Ye so ayeke nzoni nga ye so ayeke sioni: E peut ti sara confiance na ye so Bible afa
E peut ti duti sûr ape so adesizion so e mû ayeke ga na aye ti nzoni, tongana adesizion ti e ni aluti gï na ndö ti abango ndo ti e wala ti ambeni zo. Bible afa ndani so ayeke tongaso, nga a fa ambeni ye na ndö ni. Bible a-aidé e ti hinga kangbi so ayeke na popo ti ye so ayeke nzoni nga na ye so ayeke sioni, na ye so la ayeke aidé e ti duti na ngia.
E BEZOIN TI TENE NZAPA AFA LEGE NA E
Na lege ti Bible, Jéhovah a Nzapa afa so azo ayeke na bezoin ti fango lege ti lo nga ala peut ape ti fa lege na terê ti ala wani (Jérémie 10:23). A yeke ndani la si lo mû na e Bible so na yâ ni e yeke wara afango lege so alondo na lo. Lo ye azo na lo ye ape ti tene e mû asioni desizion so apeut ti ga na e akpale nga na aye ti vundu na yâ ti fini ti e (Deutéronome 5:29; 1 Jean 4:8). Na ndö ni, so lo la lo créé e, ndara nga na hingango ye so lo yeke na ni ayeke mû lege na lo ti mû na e anzoni wango (Psaume 100:3; 104:24). Me, Nzapa ayeke forcé zo oko ape ti sara ye alingbi na afango lege ti lo.
Jéhovah amû lani na kozo koli nga na kozo wali, Adam na Ève, aye kue so ala yeke na bezoin ni ti duti biani na ngia (Genèse 1:28, 29; 2:8, 15). Lo fa nga na ala aye so lo ye ti tene ala sara ye alingbi na ni. Me, lo zia lege na ala ti soro ti sara ye alingbi na ni wala pëpe (Genèse 2:9, 16, 17). Ye ti mawa ni ayeke so, Adam na Ève asoro lani ti sara ye so bê ti ala aye ahon ti sara ye alingbi na andia ti Nzapa (Genèse 3:6). Ye ti pekoni ayeke so wa? Eskê azo ayeke na ngia tongana ala soro ti sara ye so bê ti ala aye? Ên-ën. Aye so asi na yâ ti mbaï ti azo afa so azo apeut ape ti duti na siriri nga na ngia tongana ala sara sanka ti andia ti Nzapa.—Zo-ti-fa-tene 8:9.
Na yâ ti Bible, e yeke wara awango so apeut ti aidé e ti sara anzoni choix, atâa ndo wa la e yeke dä (2 Timothée 3:16, 17; bâ encadré “ Mbeni mbeti ndali ti azo kue.”) Bâ tongana nyen la Bible apeut ti aidé e.
Gi ti hinga ndani so e peut ti tene so Bible ayeke biani “tënë ti Nzapa.”—1 aThessalonicien 2:13. Bâ vidéo Bible alondo na zo wa? na ndö ti jw.org.
BIBLE AFA NA E AYE SO NZAPA AYE TI TENE E SARA
Bible afa na e polele tongana nyen la Nzapa asara ye lani na mbage ti azo. Aye so Bible afa apeut ti aidé e ti hinga bango ndo ti Nzapa na ndö ti ye so ayeke nzoni na ye so ayeke sioni, nga ti hinga aye so apeut ti sara nzoni na e wala so apeut ti ga na e akpale (Psaume 19:7, 11). Aye so e manda na yâ ti Bible apeut ti aidé e ti mû anzoni desizion na yâ ti gigi ti e ti lâ oko oko.
Na tapande, bâ wango so ayeke na aProverbe 13:20: “Zo so atambela na azo ti ndara, lo yeke ga zo ti ndara, me zo so asara kamarade na azo ti buba, lo yeke wara sioni dä.” Tënë so angbâ na ngangu juska laso. A yeke wara na yâ ti Bible amama-ndia so apeut ti aidé e.—Bâ encadré “ Awango so ayeke na yâ ti Bible angbâ lakue na ngangu.”
Me mo peut ti hunda terê ti mo, mo tene: ‘Eskê awango so ayeke na yâ ti Bible apeut ti aidé mbi laso?’ Article ti peko ayeke fa tongana nyen la Bible a-aidé lani ambeni zo.
a Jéhovah ayeke iri ti Nzapa.—Psaume 83:18.
