AMBENI ZO ATENE EN. Mbeni docteur atene so ti sara kua laso na afango ye ti Bible ayeke mo bâ mo tene mbeni zo amû mbeni livre ti chimie ti ngu 1920 la lo yeke fa na mbeti laso. Mbeni zo so abâ Bible na nene ni ape alingbi même ti hunda wala eskê mbeti ti mbeni ordinateur ti ândö apeut ti aidé mo ti hinga ti sara kua na mbeni ordinateur ti laso? So ti tene ti ambeni zo, Bible aga tâ ngbene ye awe.

Ndani nyen ti sara kua na mara ti ngbene mbeti tongaso, so laso science ague na li ni mingi so? Laso mo yeke wara gbâ ti asite Internet so apeut ti mû na mo awango. Na télé a yeke sara a-émission so na yâ ni ambeni zo so ahinga ye mingi ayeke mû awango na ndö ti aye nde nde. Na place ti kango ambeti, mo yeke wara gbâ ti ambeti so apeut ti aidé mo sân ti tene mbeni zo amû maboko na mo.

So laso zo apeut ti wara asango so kue gï na yâ ti kete ngoi so, ngbanga ti nyen ti gi awango na yâ ti Bible, so ayeke mbeni mbeti so a sû ni asara angu 2 000 tongaso awe so? Eskê azo so abâ Bible na nene ni ape ayeke na raison ti tene so ti gi awango na yâ ti mara ti ngbene mbeti tongaso ayeke mo bâ mo tene zo asara kua na mbeni ngbene livre ti chimie wala ti mbeni ordinateur? Ên-ën, tënë ni so ayeke na lege ni ape. Science ague na li ni mingi, nga awandara asigi na gbâ ti afini ye, me eskê aye so azo ayeke tâ na bezoin ni achangé? Azo angbâ lakue ti gi ti hinga ndani so ala yeke na fini, ti duti na ngia nga na siriri, ti duti na nzoni songo na yâ ti sewa nga na akamarade ti ala.

Bible asara tënë na ndö ti aye ni so si e yeke tâ na bezoin ni so nga na ambeni nde, atâa so lo yeke mbeni ngbene mbeti. A fa nga so a sû ni na gbe ti yingo ti Nzapa. Bible ayeke fa ye na e na yâ ti aye kue nga ayeke aidé e ti luti na lê ti akpale kue (2 Timothée 3:16, 17). Na ndö ni, awango ti yâ ni angbâ na ngangu lakue, lâ oko ayeke ga ngbene aye ape. Bible ni wani atene: “Tënë ti Nzapa ayeke na fini.”​—aHébreu 4:12.

Eskê aye so Bible afa ayeke biani tâ tënë? Eskê a ga ngbene ye awe? Wala lo yeke mbeti so alingbi biani ti mû na e anzoni wango ahon tanga ti ambeti kue? Tour ti Ba Ndo so, so ayeke nde so, ayeke mû ande maboko na mo ti wara akiringo tënë na ahunda so.