo ti yayu. (Diko Luc 10:21.) Mbeni lâ na peko ti so lo fa na mbeni wali nzoni lege ti vorongo Nzapa, Jésus atene na adisciple ti lo, lo tene: “Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.” (Jean 4:31-34). So Jésus aye Nzapa nga na azo asara si lo yeke na ngia. A lingbi nga ti sara si mo duti na ngia.

6. Ngbanga ti nyen la a yeke nzoni mo sara lisoro na aChrétien so akpengba na ndö ti aye so mo leke ti sara?

⁶ A-Chrétien mingi awara ngia na lâ ti maseka ti ala na lege so ala sara kua ti pionnier. Mo lingbi ti sara lisoro na ambeni na ndö ti aye so mo leke ti sara? “Tongana azo abungbi ti pika patara pëpe, ye so ala leke ti sara atï na ngu, me grâce na gbâ ti awamungo wango, ye aga nzoni.” (aProv. 15:22). Peut-être aita so ayeke tene ande na mo so kua ti ngoi kue ayeke mû lege na mo ti manda aye mingi so ayeke mû maboko na mo na yâ ti gigi ti mo. Na peko ti so Babâ ti Jésus afa ye na lo na ngoi so lo yeke lani na yayu, lo ngbâ ti manda ye na ngoi so lo yeke na sese. Na tapande, lo yeke lani na ngia ti fa nzoni tënë na azo nga lo ngbâ be-ta-zo na yâ ti angoi ti ngangu. (Diko Ésaïe 50:4; aHéb. 5:8; 12:2.) Zia e bâ ambeni kua ti ngoi kue so alingbi ti ga na mo ngia.

7. Ngbanga ti nyen la amaseka mingi aye ti sara si azo aga adisciple?

⁷ Jésus atene na e ti “sara si azo aga adisciple” nga ti fa ye na azo (Mat. 28:19, 20). Tongana mo soro ti ga zo so ayeke sara si azo aga adisciple, andâ mo soro mbeni kua so ayeke  ga na ngia mingi na zo, kua so amû gloire na Nzapa. Tongana ti tanga ti akua kue, mo bezoin ngoi si mo sara ni nzoni. Ade ti ninga ape, Timothée, so akomanse ti sara kua ti pionnier na ngoi so lo de maseka, atene: “Mbi ye ti sara na Jéhovah na yâ ti kua ti ngoi kue ndali ti so a yeke mbeni lege ti fa na Jéhovah so mbi ye lo. Na tongo nda ni mbi yeke lani na a-étude ape, me ambeni ngoi na pekoni, mbi gue na yâ ti mbeni territoire nde, na yâ ti nze oko mbi komanse ti manda Bible na azo gbani. Mbeni zo so mbi manda Bible na lo akomanse ti ga na bungbi. Na peko ti so mbi gue na Ekole ti aita-koli so ayeke akumbamba, * a tokua mbi na yâ ti mbeni fini territoire. Kâ, mbi komanse ti manda Bible na azo osio. Mbi ye mingi ti fa ye na azo, na mbi bâ so yingo vulu achangé ye na yâ ti fini ti ala.”—1 aThes. 2:19.

8. Nyen la ambeni maseka asara ti fa tënë na azo mingi?

⁸ Ambeni Chrétien so ayeke maseka amanda mbeni yanga ti kodro nde. Na tapande, Jacob, so ayeke na États-Unis, atene: “Na ngoi so mbi yeke na ngu mbasambala, mingi ti amba ti mbi ti ekole ayeke azo ti Vietnam. Mbi ye lani ti sara tënë ti Jéhovah na ala, tongaso ngoi kete na pekoni mbi manda yanga ti kodro ti ala. Mingi ni, mbi manda yanga ti kodro ni na lege so mbi haka Tour ti Ba Ndo ti Anglais na ti yanga ti Vietnamien. Mbi sara kamarade na aita ti congrégation ti yanga ti Vietnamien so ayeke nduru na mbi. Na ngoi so mbi yeke na ngu 18, mbi komanse ti sara kua ti pionnier. Ambeni ngoi na pekoni, mbi gue na Ekole ti aita-koli so ayeke akumbamba. Ekole ni amû maboko na mbi na yâ ti kua ti mbi ti pionnier so mbi yeke sara laso na yâ ti groupe ti yanga ti Vietnamien so gï mbi oko la mbi yeke ancien. Bê ti azo mingi so ayeke azo ti Vietnam adö so mbi manda yanga ti kodro ti ala. Ala yamba mbi na ndo ti ala, na mingi ni mbi manda Bible na ala. Ambeni ague na li ni na ala wara batême.”—Bâ nga Kusala 2:7, 8.

