So Nzapa la acréé e, lo la lo hinga nzoni fason so e doit ti vivre na ni. Lo ye ti tene e sara ye alingbi na afango lege ti lo ndali ti so ayeke ndali ti nzoni ti e. Tongana e sara ye alingbi na acommandement ti lo, kite ayeke dä ape so aye so e soro ti sara ayeke ga ande nzoni. Nga, e yeke mû lakue anzoni desizion na asara si e yeke duti na siriri nga na ngia.

 Ti sara ye alingbi na andia ti Nzapa ahunda ti sara achangement na ndö ti fason so e yeke pensé na ni nga e yeke sara na aye. Me, aye so Jéhovah ahunda na e ti sara ahon ngangu ti e ape. Na ndö ni, so lo la lo créé e, lo hinga ye so e yeke na ngangu ti sara ni. Tongana e hinga Jéhovah, e yeke bâ so “acommandement ti lo ayeke ye so ane pëpe.”—1 Jean 5:3.

Grâce na aide ti Nzapa, e peut ti sara ye alingbi na aye so lo hunda na e. Lo peut ti aidé e na lege ti Bible, so na yâ ni e yeke wara atënë so akpengba e nga amû na e beku.

Azo kutu mingi na yâ ti dunia kue abâ so ti sara ye alingbi na aye so Bible afa ayeke sara si gigi ti ala aga nzoni. Gi ti manda Bible ti hinga anzoni wango so ayeke na yâ ni. Mo peut ti komanse ti manda ni na lege ti brochure Ngbâ na fini lakue lakue! so mo peut ti téléchargé ni senge senge na ndö ti jw.org. Na yâ ni mo yeke wara aye ti manda so:

• Bible alingbi ti mû maboko na mo tongana nyen?

• Bible amû na zo beku

• Eskê mo lingbi ti sara confiance na Bible?

Tongana mo mû ngoi ti manda Bible, mo yeke bâ so atënë ti yâ ni angbâ na ngangu nga so “zo alingbi lakue ti zia bê ti lo dä, laso nga lakue lakue.” (Psaume 111:8). Ti sara ye alingbi na andia ti Nzapa so ayeke na yâ ti Bible ayeke sara si gigi ti e aga nzoni mingi. Ye oko, Nzapa aforcé e ape ti sara ye alingbi na andia ti lo (Deutéronome 30:​19, 20; Josué 24:15). A yeke ye so zo oko oko adoit ti soro.