Presque azo kue la ayeda so ambeni ye ayeke nzoni nga ambeni ayeke sioni. Na tapande, azo abâ tënë ti fango zo, bungbingo na zo na ngangu nga na bungbingo na amolenge na ngangu tongana aye so ayeke sioni. Ala bâ nga na nene ni mingi tënë ti fango ngbanga ti mbilimbili, bango mawa ti zo nga na ziango terê na place ti zo. Me, tongana andu tënë ti bungbingo koli na wali, sarango ye na lege ni wala batango amolenge, mingi ti azo apensé so ayeke ye so abâ zo oko oko. Ala pensé so mingi ti ye so azo asoro, atâa ayeke so wa, ayeke na lege ni. Mingi ni, adesizion so azo ayeke mû ague oko na ye so bê ti ala aye wala ague oko na bango ndo ti azo so angoro ala. Eskê nzoni lege ti mû desizion la?

Mingi ni, mbeni ye ayeke dä so ayeke fa lege na e na ndö ti ye so ayeke nzoni nga na ye so ayeke sioni, ye ni so a iri ni conscience (aRomain 2:​14, 15). Même na ngoi so amolenge angbâ kete, ala peut ti hinga kangbi so ayeke na popo ti ye so ayeke na lege ni na ye so ayeke na lege ni ape, nga parfois ala peut ti bâ so tënë ayeke na li ti ala. Tongana ngoi ayeke hon, aye so e manda na mbage ti asewa ti e, amba ti e, awafango mbeti na e, ndo so e lango dä, bungbi ti vorongo Nzapa ti e nga na ngobo ti e apeut ti sara ye mingi na ndö ti conscience ti e. Tongana e mû mbeni desizion, conscience ti e ayeke fa na e wala ye so e soro ague oko na ye so e hinga na ndö ti ye so ayeke nzoni wala ayeke sioni.

Ngangu so e yeke na ni ti hinga ye so ayeke nzoni nga na ye so ayeke sioni apeut ti pusu e ti zia terê ti e na place ti azo, ti kiri singila, ti sara ye na lege ni nga ti bâ mawa ti azo. A peut nga ti sara si e ke ti sara aye so apeut ti ga na kpale na azo so e ye ala, ti sara aye so apeut ti sara e kamene nga ti bâ so tënë ayeke na li ti e.

 Eskê abango ndo ti e la ayeke nzoni ye so apeut ti fa lege na e? Garrick atene so na temps so lo ngbâ lani maseka, lo soro “ti sara gï ye so bê ti lo aye.” Ye oko, lo bâ so achoix so lo sara lani aga na lo aye ti nzoni ape. Lo tene so fason so lo vivre na ni asara si lo yeke na ngia ape, lo sara lango-sioni, lo nyon asioni yorö, lo nyon sämba ahon ndö ni nga lo sara ye ti ngangu na azo.

Nde na abango ndo ti e, mingi ni, e yeke mû adesizion so aluti na ndö ti bango ndo ti azo. E peut ti bâ nzoni na lege ti a-expérience nga na ndara ti ala. Azo ti sewa ti e, akamarade ti e nga na azo ti ndo so e yeke dä ayeke ne e, tongana ala bâ so e sara ye alingbi na aye so ala fa na e.

Eskê bango ndo ti azo la ayeke nzoni ye so apeut ti fa lege na e? Na temps so Priscila ayeke maseka, lo sara ye lani tongana akamarade ti lo nga lo bâ so ayeke na lege ni ti bungbi koli na wali. Atâa so amba ti lo apensé so ye so lo sara ayeke nzoni, lo yeke lani na ngia ape. Lo tene: “Ti sara ye so azo kue abâ so ayeke nzoni asara si mbi yeke na ngia ape. Ye so asara si mbi sara ye na ndara ape nga mbi sara ye kirikiri.”

Tongana e ye ti mû adesizion, a lingbi e hinga so atënë ti bê ti e nga na bango ndo ti ambeni zo ayeke nga kota ye. Me, gï aye ni so la apeut ti ga na aye ti nzoni ape. Parfois, e peut ti mû mbeni desizion sân ti hinga akpale so e nga na ambeni zo apeut ti wara na pekoni (aProverbe 14:12). Mbeni ye oko afa ape so abango ndo ti e wala ti ambeni zo ayeke tâ na lege ni. Abango ndo ni apeut ande ti changé. Girisa ape so, ambeni sarango ye so azo abâ ni lani tongana ye ti sioni aga laso ye ti nzoni, nga ye so azo abâ ni lani tongana ye ti nzoni aga ye ti sioni.

Eskê mbeni nzoni lege ti mungo adesizion ayeke dä? Eskê mbeni ye ayeke dä so apeut ti fa lege na e na ngoi so e yeke mû adesizion tongaso si e wara aye ti vundu ape na yâ ti angoi so ayeke ga?

Nzoni ye ni ayeke so, mbeni ye ayeke dä so zo kue apeut ti sara confiance na ni ti fa lege na lo, atâa ndo wa la zo ni ayeke dä. Article ti peko ayeke fa ndo so e peut ti wara anzoni fango lege dä so ayeke aidé e ti sara kangbi na popo ti ye so ayeke nzoni nga na ye so ayeke sioni.