9. Aye wa la kua ti sarango adisciple ayeke fa na mo?

⁹ Na yâ ti kua ti sarango adisciple, mo yeke manda anzoni kode ti sarango kua na ti sarango lisoro na azo. Nga a yeke sara si mo sara mbeto ape na a yeke mû maboko na mo ti sara tënë na nzoni bê (aProv. 21:5; 2 Tim. 2:24, kete tënë na gbe ni). Me kua ti sarango adisciple ayeke ga na mo ngia mingi, ndali ti so a yeke mû maboko na mo ti sara kua nzoni na Bible ti fa atënë ti mabe ti mo. Mo yeke manda nga tongana nyen ti sara kua maboko na maboko na Jéhovah.—1 aCor. 3:9.

10. Tongana nyen la mo lingbi ti wara ngia na yâ ti kua ti sarango adisciple atâa tongana territoire ti mo ayeke ngangu?

¹⁰ Mo lingbi ti wara ngia na yâ ti kua ti sarango adisciple même tongana azo mingi na yâ ti territoire ti mo aye ti manda Bible ape. Zo oko la ayeke sara adisciple ape. Azo ti congrégation kue la ayeke gi azo so ayeda na bê ti ala ti ga adisciple. Atâa so gï mbeni ita oko la awara mbeni zo so aga disciple, azo kue la agi zo ni so na azo kue la ayeke na ngia. Na tapande, Brandon asara kua ti pionnier ngu gumbaya na yâ ti mbeni territoire so gï kete wungo ti azo la ayeda ti manda Bible. Lo tene: “Mbi ye mingi ti fa nzoni tënë ndali ti so Jéhovah ahunda na e ti sara ni. Mbi komanse ti sara kua ti pionnier na peko ti so mbi hunzi ekole. A nzere na mbi ti kpengba aita ti congrégation ti e so ayeke amaseka na ti bâ so ala yeke gue na li ni. Na peko ti so mbi gue na Ekole ti aita-koli so ayeke akumbamba, a tokua mbi ti sara kua ti pionnier na yâ ti mbeni fini territoire. A yeke tâ tënë so lâ oko mbi manda Bible na mbeni zo na yâ ti territoire ngbii lo wara batême ape, me ambeni ita asara ni. A nzere na mbi so mbi leke lani ti bi terê ti mbi mingi na yâ ti kua ti sarango adisciple.”—Zo-ti. 11:6.

11. Mbeni kua ti Nzapa wa la amaseka mingi asara?

¹¹ Alege mingi azi ti sara na Jéhovah. Na tapande, amaseka mingi ayeke avolontaire ti construction. A yeke na bezoin ti afini Da ti Royaume mingi. Lekengo aDa ti Royaume ayeke mbeni kua so amû gloire na Nzapa nga alingbi ti sara si mo duti na ngia. Mo yeke duti nga na ngia ti sara kua maboko na maboko na aita. Mo lingbi ti manda aye mingi, na tapande tongana nyen la mo lingbi ti sara kua nzoni sân ti tene sioni asi na mo nga tongana nyen la mo lingbi ti sara kua maboko na maboko na azo so ayeke bâ ndo na ndö ti mo.

12. Kua ti pionnier alingbi ti zi lege na ambeni kua wa?

¹² Mbeni ita so iri ti lo ayeke Kevin atene: “Ngbene ye so mbi de kete, mbi ye lani ti tene mbeni lâ mbi sara na Jéhovah na yâ ti kua ti ngoi kue. Na nda ni, mbi komanse ti sara kua ti pionnier na ngu 19. Ti wara aye so mbi bezoin ni, mbi sara kua na mbeni ita-koli so ayeke sara kua ti lekengo ada, na kua ni amû ngoi ti mbi kue ape. Mbi manda ti pika ali ti da nga ti zia afenêtre nga na aporte na terê ti da. Na pekoni, mbi sara kua ngu use na yâ ti mbeni équipe so ayeke leke peko ti aye so kota pupu abuba ni, e leke aDa ti Royaume nga na ada ti aita so abuba. Na ngoi so mbi mä a tene a bezoin ti leke ada na Afrique du Sud, mbi mû iri ti mbi ti gue kâ na a tisa mbi ti gue. Ge na Afrika, mbi yeke mû maboko na lekengo aDa ti Royaume. E yeke sara ambeni yenga na mbeni ndo ti leke mbeni Da ti Royaume, na kete na pekoni, e gue ti leke mbeni nde. Azo so mbi na ala e yeke sara kua ni aga tongana sewa ti mbi. E lango ndo oko, e manda Bible legeoko nga e yeke sara kua maboko na maboko. A nzere nga na mbi ti fa tënë legeoko na aita ti ndo ni yenga oko oko. Aye so mbi leke ti sara na ngoi so mbi de maseka aga na mbi ngia so mbi pensé na ni kozo ape.”

