Rosie atene: “Lakue mbi yeke pensé so akpale ti mbi ayeke kiri ti ga ngangu, atâa so ti vrai ni akpale ni so ayeke ga nga tongaso ape.” Aversê ti Bible wa la a-aidé lani lo? Mbeni oko ayeke Matthieu 6:34, so a tene: “Ala gi bê ti ala lâ oko pëpe ngbanga ti kekereke, ndali ti so kekereke ayeke ande na agingo bê ti lo wani. Akpale ti lango oko oko alingbi na lango ni.” Fadeso, Rosie atene so atënë ti Jésus so a-aidé lo ti zia lege ti gingo bê ahon ndö ni na ndö ti aye so alingbi ti si kekereke. Lo kiri lo tene: “Akpale ti mbi angbâ lakue, me mbi yeke gi bê ti mbi encore ape na ndö ti aye so ade ti si ape wala na ndö ti aye so peut-être ayeke si nga ande lâ oko ape.”

Yasmine nga kue gingo bê ahon ndö ti lo, lo tene: “A peut ti si so mbi toto teti alango mingi, na ambeni bï mbi peut ti lango ape. Mbi bâ so asioni pensé awoko mbi kue.” Versê ti Bible wa la a-aidé lani lo? Lo fa 1 Pierre 5:7, so a tene: “Ala mû agingo bê ti ala kue ala bi ni na ndö ti lo [Nzapa], ngbanga ti so lo yeke bi bê ti lo na ndö ti ala.” Yasmine akiri atene: “Tongana ngoi ayeke hon, mbi ngbâ ti sambela Jéhovah, na lo kiri tënë na asambela ti mbi. A yeke mo bâ mo tene a zi mbeni nengo ye na ndö ti go ti mbi. Asioni pensé so mbi yeke wara ka so ayeke kiri ngoi na ngoi, me mbi hinga fadeso tongana nyen la mbi peut ti hon ndö ni.”

Isabella, so ayeke mbeni maseka-wali, atene: “Mbi pensé ti mbi so, ti pusu lakue lango ti aye so mo doit ti sara na peko ayeke mbeni sarango ye so a dü zo dungo na ni ndali ti so babâ ti mbi kue ayeke tongaso. Mbi yeke pusu lango ti akota ye so mbi yeke na ni ti sara na peko tongaso si mbi sara ye oko ape; mbi wu terê ti mbi wala mbi bâ gï télé. A yeke mbeni sioni fason ndali ti so a yeke sara si zo agi bê ti lo mingi nga a yeke sara si lo sara nga mbeni nzoni kua ape.” Mama-ndia ti Bible so a-aidé lo ayeke na 2 Timothée 2:15, so a tene: “Mo sara ngangu kue ti duti mbeni zo so anzere na lê ti Nzapa, mbeni wakua so mbeni ye ti sara kamene na lo ayeke dä pëpe.” Isabella atene: “Mbi ye si kua so mbi sara azia kamene na lê ti Jéhovah ape gï ndali ti so mbi ye ka lakue ti pusu lango ti aye so mbi ye ti sara na peko.” Isabella achangé mingi na pekoni.

Kelsey nga kue atene: “Mbi peut ti duti na mbeni ye so mbi doit ti sara, me mbi yeke pusu lango ni na peko ngbii juska ngoi ti sarango ye ni aga tâ nduru. Mbi yeke toto, lango ayeke kpe na lê ti mbi nga mbi yeke gi bê ti mbi. Ye ni so asara lani mbi nzoni oko ape.” Mbeti ti aProverbe 13:16 a-aidé lani Kelsey, a tene: “Zo so lê ti lo ahan asara ye alingbi na hingango ye, me zo ti buba asigi na buba ti lo wani.” Lo fa ye so lo manda na lege ti versê ni, lo tene: “A yeke nzoni ti sara ye ahon ndö ni ape nga ti leke aye so mo ye ti sara kozo. Fadeso mbi yeke na mbeni cahier na ndö ti bureau ti mbi so mbi yeke sû akua nde nde so mbi yeke na ni ti sara na yâ ni; ye so amû lege na mbi ti sara ye na programme, me ti pusu pëpe lango ti aye na peko ngbii juska ngoi ti sarango ye ni aga tâ nduru si.”

Kirsten atene: “Koli ti mbi so mbi na lo e sara mariage adö mbi azia na amolenge osio so ade kete.” Mama-ndia ti Bible wa la a-aidé lani lo? Mbeti ti aProverbe 17:17, so a tene: “Tâ kamarade aye mba ti lo na ngoi kue, nga lo yeke mbeni ita so a dü lo ndali ti angoi ti vundu.” Kirsten agi mungo maboko na mbage ti azo ti bungbi ti lo. Ye ti nzoni wa la lo wara? Lo wani lo tene: “Akamarade ti mbi aga nduru na mbi na alege nde nde! Ambeni azia aye ti tengo nga na afleur na yanga-da ti mbi. Fani ota mbeni kete groupe ti azo a-aidé mbi na amolenge ti mbi ti quitté mbeni da ti gue na mbeni. Mbeni a-aidé mbi ti wara kua ti nginza. Akamarade ti mbi ayeke lakue dä ti aidé mbi.”

Delphine so e sara tënë ti lo kozo nga kue asara ngangu ti duti gï lo oko ape. Lo rappelé na ngoi so lo perdre lani aye kue, lo tene: “Mbi yeke lani tongana zo so ayeke ti lo na ye oko ape. Mbi bâ so mbi yeke lani tâ gï mbi oko.” Mbeni versê so a-aidé lo ayeke Psaume 68:6, so a tene: “Azo so ayeke gï ala oko, Nzapa amû na ala da ti lango.” Lo tene: “Mbi hinga so versê so aye gï ti sara tënë ti vrai da ape. Mbi ga ti comprendre so Nzapa amû na e da na lege ti yingo, mbeni ndö so ayeke tâ nzoni so amû lege na mbi ti ga biani nduru na aita ti mbi so aye Jéhovah. Me mbi hinga so mbi peut ti ga nduru na aita ape tongana mbi yeke nduru na Jéhovah ape. Ni la mbeti ti Psaume 37:4 atene: ‘Gi ti wara ngia mingi na mbage ti Jéhovah, na lo yeke mû na mo aye so mo sara nzara ni.’”

Delphine ahunzi tënë ti lo tongaso: “Mbi bâ so a lingbi mbi kpengba songo ti mbi na Jéhovah mingi ahon ti kozo. Lo yeke tâ nzoni Kamarade. Tongaso mbi sara molongo ti aye nde nde so mbi peut ti sara legeoko na amba ti mbi tongaso si mbi wara akamarade so aye Jéhovah. Mbi manda ti bâ gï anzoni ye so azo asara, me ti bâ pëpe afaute ti ala.”

Ti tâ tënë ni, e kue e yeke na siokpari na terê ti e. A-Témoin ti Jéhovah ayeke tiri na akpale ti ala tongana tanga ti azo kue. Me Bible afa na azo ti aidé amba ti ala tongana lege ayeke dä. A yeke nzoni ti sara kamarade na azo tongaso. Me, eskê amama-ndia ti Bible apeut nga ti aidé zo tongana lo yeke na mbeni kpale so alingbi ti hon lâ oko ape, na tapande mbeni kobela so a peut ti sava ni ape wala vundu ti kuâ ti mbeni zo?