13. Ngbanga ti nyen la amaseka so ayeke sara kua na Béthel ayeke na ngia?

 ¹³ Ambeni zo so ayeke lani apionnier ayeke sara kua fadeso na Béthel. Kua ti Béthel ayeke ga na ngia mingi na mo ndali ti so aye kue so mo yeke sara kâ ayeke ndali ti Jéhovah. Sewa ti Béthel amû maboko na e ti wara kobe ti yingo. Mbeni ita ti Béthel so iri ti lo ayeke Dustin atene: “Mbi leke na bê ti mbi ti sara kua ti ngoi kue na ngoi so mbi yeke na ngu gumbaya, na mbi komanse ti sara kua ti pionnier na ngoi so mbi hunzi ekole. Ngu oko na ndambo na pekoni, a tisa mbi na Béthel; kâ, mbi manda ti sara kua na masini ti imprimengo na ambeti nga ambeni ngoi na pekoni, mbi manda ti sara ambeni kua na ordinateur. Na Béthel, a nzere na mbi ti mä tënë ti maïngo ti kua ti sarango adisciple na yâ ti dunia. Mbi ye mingi ti sara kua ge ndali ti so kua so e yeke sara ge amû maboko na azo ti ga nduru na Jéhovah.”

14. Tongana nyen la mo lingbi ti leke ti sara kua ti ngoi kue?

¹⁴ Tongana nyen la mo lingbi ti leke ti sara kua ti ngoi kue? Ti sara kua ti Jéhovah nzoni, a lingbi mo gi ti duti na anzoni sarango ye ti aChrétien. Tongaso, manda Bible lakue, gbu li ti mo nzoni na ndö ni nga gi alege ti fa tënë ti mabe ti mo na ngoi ti abungbi. Na ngoi so mo ngbâ na ekole, mo lingbi ti maï akode ti mo ti fango nzoni tënë na azo. Gi ti bi bê na azo na lege so na ndara mo hunda tënë na ala ti hinga bango ndo ti ala nga dengi mê nzoni mo mä ala. Mo lingbi ti mû maboko na kua ti lekengo yâ ti Da ti Royaume nga ti sara si angbâ nzoni. Jéhovah abâ na nzoni lê azo so asara terê ti ala kete nga ayeke nduru ti sara ambeni kua. (Diko Psaume 110:3; Kus. 6:1-3.) Bazengele Paul airi lani Timothée ti sara kua ti missionnaire ndali ti so ‘aita asara nzoni tënë ti lo mingi.’—Kus. 16:1-5.

15. Ti wara mbeni kua, nyen la mo lingbi ti sara?

¹⁵ Mingi ti awakua ti ngoi kue abezoin ti sara mbeni kua ti nginza (Kus. 18:2, 3). Peut-être mo lingbi ti manda mbeni kua so alingbi ti mû lege na mo ti wara mbeni kua so amû ngoi ti mo mingi ape so ayeke na ndo so mo yeke dä. Tongana mo leke aye so mo ye ti sara, sara tënë ni na surveillant ti circonscription nga na ambeni pionnier ti circonscription ti mo. Hunda ala kua wa la ayeke nzoni ndali ti apionnier. Nga, tongana ti so Bible atene, “ye kue so mo ye ti sara, zia ni na maboko ti Jéhovah, na aye so mo leke ti sara ayeke ga nzoni.”—aProv. 16:3; 20:18.

16. Tongana nyen la ti sara kua ti Jéhovah mingi na lâ ti maseka ti mo ayeke leke mo ti sara ambeni kua na yâ ti angoi so ayeke ga?

¹⁶ Mo lingbi ti duti na confiance so Jéhovah aye si mo duti na ngia na yâ ti ngoi so ayeke ga, na lo ye si mo “gbu” beku so ngangu. (Diko 1 Timothée 6:18, 19.) Kua ti ngoi kue ayeke sara si mo ga Chrétien so akpengba na ngoi so mo yeke sara kua maboko na maboko na ambeni wakua ti ngoi kue. Ambeni zo so asara mariage abâ so kua ti pionnier so ala sara lani na ngoi so ala ngbâ maseka amû maboko na ala na yâ ti mariage ti ala. Mingi ni, azo so asara kua ti pionnier kozo na mariage ti ala angbâ ti sara ni na peko ti mariage ti ala.—aRom. 16:3, 4.

17, 18. Tongana nyen la ye so e leke ti sara andu nga ye so ayeke na yâ ti bê ti e?

¹⁷ A yeke na bê ti mo la mo yeke leke ye so mo ye ti sara. Na ndö ti Jéhovah, Psaume 20:4 atene: “Zia si lo mû na mo aye so bê ti mo aye, nga lo sara si aye kue so mo leke ti sara aga nzoni.” Tongaso, gbu li ti mo na ndö ti ye so mo ye ti sara na yâ ti gigi ti mo. Gbu li ti mo na ndö ti ye so Jéhovah ayeke sara na ngoi ti e laso, na bâ ye so mo lingbi ti sara na yâ ti kua ti lo. Na pekoni, leke ti sara ye so azia ngia na bê ti lo.

¹⁸ Ti sara kua ti Jéhovah mingi ayeke ga na mo ngia mingi ndali ti so sarango tongaso amû gonda na Nzapa. “Gi ti wara ngia mingi na mbage ti Jéhovah, na lo yeke mû na mo aye so mo sara nzara ni.”—Ps. 37:4.